Read Pahari, Kullu रोमियो 13 Bible Online

रोमियो 13 - Pahari, Kullu bible

रोमियो 13

¹हर मांहणु आपणै प्रधान अधिकारी रै अधीन रौहा, किबैकि कोई भी अधिकार ऐण्ढा नैंई ऑथि ज़ो परमेश्वरा री धिरै न नैंई ऑथि, होर ज़ुण अधिकार सी, तै परमेश्वरा रै ही ठहराऐदै सी।

²तैबै कोई बी मांहणु ज़ो तिन्हां लोका रा पालन केरनै रा नाँ केरा सा ज़ुणी हागै अधिकार केरनै री शक्ति सा, सौ परमेश्वरा रै बिधि रा बरोध केरा सा, होर बिरोध केरनु आल़ै बै सज़ा मिलणी।

³किबैकि अगर कोई शोभलै कोम केरा सा, ता तेइबै अधिकारी न नैंई डौरना। लेकिन अगर सौ बुरै कोम केरा सा, ता सौ डौरू लोड़ी; कि तू अधिकारी न निडर रौहणा चाहा सा, ता शोभला कोम केर, तिन्हरी तरफा न तेरी सराउथी होंणी।

⁴किबैकि सौ तेरी भलाई री तैंईंयैं परमेश्वरा रा सेवक सा। पर अगर तू बुराई केरा सा ता डौर; किबैकि अधिकारी हागै तुसाबै सज़ा देणै री तैंईंयैं शक्ति सा होर तै परमेश्वरा रै सेवक सी होर बुराई केरनु आल़ै पैंधै परमेश्वर सज़ा दैआ सी।

⁵तैबै तुसाबै न सिर्फ़ सज़ा न बचणै री तैंईंयैं, बल्कि एक स्पष्ट विचार रखणै री तैंईंयैं बी तुसाबै तिन्हरै अधीन रौहणा चेहिऐ।

⁶तैबै ता च़ुँगी (लगान) देआ, किबैकि सौ परमेश्वरा रै सेवक सी, होर हमेशा ऐई कोमा न लागी रौहा सी।

⁷तैबै ज़ो सरकार माँग केरा सा तेइरा भुगतान केरा, सैभी अधिकारी री पूरी तैरहा इज्ज़त केरा।

⁸आपु न झ़ुरी डाहत् होर कोई गैला न कोई रै कर्ज़दार मता बणदै, किबैकि ज़ुण दुज़ै न झ़ुरी डाह सा, तेइयै बिधान पूरा केरु सा।

⁹किबैकि मूसा रै बिधाना न ऐण्ढै बोहू सारै हुक्म सी कि व्यभिचार मता केरदै, ज़ानी न मता मारदै, च़ोरी मता केरदै, लालच मता केरदै, होर अगर इन्हां बै छ़ौड़िआ होर कोई भी हुक्म होला ता तिन्हां रा निचौड़ ऐसा गैला न मिला सा, कि “आपणै पड़ेशी सैंघै आपु सांही झ़ुरी केर।”

¹⁰झ़ुरी पड़ोसी री कोई बुराई नैंई केरदी, ज़ो झ़ुरी रखा सा सौ बिधाना बै पूरा केरा सा।

¹¹तुसा सैभी बै एकी दुज़ै री झ़ुरी केरनी चेहिऐ किबैकि सौ बौगत नेड़ आऊ सा ज़ैबै परमेश्वरा आसै ऐई दुष्ट दुनिया न छुड़ाणै। ज़ैबै आसै पैहली बार मसीह न बशाह केरू ती, तैबै न आसरा ऐ उद्धार नेड़ सा। ऐ जाणिया तुसाबै आपणी निंजा न बिऊदै रौहणा चेहिऐ होर साबधान रौहणा चेहिऐ।

¹²रात बोहू हुई सा, होर ध्याड़ा निकलणु आल़ा सा, तैबै ता आसै बै निहारै रै कोमा बै छ़ौड़िआ तै हथिय्यार लेणै चेहिऐ ज़ो प्याशै न इस्तेमाल केरा सी।

¹³आसै आपु न सही तरीकै रा बर्ताव केरना शुरू केरै ज़ो प्याशै न रौहा सी निहारै न नैंई, न कि मौज़-मस्ती, शराब पिणा, न व्यभिचार, न बुरै कोम, न झ़गड़ै होर न जलन।

¹⁴पर प्रभु यीशु मसीह बै आपणा कवच बणात्, होर शरीरे री इच्छा बै पूरी केरनै री कोशिश मता केरदै।