Read Pahari, Kullu रोमियो 10 Bible Online

रोमियो 10 - Pahari, Kullu bible

रोमियो 10

¹ओ भाइयो बैहणियो, मेरै मनै री ऐ इच्छा होर मेरै आपणै लोक यहूदी री तैंईंयैं मेरी परमेश्वरा न ऐ प्रार्थना सा, कि परमेश्वर तिन्हां बै बच़ाऐ।

²किबैकि हांऊँ तिन्हैं री गुआही देआ सा, कि तै परमेश्वरा री धुना न रौहा सी, पर परमेश्वरा री सेवा केरनै री तिन्हरी समझ सही नैंई सा।

³किबैकि तै परमेश्वरा री धार्मिकता न नज़ाण होईया, होर तै आपणै तरीकै न धर्मी बणनै री कोशिश केरा केरिया, परमेश्वरा री धार्मिकता रै अधीन नैंई हुऐ।

⁴किबैकि मसीहै पैहलै न सौ मकसद पूरा केरू सा, ज़ुणी री तैंईंयैं बिधान धिना ती, नतीज़ै रै मुताबक ज़ो लोका तेई पैंधै बशाह केरा सी तै परमेश्वरा सैंघै धर्मी ठहराईया सी।

⁵किबैकि मूसै रै बिधाना न धर्मी ठहराणै रै बारै न ऐ लिखा सा, कि ज़ुण मांहणु तेसा धार्मिकता पैंधै चला सा, तेई ऐसा बजहा न ज़िन्दै रोहणा।

⁶पर बशाह न धर्मी ठहराणा, शास्त्र ऐ बोला सा, “कि तू आपणै मना न ऐण्ढा हेरी बोलदा कि स्वर्गा पैंधै कुणी चढ़ना?” (मतलब कि मसीह बै भ्याँऊ आंणनै री तैंईंयैं।)

⁷या “नरका रै कुण्डा न कुणी जाँणा?” (मतलव मसीह बै मूँएंदै न ज़िन्दा केरिया झाँऊ आंणनै री तैंईंयैं।)

⁸पर ज़ो ऐ बोला सा, “ऐ सा कि वचन तेरै नेड़े सा तेरै मुँहा न होर तेरै शरीरा न सा” ऐ सोऐ बशाह रा वचन सा, ज़ुण आसै प्रचार केरा सी।

⁹कि अगर तू आपणै मुँहा न यीशु बै प्रभु मनिया लोका रै सामनै स्वीकार केरा सा, होर आपणै मना न बशाह केरला, कि परमेश्वरै सौ मूँएंदै न ज़िन्दा केरू सा, ता तो पक्का मुक्ति पाणी,

¹⁰किबैकि आसै आपणै दिला न बशाह केरा सी, होर तैबै आसै परमेश्वरा रै ज़रियै धर्मी ठहराईया सी। होर आसै आपणै मुँहा रा इस्तेमाल ऐ बोलणै री तैंईंयैं केरा सी कि आसै बशाह केरा सी, होर तैबै आसै बच़ाइया सा।

¹¹किबैकि यशायाहे शास्त्रा न मसीह रै बारै न लिखू सा, “कि ज़ो कोई तेई पैंधै बशाह केरला तेई कैधी निराश नी होंणा।”

¹²यहूदी होर यूनानी न कोई फर्क नैंई ऑथि, तैबै कि परमेश्वर सैभी रा प्रभु सा, होर आपणै सैभी मज़ती री तैंईंयैं शाधणु आल़ै री तैंईंयैं उद्धार सा।

¹³किबैकि ऐ लिखू सा “परमेश्वरै हर कोई बच़ाणै ज़ुण तेइबै मज़त केरनै री तैंईंयैं शाधा सा।”

¹⁴पर मसीह पैंधै लोका बशाह नैंई केरदै, तिन्हां सौ मज़ती री तैंईंयैं कैण्ढै शाधणा? होर ज़ुणिरै बारै न नैंई शुणु तेई पैंधै बशाह किबै केरना? होर प्रचार केरनु आल़ा नैंई ऑथि ता कैण्ढै शुणना?

¹⁵होर अगर नी भेजले, ता प्रचार कैण्ढै केरना? ज़ैण्ढा शास्त्रा न लिखू सा, कि तिन्हरी ज़ोंघा कैण्ढी बाँकी सा, ज़ुण खुशी रा समाद आंणा सी।

¹⁶आसरै खुशी रै समादा पैंधै सैभी लोकै बशाह नैंई केरू, ज़ैण्ढा कि यशायाह भविष्यवाणी केरनु आल़ा बोला सा, “ओ प्रभु, कुणिऐ आसरी गैला पैंधै बशाह केरू सा?”

¹⁷तैबै बशाह सन्देश शुणनै न, होर शुणना मसीह रै वचना न होआ सा।

¹⁸पर हांऊँ पूछा सा, “कि यहूदियै मसीह रै बारै न नैंई शुणु?” हाँ, शुणु ता ठीक किबैकि शास्त्रा न लिखुदा सा, “तिन्हरै वचन सारी धौरती पैंधै, होर तिन्हरै वचन दुनिया रै कुणै तैंईंयैं पूज़ै सी।”

¹⁹फिरी हांऊँ तुसाबै ऐ पूछा सा, कि इस्राइली लोका बै पता नी ती ऑथि? पैहलै ता प्रभुऐ मूसा रै ज़रियै ऐ बोलू ती, “मूँ इन्हां री बजहा न ज़ुण ज़ाति नैंई ऑथि, तुसा रै मना न जलन पैदा केरनी, होर एकी मूर्ख होरी ज़ाति रै ज़रियै तुसाबै झ़िक दिलाणी।”

²⁰फिरी यशायाह बड़ी हिम्मता सैंघै बोला सा कि परमेश्वरै बोलू, “ज़ुण मुँभै नी तोपदै, तिन्हैं हांऊँ पाऊ, ज़ुण मुँभै पुछदे बी नी ती, हांऊँ तिन्हां पैंधै प्रगट हुआ।”

²¹पर इस्राइली लोका रै बारै न परमेश्वर ऐ बोला सा, “कि हांऊँ पूरी ध्याड़ हुक्म नी मनणु होर आपु न वाद विबाद केरनु आल़ै लोका हागै हौथ फेलाईया खड़ा रौहू।”