Read Pahari, Kullu रोमियो 11 Bible Online

रोमियो 11 - Pahari, Kullu bible

रोमियो 11

¹तैबै ता हांऊँ पूछा सा, परमेश्वरै कि आपणै लौका छ़ौड़ै सी? कैधी भी नैंई, हांऊँ भी ता इस्राइली सा अब्राहमै रै खानदाना रा होर विन्यामिने रै गोत्रा न सा।

²परमेश्वरै आपणै ते लौका नैंई छ़ौड़ै सी, ज़ुण तेइयै पैहलै न चुनै सी, तुसाबै कि पता नी ऑथि, कि पवित्र शास्त्र भविष्यवाणी केरनु आल़ा एलिय्याह रै बारै न बोला सा; कि सौ इस्राइली लोका रै बरखलाप परमेश्वरा न प्रार्थना केरा ती।

³कि “ओ प्रभु, तिन्हैं तेरै भविष्यवक्ता मकाऐ सी, होर तेरी वेदी नाश केरी, होर हांऊँ केल्हा मांहणु बच़ू सा ज़ो तौ पैंधै बशाह केरा सा, होर तै मेरै प्राणा बै लेणा चाहा सी।”

⁴पर परमेश्वरै एलिय्याह बै बोलू कि, “मैं आपणै तैंईंयैं सौत हज़ार मर्द रखे सी ज़ुणियै बाल देऊ री मूर्ति सामनै घुटनै नैंई टेके सी।”

⁵होर ऐण्ढी तैरहै ऐई बौगतै बी, परमेश्वरै रै अनुग्रह री बजहा न इन्हां यहूदी रा एक होछ़ा ज़ेही हिस्सा सा ज़ुणिबै परमेश्वरै आपणै सच़ै लोका रै रूपा न चुनु सा।

⁶अगर ऐ अनुग्रह न हुआदा सा, ता फिरी कर्मा न नैंई, नैंई ता अनुग्रह फिरी अनुग्रह नैंई रौहू।

⁷फिरी कि निचौड़ निकता? ऐ कि इस्राइली परमेश्वरा रै अनुग्रह बै तोपदै लागै सी, सौ तिन्हां बै नैंई मिलु, पर चुनैदै बै मिलु, होर बाकि लौका रै दिल कठोर केरै।

⁸ज़ैण्ढा कि शास्त्रा न लिखू सा, “परमेश्वरै तिन्हां बै औज़के रोज़ा तैंईंयैं बेवकूफ दिमाग धिना सा, होर ऐण्ढी होछ़ी धिनी कि किछ़ नी लोड़ी हेरुआ होर ऐण्ढै कोन कि किछ़ नी लोड़ी शुणुआ।”

⁹होर राजा दाऊद बोला सा, “एक पक्षी सांही ज़ो एक जाला न ढौकिया सा, या एक जानवर ज़ो खाच़ा न पौड़ा सा तैण्ढै ही तै च़ानक आपणै भोजा न ढौकै लोड़ी ताकि तिन्हां बै सही तरीकै न सज़ा मिली लोड़ी।

¹⁰होर तिन्हरी औछ़ी निहारी लोड़ी हुई ताकि किछ़ नी लोड़ी हेरुआ, होर तू हमेशा तिन्हरी परेशानी न झुकाईया रख।”

¹¹ता हांऊँ पूछा सा, “कि यहूदी ठोकर लागणै री बजहा न हमेशा री तैंईंयैं झोड़ीया पौड़ै?” कैधी भी नैंई, पर तिन्हां रै अविश्वासा री बजहा न होरी ज़ाति बै उद्धार मिलु, ताकि इस्राइली लोका बै जलन लोड़ी हुई।

¹²ऐबै अगर यहूदी रा अविश्वासी होरी ज़ाति री तैंईंयैं बड़ै आशीर्वाद होर तिन्हरा वापस ऐणा होरी ज़ाति रै तैंईंयैं फायदै री बजहा हुई, ता अगर ऐण्ढा होला ता केतरा फायदा होंणा।

¹³हांऊँ तुसा होरी ज़ाति बै बोला सा, ज़ैबैकि हांऊँ होरी ज़ाति री तैंईंयैं प्रेरित सा, ता हांऊँ आपणी सराउथी केरा सा।

¹⁴ताकि कोई बी रीति न मूँ आपणै लोका न जलन पैदा केरिया तिन्हां मौंझ़ै कई एकी रा उद्धार कराणू।

¹⁵किबैकि ज़ैबै कि यहूदी लोका रा छ़ौड़णा दुनिया रै लोका रा मिलापा री बजहा हुआ, ता कि मसीह रा ग्रहण केरना मूँएंदै न ज़िन्दा होंणै रै बराबर नी होंणा?

¹⁶ज़ैबै भेंटा रा पैहला पेड़ा पवित्र ठहरु, तैबै पूरा मुछुआंदा पीठा भी पवित्र सा, होर ज़ैबै जड़ पवित्र ठहरी, ता शांणी भी तैण्ढी होंणा।

¹⁷यहूदी लोका जैतूना रै बूटै री शांणी सांही सी होर पिता अब्राहम इसहाक होर याकूब तेई बुटै रै जलाड़ै सांही सी। तुसै होरी जाति जैतूना रै बुटै री शांणी सी।

¹⁸तैबै तिन्हां शांणी पैंधै ज़ो काटूईदी ती घमण्ड नी केरना, होर अगर तू घमण्ड केरला, ता जाणिया रख, कि तू जड़ाह बै नैंई पर जड़ तौभै सम्भाला सा।

¹⁹फिरी तो बोलणा, “परमेश्वरै यहूदी बै एक बूटै न चोड़ीदी शांणी सांही नाँह केरू ताकि सौ तुसा होरी जाति बै स्वीकार केरी सकलै ज़ो कलम केरीदी शांणी सांही सा।”

²⁰ऐ सच़ सा, सौ ता तिन्हां रै अविश्वासा री बजहा न चोड़ी ती, पर तू ता बशाह रखा सा, तैबै घमण्ड मत केरदा, पर परमेश्वरा न डौर,

²¹किबैकि ज़ैबै परमेश्वरै असली शांणी पैंधै दया नैंई केरी, ता तेई तुसा पैंधै बी दया नैंई केरनी अगर तुसै बशाह नैंई केरलै।

²²तैबै परमेश्वरै री दया होर सख्ती पैंधै ध्यान देआ, ज़ुण झौड़िया पोऐ, तिन्हां पैंधै सख्ती, पर तौ पैंधै दया, अगर तू तेइरी दया न बणीया रौहू, नैंई ता तू बी काटिया शेटणा।

²³होर अगर यहूदी रै लोका बी बशाह केरलै, ता तै जोड़नै किबैकि परमेश्वर तिन्हां बै फिरी ज़ोड़ी सका सा।

²⁴किबैकि अगर तू तेई जैतूना न, ज़ुण स्वभाव न जंगली सा, काटिया होर स्वभाव रै बरखलाप शोभले ज़ैतूना न कलम केरिया लाऊ, ता ज़ुण ऐ स्वभाविक डाल़ी सी, आपणै तेई ज़ैतूना न कलम किबै नी केरिनी।

²⁵ओ भाइयो, बैहणियो, कोइँछ़ै ऐण्ढा नी लोड़ी हुआ कि तुसै आपणै आपा बै बड़ै बुद्धिमान समझ़लै, तैबै ता हांऊँ नी च़ाँहदा कि तुसै ऐई भेदा न नज़ाण रौहा, कि ज़ैबै तैंईंयैं होरी ज़ाति पूरै तरीकै न मसीह न नैंई ऐली, तैबै तैंईंयैं इस्राइली रा एक हिस्सा ऐण्ढाऐ कठोर रौहणा।

²⁶होर ऐण्ढी तैरहै सारै इस्राइली लोका मुक्ति पाणी, ज़ैण्ढा शास्त्रा न लिखू सा, “कि बचाणु आल़ै सिय्योना न ऐणा, होर अभक्ति केरनु आल़ै याकूबा रै खानदाना न दूर केरनै।

²⁷होर तिन्हां सैंघै मेरा ऐ वायदा होंणा कि ज़ैबै मूँ तिन्हां रै पाप माफ़ केरनै।”

²⁸यहूदी परमेश्वरा रै बैरी सी किबैकि तै खुशी रै समादा पैंधै बशाह नैंई केरना च़ाँहदै. होर ऐ तुसरा फायदा बणु सा। पर परमेश्वर तिन्हां बै झ़ुरी केरा सा किबैकि तेइयै तै आपणी तैंईंयैं चुनै सी। ऐ सा ज़ो तिन्हैं तिन्हरै बुज़ुर्गा सैंघै वायदा केरू ती।

²⁹किबैकि परमेश्वर आपणै वरदान होर बुलाहटा न कैधी भी पिछ़ै नैंई होन्दा।

³⁰किबैकि तुसै पैहलै परमेश्वरा रा हुक्म नैंई मैनू, पर ऐबै यहूदी लोका रै हुक्म नी मनणै री बजहा न तुसा पैंधै दया हुई।

³¹तैण्ढै तिन्हैं भी ऐबै हुक्म नी मनू कि ज़ुण दया तुसा पैंधै हुई सा, तिन्हां पैंधै भी सोऐ दया हुई लोड़ी।

³²सैभी लोकै परमेश्वरा रा हुक्म नैंई मनू, होर ऐ बजहा सा कि सौ तिन्हां सैंघै कैदी सांही बर्ताव केरा सी। पर सौ ऐण्ढा तैबै केरा सा ताकि सौ तिन्हां पैंधै दया केरी सकलै।

³³ओहो, परमेश्वरा रा धन, बुद्धि, होर ज्ञान केतरै गैहरे सी, तेई रै विचार केतरै गैहरे होर, तेइरी बौता कैण्ढी सीधी सी।

³⁴“प्रभु रा विचार कुणिऐ जाणु सा? या कुण तेइरा सलाहकार बणु?

³⁵या कुणिऐ पैहलै परमेश्वरा बै किछ़ धिना, कि तेइरै बदले तेइबै किछ़ मिलणा।”

³⁶किबैकि परमेश्वरा री तरफा न होर तेइरी बजहा न, होर तेइरी तैंईंयैं सैभ किछ़ सा, तेइरी महिमा ज़ुग-ज़ुग हुई लोड़ी; आमीन।