Read Pahari, Kullu प्रेरित 4 Bible Online

प्रेरित 4 - Pahari, Kullu bible

प्रेरित 4

¹ज़ैबै ते लोका बै बोलदै लागै ती ता पुरोहिते, मन्दिरै रै पौहरैदार होर सदूकी लोका तौखै आऐ।

²ते झ़िकुऐ ती किबैकि यीशु रै च़ेले लोका बै सिखा ती होर उदाहरण देइया यीशु रै मूँऐंदै न ज़िन्दै होंणै रा प्रचार केरा ती।

³तिन्हैं ते ढौकिआ दूई रोज़ा ढौई हवालाता न रखै किबैकि सौंझ़ हुई ती।

⁴पर ज़ेतरै लोकै प्रभु रा प्रचार शुणू तिन्हां न बोहू सारै लोकै यीशु पैंधै बशाह केरू। तिन्हरी गिणती पौंज़ हज़ार मर्दै रै लगभग हुई।

⁵दुज़ै ध्याड़ी तिन्हां ढौकणु आल़ै मुख्य, स्याणै, शास्त्री,

⁶महापुरोहित हन्ना होर कैफा होर यूहन्ना, सिकन्दर ज़ेतरै महापुरोहितै रै खानदाना रै ती ते सारै यरूश्लेम शैहरा न कठा हुऐ।

⁷ते तिन्हां बै बिच़ा न खड़ै केरिआ पुछ़दै लागै, “तुसै ऐ कोम कुणी शक्ति सैंघै होर कौस अधिकारा सैंघै ठीक केरू?”

⁸तैबै पतरसै पवित्र आत्मा न भौरूइया तिन्हां बै बोलू,

⁹“ओ लोका रै प्रधानो होर पराणै बजुर्गो ऐई कमज़ोर मांहणु सैंघै ज़ो भलाई हुई सा अगर औज़ आसा न तेई रै बारै न पुछ़ताछ केरा सी कि सौ कैण्ढै ठीक हुआ।

¹⁰तुसै सारै होर सारै इस्राइली लोका जाँणा सी कि ज़ो यीशु नासरी तुसै क्रूसा पैंधै च़ढ़ाऊ होर परमेश्वरै सौ मूँऐंदै न ज़िन्दा केरू, ऐ मांहणु तेही यीशु मसीह नासरी रै नाँ न भला चँगा हुआ।

¹¹“ऐ सौहै नासरत ग्राँ रा यीशु सा ज़ुणिरै बारै न पवित्र शास्त्रा न पैहलै न लेइया लिखू सा कि “ ‘ज़ो पात्थर तुसै राज़मिस्त्रिऐ निक्कमा बुझ़ू, होर सौहै कुणै रा पात्थर बैणू।’

¹²होर यीशु रै अलावा कौसी दुज़ै रै नाँ न मुक्ति नी ऑथि किबैकि सारै दुनिया रै मांहणु बै कोई होर नाँ नी धिना ज़ौसरै नाँ न आसै मुक्ति पाई सका सी।”

¹³ज़ैबै तिन्हैं पतरस होर यूहन्ना रा हौंसला हेरू होर ज़ाणू कि एथा नपौढ़ होर सीधै माणू सी ता ते हैरान हुऐ। तैबै तिन्हैं ते पछ़ियाणै कि ऐ यीशु सैंघै रौहै सी।

¹⁴ज़ो मांहणु ठीक होईया पतरस होर यूहन्ना सैंघै खड़ा ती, तेई हेरिआ मुख्य, स्याणै, शास्त्री तिन्हरै खिलाफ़ किछ़ नी बोली सकै।

¹⁵पर तिन्हैं तिन्हां बै सभा न बाहरै ज़ाणै रा हुक्म केरू होर आपु न वचार केरदै लागै,

¹⁶“कि आसा इन्हां मांहणु सैंघै कि केरना?” किबैकि “इन्हैं ज़ो चमत्कार केरू सौ यरूश्लेम शैहरा न रौहणु आल़ै सैभी लोका सामनै प्रगट सा होर आसै तेथा रा नाँह नी केरी सकदै।

¹⁷पर ऐ गैल लोका न बोहू नी लोड़ी फैली, आसा ते धमकाणै कि ते ऐई नाँ न दुज़ी घेरै कौसी मांहणु सैंघै गैल नी केरलै।”

¹⁸यहूदी धर्म गुरुऐ पतरस होर यूहन्ना आँध्रै शाधै होर तिन्हां बै कड़ै हुक्मा देइआ ऐ बोलू, कि तुसै यीशु रै बारै, ऐबै न लेइया किछ़ हेरित् बोलदै होर सिखाँदै।

¹⁹पर पतरस होर यूहन्नै तिन्हां बै ज़वाब धिना, कि “तुसै फैसला केरा कि ऐ परमेश्वरा सामनै भला सा कि आसै परमेश्वरै री गैला न ज़ादा तुसरी गैला बै मनला।

²⁰किबैकि ऐ ता आसरै होई नी सकदा कि ज़ो आसै हेरू होर शुणू तेइबै नी बोललै।”

²¹तैबै तिन्हैं ते होर बी ज़ादा धमकाइआ छ़ौड़ै किबैकि लोकै री बजहा न तिन्हां बै सज़ा देणै री कोई बजहा नी मिली किबैकि ज़ो घटना न हुई ती तेसरी बजहा न सैभै लोका परमेश्वरै री महिमा केरा ती।

²²किबैकि सौ मांहणु ज़ुणी पैंधै ऐ चमत्कार हुआ ती सौ च़ाल़ी बौर्षा न बी ज़ादा उम्रा रा ती।

²³ते छ़ुटिआ आपणै सैंघी हागै आऐ होर ज़ो किछ़ मुख्यपुरोहिते होर स्याणै बोलू ती तिन्हां बै दैसू।

²⁴ऐ शुणिआ तिन्हैं एक मन होईया ज़ोरा न परमेश्वरा सैंघै प्रार्थना केरी, हे प्रभु, तू सौऐ सा ज़ुणियै स्वर्ग, धौरती, समुन्द्र होर ज़ो किछ़ इन्हां न सा तेथा बै बनाणु आल़ा तूहै सा।

²⁵तैं पवित्र आत्मै रै ज़रियै आपणै सेवक आसरै बुज़ुर्ग दाऊदै रै मूँहा न बोलू, “ ‘होरी ज़ातियै हुल्लड़ किबै मचाऊ, होर देशै रै लोकै बेकारै री गैला किबै सोच़ी?

²⁶प्रभु होर तेइरै मसीह रै खिलाफ़ धौरती रै राज़ै खड़ै हुऐ होर हाकिम कठा हुऐ।’

²⁷किबैकि सैच़िऐ तेरै सेवक यीशु रै खिलाफ़ ज़ौसरा अभिषेक तैं केरू, हेरोदेस, पुन्तियुस पिलातुस बी होरी ज़ाति होर इस्राइली सैंघै ऐई नगरा न कठा हुऐ।

²⁸ताकि ज़ो किछ़ तेरी शक्ति होर बुद्धिमानी सैंघै पैहलै न ठहराऊ सा ते तेइबै केरलै।

²⁹ऐबै हे प्रभु तिन्हरी धमकी बै शुण; होर आपणै भक्ता बै वरदान दै कि ते तेरा वचन बड़ै हौंसलै सैंघै शुणालै,

³⁰होर लोका बै ठीक केरनै री तैंईंयैं आसाबै शक्ति दै कि आसै नशाणी चमत्कार होर नौखै कोम तेरै पवित्र सेवक यीशु रै नाँ न केरी सकलै।

³¹“ज़ैबै तिन्हैं प्रार्थना केरी ता ज़ौखै ते बेठै ती सौ ज़ैगा हिली होर ते पवित्र आत्मा न भौरूऐ होर ते परमेश्वरा रा वचन बड़ै हौंसलै सैंघै शुणादै लागै।

³²“यहूदी च़ेले विश्वास केरनु आल़ै री मण्डली एक मन होर एक आत्मा न ती। तिन्हां न कोई बी आपणी सम्पति बै आपणी नी ती बोलदा बल्कि तिन्हरा सैभ किछ़ साँझै रा ती।

³³ते प्रेरित लोका बड़ी शक्ति सैंघै प्रभु यीशु रै मूँऐंदै न ज़िन्दै होंणै री गुआही देंदै रौहै होर तिन्हां सैभी पैंधै प्रभु रा बड़ा अनुग्रह ती।

³⁴तिन्हां न कोई बी बिश्वासी गरीब नी ती ऑथि किबैकि ज़ुणी हागै बी आपणै घौर-बार ती ते तिन्हां बै बेच़ा ती तेथै री कीमत तिन्हां च़ेले हागै आंणिआ रखा ती।

³⁵होर च़ेले ज़ुणी री ज़ैण्ढी ज़रूरत होआ ती ते हर एकी बै बोंडा ती। ऐण्ढी तैरहै तिन्हरी ज़िन्दगी री जरूरत पूरी होआ ती।

³⁶“यूसुफ नाँ रा एक साइप्रसा टापू रा एक लेवी ती ज़ौसरा नाँ तिन्हैं प्रेरितै बरनबास मतलब यहूदी भाषा न ऐई नाँ रा मतलब हिम्मत देणु आल़ा मांहणु रखू ती।

³⁷तेइरी किछ़ ज़मीन ती ज़ो तेइयै बेच़ी होर तेथै रै ढैबुऐ आंणिआ प्रेरिता बै धिनै।