Read Pahari, Kullu रोमियो 12 Bible Online

रोमियो 12 - Pahari, Kullu bible

रोमियो 12

¹तैबै ओ भाइयो बैहणियो, हांऊँ तुसाबै परमेश्वरा री दया याद कराईया तुसा न अर्ज़ा केरा सा, कि आपणै शरीरा बै ज़िन्दा, होर पवित्र, होर ज़ुण परमेश्वरा बै शोभला लागा सा बलिदान केरिया चढ़ात्; ऐ तुसरा परमेश्वरा री सेवा केरनै रा सही तरीका सा।

²होर ऐई दुनिया रै लोका सांही मता बणदै, पर तेसरी बुद्धि रै नोंऊँऐं होंणै री बजहा न तुसरा चाल-चलन भी बदलुआ लोड़ी, ज़ुणी बजहा न तुसा परमेश्वरै री भली होर शोभली होर सिद्ध इच्छा न पता लांदै रौहा।

³किबैकि हांऊँ तेई अनुग्रह न ज़ुण मूँ पैंधै हुआ सा, तुसा सैभी बै बोला सा, कि ज़ैण्ढा समझे लोड़ी एथा न ज़ादा कोई आपणै आपा बै ज़ादा मता समझदे पर ज़ैण्ढा हर कोई बै परमेश्वरै तिन्हरै बशाह रै नतीज़ै मुताबक बौंडू सा, तैण्ढाऐ शोभली बुद्धि रै मुताबक आपणै-आपा बै समझा।

⁴किबैकि ज़ैण्ढै आसरै एकी शरीरा न बोहू औंगा सी, होर सैभी औंगा रा एक ज़ेही कोम नी ऑथि।

⁵तैण्ढै आसै ज़ुण मसीह न बशाह रखा सी, आसै तेइरै शरीरा सांही बणै सी, होर आसै ऐईरै हिस्से सी होर आसै सैभ एकी दुज़ै रै सी।

⁶होर ज़ैबै कि तेई अनुग्रह रै मुताबक ज़ुण परमेश्वरै आसाबै धिना सा, आसाबै अलग-अलग वरदान मिलै सी। ता ज़ुणिबै भविष्यवाणी रा वरदान मिलु सा, तेइबै तिन्हां शब्दा बै बोलणा चेहिऐ ज़ो सौ ऐ बशाह केरा सा कि तै परमेश्वरै बोलै सी।

⁷अगर दुज़ै री सेवा केरनै रा वरदान मिलु सा, ता सेवा केरनै न लागी रौहला, होर कोई सिखाणु आल़ा सा ता सिखाणै न लागी रौहला।

⁸ज़ुण उपदेशक सा, सौ उपदेश देणै न लागी रौहला, दान देणु आल़ा खुलै दिला सैंघै दै, ज़ुण अगुवाई केरा सा, जोशा सैंघै केरला, होर ज़ुण दया केरा सा सौ खुशी सैंघै केरला।

⁹झ़ुरी न कोई कपट नी लोड़ी, बुराई न नफरत केरा, भलाई केरनै न लागी रौहा।

¹⁰एकी दुज़ै सैंघै परिवारा सांही झ़ुरी रखा, आपु न इज्ज़त केरनै न एकी दुज़ै न आगै होआ।

¹¹कड़ी मेहनत केरा होर आलसी मता बणदै, पूरै दिला न प्रभु यीशु री सेवा केरदै रौहा।

¹²तुसा हागै ज़ो आश सा तेथा न तुसाबै खुशी मनाणी चेहिऐ, क्लेशा न धीरज रखा, होर हमेशा प्रार्थना न लागी रौहा।

¹³पवित्र लौका बै ज़ुणी च़ीज़ै री जरूरत सा, तिन्हैं री मज़त केरा, पाहुणच़ारै केरनै न लागी रौहा।

¹⁴आपणै दुःख देणु आल़ै बै आशीष देआ, तिन्हां बै आशीष देआ श्राप मता देंदै।

¹⁵खुशी मनाणु आल़ै सैंघै खुशी मनात्, रोणु आल़ै सैंघै रोआ।

¹⁶आपु न बराबरी रा बिचार रैखा; घमण्डी मता बणा; पर आम लोका सैंघै संगती रखा; आपणी नज़री न बुद्धिमान बणा।

¹⁷बुराई रै बदले बुराई मता केरदै, ज़ुण गैला सैभी लौका रै सामनै शोभली सा, तिन्हां गैला री फिक्र केरा।

¹⁸ज़ौखै तेंई होई सका सा, तुसै आपणी तरफा न सैभ मांहणु सैंघै मेल-ज़ोल रखा।

¹⁹ओ प्यारै भाई बैहणियो, आपणा बदला मता लेंदे, पर परमेश्वरा बै तुसरी तैंईंयैं बदला लेणै देआ, किबैकि शास्त्रा न लिखू सा, “बदला लेणा मेरा कोम सा, प्रभु बोला सा मूँ ही बदला लेणा।”

²⁰पर अगर तेरा दुश्मन भूखा सा, ता तेइबै रोटी खय्या, होर अगर प्यासा, ता तेइबै पाणी पय्या, किबैकि ऐण्ढी तैरहा तौ सौ शर्मिंदा केरना।

²¹बुराई न हार मता मनदै पर बुराई बै भलाई केरिया ज़ीता।