Read Pahari, Kullu प्रेरित 27 Bible Online

प्रेरित 27 - Pahari, Kullu bible

प्रेरित 27

¹ज़ैबै फिस्तुस राज़पालै ऐ गैल पक्की केरी कि आसा ज़हाज़ा पैंधै इतालिया देशा रै रोम शैहरा बै जाँणा, ता तिन्हैं पौलुस होर दुजै कैदी बी यूलियुस नाँ रै औगुस्तुस सम्राटा रै पलटनै रै एकी सूबैदारै रै हौथा न सौंपू,

²होर अद्रमुत्तियुम शैहरा रै ज़हाज़ा न ज़ो कि आसियै प्रदेशा रै कनारै री ज़ैगा न ज़ाणू आल़ा ती होर आसै तेथा न च़ढ़िया समुन्द्री सफर शुरू केरू होर अरिस्तर्खुस नाँ रा थिस्सलुनीकै शैहरा रै एक मकिदुनिया इलाकै रा आसा सैंघै ती।

³दुज़ै रोज़ै आसै सैदा नगरा न पुज़ै होर यूलियुसै पौलुसा पैंधै कृपा केरिया सौ तेइरै सैंघी हागै ज़ाणै धिना कि ते तेइरा आदर केरलै।

⁴तौखै न आसै दबारा सफर शुरू केरिया साइप्रस टापू रै कनारै मौंझ़ै होईया च़लै, किबैकि बागर उल्टी धिरै बै च़ली ती।

⁵होर किलिकिया होर पँफूलियै शैहरा रै कनारै समुन्द्रा होईया लूसियै इलाकै रै री मूरा शैहरा न पुज़ै।

⁶तौखै सूबैदारा बै सिकन्दरिया शैहरा रा एक ज़हाज़ इतालिया इलाकै बै ज़ाँदा मिलू होर तिन्हैं आसै तेई ज़हाज़ न च़ढ़ाऐ,

⁷होर ज़ैबै आसै बोहू रोज़ा बाद बड़ी मुश्किला न कनिदुसा नगरा सामनै पुजै। बागर आसाबै आगै नी ती बड़नै देंदी तैबै आसै सलमोन ज़ैगा रै सामनै न होईया क्रेतै टापू रै ओल्है न च़लै,

⁸होर तेइरै कनारै-कनारै मुश्किला सैंघै च़लिया शुभ लँगरबारी नाँ री ज़ैगा न पुजै ज़ौखै न लसिया नगर नेड़ ती।

⁹ज़ैबै बोहू रोज़ बीतै, होर ज़हाज़ बै बढ़ाणा बी खतरै रा कोम ती, किबैकि ब्रतै रै ध्याड़ै रा त्यौहार खत्म हुऐ ती। होर ऐबै ऐण्ढा मौसम शुरू होंदा लागा ती ज़ैबै समुन्द्र रुखा होर तूफानी बणी जा ती, तैबै पौलुसै तै ऐ बोलिया समझाऐ,

¹⁰कि हे सज्जनो मुँभै ऐण्ढा महसूस होआ सा कि एसा यात्रै री मुसीबता न मालै री केल्ही नी बल्कि ज़हाज़ा समेत आसरै प्राणा रा बी नुकसान होणु आल़ा सा।

¹¹पर सूबैदारै पौलुसै री गैला न ज़ादा ज़हाज़ च़लाणू आल़ै माँझी री मैनी,

¹²होर शुभ लंगरबारी नाँ रा बन्दरगाह हिऊँद काटणै री तैंईंयैं मुश्किल ती। तैबै तिन्हैं फीनिक्स बन्दरगाह पुजिआ हिऊँद काटणै रा विचार केरू। ऐ क्रेतै टापू नाँ री ज़ैगा रा एक ऐण्ढा बन्दरगाह ती ज़ुणी रा दरवाजा दक्षिण-पश्चिम होर उतर-पश्चिमा धिराबै खुला सा।

¹³ज़ैबै दक्षिणी बागर सुल्है-सुल्है होन्दी लागी ता तिन्हैं ऐण्ढा सोच़िया कि तिन्हां फिनिक्स बन्दरगाह न पूजणा ज़ैण्ढा तिन्हैं पैहलै सोच़ु ती। आसरा मतलब पुरा हुआ तौखै न लंगर च़कू होर कनारै-कनारै ढौकिया क्रेतै टापू होईया ज़हाज़ा न ज़ाँदै लागै।

¹⁴पर थोड़ी देरा बाद तौखै न एक बड़ी आँधी उठी ज़ुणिबै युरकुलीन बोला सी।

¹⁵ज़ैबै ऐ ज़हाज़ा न लागी ता सौ ज़हाजा सामनै नी ठहरी सकू होर आसै सौ ज़हाज़ बागरी धिरै बै ज़ाणै धिना, होर आसै बी तेई ज़हाज़ सैंघै बैंहदेआ च़लदै रौहै।

¹⁶तैबै कौदा नाँ रै टापू रै ओल्है न बैंहदै-बैंहदै आसै बड़ी मुश्किला न किश्ती बै आपणै वशा न केरी सकै।

¹⁷फिरी समुन्द्री ज़हाज़ च़लाणु आल़ै बचाव केरनु आल़ी किश्ती च़कणै न बाद ज़हाज़ हेठै न बोनू ऊझै तक रौशी सैंघै कशिया बौनु होर सुरितसै खाड़ी रै चोरबालू न फसणै री डौरै समान उतारिआ तिन्हैं लंगरा बै थोड़ा हेठै उतरिआ ज़हाज़ बागरी सैंघै बैहणै री तैंईंयैं छ़ौड़ू।

¹⁸होर ज़ैबै आसै आँधी न बड़ै हिचकोलै होर धाक्कै खाऐ ता दुज़ै रोज़ै ते ज़हाज़ा रा समान शेटदै लागै,

¹⁹होर त्रीज़ै ध्याड़ी तिन्हैं आपणै हौथै ज़हाज़ा रा समान शेटू,

²⁰होर ज़ैबै बोहू रोज़ा तैंईंयैं सूरज़ नी हेरूआ न तारै हेरूऐ होर बड़ी आँधी च़लदी रौही ता आखरी न आसरै बच़णै री सारी आशा खत्म हुई।

²¹ज़ैबै तिन्हैं बोहू ब्रत केरै ता पौलुसै तिन्हरै बिच़ा न खड़ै होईया बोलू, हे लोको, अगर तुसै मेरी गैल मैनी ती होर क्रेत टापू न ज़हाज़ नी ती खोलू ता आसा पैंधै ऐ मुसीबत ऐन्दी न आसरा नुकसान होंदा।

²²पर ऐबै हांऊँ तुसाबै समझा सा कि हौंसला रखा किबैकि तुसा न कौसी रै प्राणा रा नुकसान नी होंणा सिर्फ़ ज़हाज़ा रा नुकसान होंणा,

²³किबैकि ज़ौस परमेश्वरा रा हांऊँ सा होर ज़ौसरी हांऊँ आराधना केरा सा, तेइरै स्वर्गदूतै पिछ़ली राती मूँ हागै एज़िया बोलू,

²⁴हे पौलुस मत डौरदा, तेरा महाराज़ै सामनै खड़ा होंणा ज़रूरी सा, होर परमेश्वरै ते सैभै ज़ो तौ सैंघै सफ़र केरदै लागै सी तौभै जीवनदान धिना सा।

²⁵ऐबै हे सज्जनो, हौंसला रखा। हांऊँ परमेश्वरै री प्रतीति केरा सा, ज़ैण्ढा परमेश्वरै मुँभै बोलू सा तैण्ढा होंणा।

²⁶पर आसाबै कौसी टापू पैंधै ज़ाइआ टेकणा पौऊ।

²⁷ज़ैबै च़ौदवी राती न आसै अद्रिया समुन्द्रा न फिरदै लागै ती ता औधी रातियै समुन्द्री ज़हाज़ा च़लाणू आल़ै ठोकरा सैंघै ज़ाणू कि आसै कौसी देशै रै नेड़ पुजदै लागै सी।

²⁸होर पता लाइया तिन्हैं बीह फुट डूघा पाऊ होर थोड़ा आगै जाईया पता लाऊ ता पन्द्रा फुट डूघा पाऊ।

²⁹तैबै पात्थरा आल़ी ज़ैगा न पौड़नै री डौरै तिन्हैं ज़हाज़ा पिछ़ै च़ार लँगर पाऐ होर दोत होंणै रा इंतज़ार केरदै लागै।

³⁰पर ज़ैबै समुन्द्री ज़हाज़ च़लाणु आल़ा ज़हाज़ा पैंधै न भैगणा चाहा ती होर गलही न लँगर लाणै रै बहानै डोंगी न उतारी,

³¹ता पौलुसै सूबैदारा होर सिपाही बै बोलू, अगर ऐ ज़हाज़ा पैंधै नी रौहलै ता तुसै बी नी बच़ी सकदै,

³²तैबै सिपाहियै रौशी काटिया डोंगी शढ़ाई (शेटी)।

³³ज़ैबै दोत होणू आल़ी ती, ता पौलुसै लोका ऐण्ढै बोलिया अर्ज़ा केरी, औज़ चौदह रोज़ हुऐ कि तुसै फिक्र केरदै-केरदै भूखै रौहै होर किछ़ नी केरू।

³⁴ऐबै हांऊँ तुसाबै समझ़ा सा कि किछ़ खाई लेआ कि तुसरा बच़ाव होला किबैकि तुसा सुरक्षित रौहणा।

³⁵ऐण्ढै बोलिया पोलुसै सैभी सामनै रोटी लेइया परमेश्वरा रा धन्यवाद केरू होर चोड़िया खाँदा लागा।

³⁶तैबै ते सारै बी हौंसलै रखिया रोटी खाँदै लागै।

³⁷आसै सैभै मिलिया ज़हाज़ा न दूई शौऊ छियतर मांहणु ती।

³⁸ज़ैबै ते रोटी खाईया रौज़ै ता गेहूँ बै समुदरा न शेटिया ज़हाज़ा बै हल्का केरदै लागै।

³⁹ज़ैबै दोत हुई ता तिन्हैं सौ देश नी पछ़ियाणु पर एक खाड़ी हेरी ज़ो च़कोणी ती होर तेथा पैंधै ज़हाज़ टिकाणै रा विचार केरू।

⁴⁰तैबै तिन्हैं लँगर खोलिया समुन्द्रा न छ़ौड़ै होर तेई बौगतै पतवारै रै रौशै ढीलै केरै होर बागरी सामनै आगलै पाल च़ढ़ाइया कनारै धिराबै च़ौलै।

⁴¹पर दुई समुन्द्रै रै सँगमै री ज़ैगा न पौड़िया तिन्हैं ज़हाज़ टकाऊ होर तेइरा आगला हिस्सा ता टेकी रौही पर पिछ़ला हिस्सा पाणी रै छलाकै लाइया चुटदा लागा।

⁴²तैबै सिपाहियै विचार केरू कि आसा ऐ बन्धुऐ मारनै कि ऐ तारी देइया भैगै नी लोड़ी।

⁴³पर सूबैदारै पौलुसा बै बच़ाणै री इच्छा न ते तिन्हां मारनै न रोकै होर ऐ बोलू, ज़ो तारी देई सका सी तिन्हैं छ़लाँग मारिया कनारै बै निकल़ा।

⁴⁴होर बाकि पौटड़ै पैंधै होर ज़हाज़ै री च़िज़ै रै सहारै निकल़ा। एसा रीतियै सैभै धौरती पैंधै बच़िया निकतै।