Read Pahari, Kullu प्रेरित 28 Bible Online

प्रेरित 28 - Pahari, Kullu bible

प्रेरित 28

¹ज़ैबै आसै बच़िया निकतै ता ज़ाणू कि ऐई टापू बै मिलिते बोला सी,

²होर तिन्हैं जंगली लोकै आसा पैंधै बड़ी दया केरी किबैकि तिन्हैं गाश होंणै री होर ठण्ड होंणै री बजहा न आसाबै औग सुलगाइया आसरा स्वागत केरू।

³ज़ैबै पौलुसै लकड़ी रा गठा खोलिया औगी पैंधै रखू ता औगी रै सेक लागिया एक कीड़ा निकता होर पौलुसै रै हौथा न लपेटुआ।

⁴ज़ैबै तिन्हैं जंगलियै तेइरै हौथा न कीड़ा हेरू ता आपु न ऐ बोलू कि पक्का ऐ मांहणु खूनी सा। समुन्द्रा न ता ऐ बच़ू फिर आसरै देऊऐ सौ ज़िन्दा नी रौहणै धिना।

⁵तैबै पौलुसै सौ कीड़ा झटकै देइया औगी बै शेटू होर तेइरा किछ़ नुकसान नी हुआ।

⁶पर तै लोका इंतज़ार केरदै लागै कि ऐईबै सोजिस ऐणी होर एकदम मौरना पर ज़ैबै ते बोहू देरी तैंईंयैं हेरदै रौहै पर तेइरा किछ़ बी नी बिगड़ू ता होर विचार केरिया बोलू, ऐ ता कोई देऊ सा।

⁷तेसा ज़ैगा रै औरै-पौरै पुबलियुस नाँ रै मांहणु री ज़मीन ती ज़ो कि तेई टापू रा प्रधान ती, तेइयै आसै आपणै घौरा बै नेऐ होर त्रा रोज़ा तैंईंयैं आसरी पाहुणच़ारी केरी।

⁸पुबलियुसा रा बापू बीमार ती होर तेइबै लोहू-पाग लागा ती। पौलुस तेई हागै कमरै बै नौठा होर हौथ रखिया प्रार्थना केरिया सौ ठीक केरू।

⁹ज़ैबै ऐण्ढा हुआ ता तेई टापू रै होरा बीमार मांहणु बी पौलुसा हागै आऐ होर पौलुसै ते ठीक केरै।

¹⁰तिन्हैं आसरा बोहू आदर केरू। ज़ैबै त्रा म्हीनै बाद आसै तौखै न च़लदै लागै ता तिन्हैं आसरी ज़रूरती री चिज़ा ज़हाज़ा न रैखी।

¹¹त्रा म्हीनै बाद आसै सिकन्दरियै शैहरा बै ज़ाणू आल़ै एकी ज़हाज़ा न च़लै। ऐ ज़हाज़ ठण्डा री बजहा न टापू न रूकिरा ती, ऐई ज़हाज़ा रै सामनै एक जुड़वै देऊआ रा नशाण ती, ज़ुणिबै यूनानी भाषा न दियुसकूरी बोला ती।

¹²सुरकूसा शैहरा न लँगर लाइया आसै त्रा रोज़ा तैंईंयैं रौहै।

¹³तौखै न आसै घूमिया रेगियुम नगरा बै आऐ होर एक रोज़ा बाद दक्षिणी बागर च़ली तैबै आसै दुज़ै रोज़ै पुतियुली शैहरा बै आऐ।

¹⁴तौखै आसाबै विश्वासी मिलै होर तिन्हरै बोलणै सैंघै आसै तिन्हरी हागै सौत रोज़ा तैंईंयैं रौहै होर एसा रीतियै आसै रोमा बै च़लै।

¹⁵रोमा न किछ़ विश्वासी आसरा सँदेश शुणिया अप्पियुसै रै चौका न त्रा सराए तैंईंयैं आसा सैंघै मिलदै आऐ। तिन्हां हेरिया पौलुसै परमेश्वरा रा धन्यवाद केरू होर हौंसला रखू।

¹⁶ज़ैबै आसै रोम शैहरा पुजै ता पौलुसा बै तेइरै पौहरै केरनु आल़ै सिपाही सैंघै केल्है रौहणै रा हुक्मा हुआ।

¹⁷त्रा रोज़ा बाद पौलुसै यहूदी रै बड़ै लोका कठा केरै। ज़ैबै ते कठा हुऐ ता पौलुसै तिन्हां बै बोलू, हे भाइयो, मैं आपणै लोका होर बुज़ुर्गा रै रीति-रुआज़ा रै खिलाफ़ किछ़ भी नी केरू, तैबै भी बन्धुआ होईया यरूश्लेम शैहरा न रोमी सरकारा रै हौथा न देऊआ।

¹⁸तिन्हैं हांऊँ जाँच केरिया छ़ौड़णा चाहू किबैकि मूँ न मौऊती रै लायक कोई दोष नी ती ऑथि।

¹⁹पर ज़ैबै यहूदी नेता एथै रै खिलाफ़ बोलदै लागै ता मुँभै महाराज़ै री कसम देणी पौई न कि मूँ आपणै लोका पैंधै कोई दोष लाणा ती।

²⁰ऐबै मैं तुसै शाधै सी कि तुसाबै मिलणू होर गलबात केरनु किबैकि इस्राइलै री आशै री तैंईंयैं हांऊँ शाँगीयै बोनुआ सा।

²¹तिन्हैं तेइबै बोलू, आसै तेरै बारै न यहूदिया देशा रै लोका न कोई चिट्ठी मिली होर न कौसी विश्वासीयै तेरै बारै न एज़िया बुरा बोलू।

²²पर तेरा विचार कि सा, सौ आसै तौ न शुण न चाहा सी किबैकि आसै जाँणा सी कि हर ज़ैगा लोका ऐई मतै रै खिलाफ़ गैला बोला सी।

²³तैबै तिन्हैं यहूदी लोकै ज़ो पौलुसा सैंघै ती, तेइरी तैंईंयैं एक ध्याड़ा रखू होर बोहू लोका तेई कौछ़ै कठा हुऐ होर सौ परमेश्वरै रै राज्य री गुआही देइया, मूसै रा बिधान होर भविष्यवक्तै री कताबा न यीशु रै बारै न समझ़ाई-समझ़ाइया लोका बै दैसदा रौहू।

²⁴पर केतरै लोकै ता तिन्हां लोका पैंधै बशाह केरू पर केतरै लोकै नी केरू।

²⁵बै ते लोका आपु न एक मत नी हुऐ ता पौलुसै री एसा गैला बोलणै सैंघै तौखै न भैगै कि, पवित्र आत्मै यशायाह भविष्यवक्तै रै ज़रियै तुसरै बुज़ुर्गा बै ठीक बोलू,

²⁶कि ज़ाइआ इन्हां लोका बै बोल, कि तुसा शुणदै ता रौहणा पर समझ़णा नी, तुसा हेरदै ता रौहणा पर बुझ़णा नी,

²⁷किबैकि इन्हां लोका रा मन मोटा होर कोन भारी हुऐ सी। तिन्हैं आपणी औछ़ी बन्द केरी सी ऐण्ढा नी लोड़ी हुआ कि ते औछियै हेरलै होर कोनै शुणलै होर मना सैंघै समझ़िया पापा न फिरलै होर हांऊँ तिन्हां बै ठीक केरनु।

²⁸तैबै तुसै जाँणा कि परमेश्वरै रै उद्धारै री कथा होरी ज़ाति रै लोका हागै भेज़िआ सा होर तिन्हां ग्रहण केरना।

²⁹ज़ैबै पौलुसै ऐ बोलू ता यहूदी आपु न वहस केरदै लागै होर तौखै न भैगै,

³⁰होर सौ पूरी दूई बौर्षा तैंईंयैं आपणै किराऐ रै घौरा न रौहू।

³¹ज़ो तेई आगै एज़ा ती सौ तिन्हां सैंघै मिलदा रौहू होर बड़ै निडर होईया परमेश्वरै रै राज्य रा प्रचार केरदा होर प्रभु यीशु मसीह री गैला सिखाँदा रौहू।