Read Pahari, Kullu प्रेरित 6 Bible Online

प्रेरित 6 - Pahari, Kullu bible

प्रेरित 6

¹तिन्हां ध्याड़ै न ज़ैबै च़ेले बोहू होंदै लागै ता यूनानी भाषा बोलणू आल़ै च़ेले इब्रानी भाषा बोलनु आल़ै च़ेले पैंधै कुड़कुड़ांदै लागै कि हर रोज़ै री सेविकाई न आसरी विधवै री कोई सुधि नी लेंदा।

²तैबै तिन्हैं बारा प्रेरितै बिश्वासी री मण्डली आपु हागै शाधी होर बोलू, “ऐ ठीक नी ऑथि कि आसै परमेश्वरा रा वचन छ़ौड़िआ खयाणै-प्याणै री सेवा न रौहलै।

³ऐबै हे भाइयो बैहणियो, आपु न सौत ऐण्ढै मर्दा बै चुना ज़ो पवित्र आत्मा होर बुद्धि न सिद्ध होलै ताकि आसै तिन्हां बै ऐई कोमा पैंधै रखलै कि ते विधवा रा ख्याल रखलै।

⁴पर आसा ता प्रार्थना होर वचना रै प्रचार होर उपदेश देणै न लागी रौहणा।”

⁵ऐ गैल सारी मण्डली बै शोभली लागी होर तिन्हैं स्तिफनुस नाँ रा एक मर्द ज़ो कि विश्वास होर पवित्र आत्मा न भौरुआ ती, फिलिप्पुस, प्रखुरूस, नीकानोर, तीमोन, परमिनास होर अन्ताकिया शैहरा न रौहणु आल़ा नीकुलाउस ज़ो यहूदी बैणू ती चुनै,

⁶होर तिन्हां बै ते प्रेरिता सामनै आंणै होर तिन्हां पैंधै हौथ रखिआ तिन्हरी तैंईंयैं प्रार्थना केरी।

⁷परमेश्वरा रा वचन फैलदा रौहू होर यरूश्लेम शैहरा न च़ेले री गिणती बढ़दी रौही होर यहूदी पुरोहिता रा एक बड़ै समाजै बी यीशु मसीह रै बशाह रै ऐई सन्देशा बै ग्रहण केरू।

⁸स्तिफनुस परमेश्वरै रै अनुग्रह होर शक्ति सैंघै लोकै रै बिच़ा न बड़ै नौखै कोम होर चिन्ह चमत्कार रिहा ती।

⁹तैबै तेसा रै आराधनालय न कुरेनी होर, सिकन्दरिया शैहरा रै किलिकिया होर आसिया प्रदेशा रै कई लोका उठिया स्तिफनुसा सैंघै वहस केरदै लागै।

¹⁰पर तेई ज्ञान होर आत्मा रा ते लोका सामना नी केरी सकै।

¹¹पर तिन्हैं कई लोका भड़काए होर ते बोलदै लागै, कि आसै ऐ मूसा होर परमेश्वरै रै खिलाफ़ निन्दा री गैला केरदा शुणू सा।

¹²होर तिन्हैं लोका, तिन्हरै स्याणै होर शास्त्री भड़काइआ सौ ढौकिआ महासभा बै आंणु।

¹³तिन्हैं झ़ूठै गुआह खड़ै केरै होर तिन्हैं बोलू कि “ऐ मांहणु एसा पवित्र ज़ैगा रै बारै न होर मूसै री बिधाना री निन्दा केरना नी छ़ौड़दा।

¹⁴किबैकि आसै ऐण्ढा बोलदा शुणू कि यीशु नासरी ऐ मन्दिर ढाणा होर ते रीति बदलणी ज़ो मूसै आसा बा धिनी सी।”

¹⁵तैबै सभा न बेठैंदै सैभी लोकै तेइरा मुँह स्वर्गदूता सांही च़मकदा हेरू।