Read Pahari, Kullu रोमियो 15 Bible Online

रोमियो 15 - Pahari, Kullu bible

रोमियो 15

¹आसै जाँणा सी कि इन्हां चिजा न कोई फर्क नैंई पौड़दा, पर आसै तिन्हां बै आपु बै खुश केरनै री तैंईंयैं नैंई केरी सकदै। आसाबै तिन्हां लोका रै शक होर डौरा पैंधै विचार केरना चेहिऐ ज़ो ऐ सोचा सी कि ऐ चिजा गलत सी।

²आसा मौंझ़ै न सैभी बै आपणै सैंघी विश्वासी री तैंईंयैं केरना चेहिऐ ज़ो तेई री तैंईंयैं शोभला सा होर ज़ो तेइबै खुश केरा सा होर तेइबै बशाह न मजबूत केरला।

³किबैकि मसीह आपणै-आपा बै खुश नी ती केरदा, पर ज़ैण्ढा कि पवित्रशात्रा न लिखू सा, “कि तेरी निंदा केरनु आल़ै मेरी निंदा केरी सा।”

⁴ज़ेतरी गैला पैहलै न शास्त्रा न लिखी सी, ते सारी आसरी शिक्षा री तैंईंयैं लिखी सी, कि आसै बड़ै धीरजा न होर पवित्र शास्त्रा रै ज़रियै आश रखलै।

⁵हांऊँ प्रार्थना केरा सा कि धीरज होर दिलासा देणु आल़ा परमेश्वर तुसाबै मसीह यीशु रै मुताबक चलनै सैंघै-सैंघै, दुज़ै सैंघै शान्ति न रौहणै री मज़त केरला।

⁶ताकि तुसै सैभ एक होइया परमेश्वर, आसरै प्रभु यीशु मसीह रै पिता री स्तुति केरा।

⁷तैबै, एकी दुज़ै बै ग्रहण केरा ताकि लोक परमेश्वरा री प्रशंसा केरै; ऐण्ढाऐ केरा ज़ैण्ढा मसीहै तुसै ग्रहण केरै, तैण्ढै तुसै भी एकी दुज़ै बै ग्रहण केरा।

⁸हांऊँ बोला सा कि ज़ो वायदै बुज़ुर्गा सैंघै केरै ती, तिन्हां बै सच़ केरनै री तैंईंयैं मसीह, परमेश्वरै री सच़ाई बै साबित केरनै री तैंईंयैं, यहूदी लौका रा सेवक बणु।

⁹होर होरी ज़ाति बी परमेश्वरा री दया री बजहा न तेइरी स्तुति केरलै, ज़ैण्ढा शास्त्रा न लिखू सा, “कि मूँ ज़ाति-ज़ाति न तेरा धन्यवाद केरना, होर तेरै नाँ रै भजन लाणै।”

¹⁰फिरी दुज़ी ज़ैगा लिखू सा, हे होरी ज़ाति रै सैभी लोको, परमेश्वरा रै लोका सैंघै खुशी मनात्।

¹¹होर फिरी शास्त्रा न लिखू सा, “हे होरी ज़ाति रै लोको प्रभु री जय-जयकार केरा, हे राज्य-राज्य रै सैभी लोको तेइरी स्तुति केरा।”

¹²होर फिरी यशायाह भविष्यवाणी केरनु आल़ै बोलू सा, “यिशै [1]रै टबरा न एक यिशै रा खानदान ऐणा, होर तेई होरी ज़ाति पैंधै राज़ केरना, तेई पैंधै होरी ज़ाति रै लोका आश डाहणी।”

¹³हांऊँ प्रार्थना केरा सा कि परमेश्वर ज़ुण आश देणु आल़ा सा, तुसाबै बशाह केरनै न पूरी तैरहा न खुशी होर शान्ति न भौरला, कि पवित्र आत्मा री शक्ति न तुसरी आश बढ़दी रौहली।

¹⁴हे मेरै भाइयो, बैहणियो, मुँभै आपु भी तुसरै बारै न पता सा, कि तुसै भी आपणै-आपा न भलाई न भौरुऐदै सी होर तुसाबै पूरा पता सा कि तुसाबै कि केरना चेहिऐ ताकि एकी होरी दुज़ै बै शिक्षा देई सकलै।

¹⁵तैबै भी मैं तुसाबै याद दिलाणै री तैंईंयैं कोइँछ़ै-कोइँछ़ै बड़ी हिम्मत केरिया लिखू सा, ऐ ता तेई अनुग्रह री बजहा न हुआ सा, ज़ुण परमेश्वरै मुँभै धिना सा।

¹⁶कि हांऊँ होरी ज़ाति री तैंईंयैं मसीह यीशु रा खास सेवक बणीया, परमेश्वरै रै खुशी रै समादै री सेवा एक पुरोहिता सांही केरनु, ताकि होरी ज़ाति बै परमेश्वरा बै एक भेंटा रै रूपा न देईणी, ज़ुणी सैंघै सौ खुश होआ सा होर ज़ुणिबै पवित्र आत्मै, पवित्र लोक बणायै सी।

¹⁷यीशु मसीह री बजहा न, हांऊँ परमेश्वरा री तैंईंयैं आपणी सेवा न घमण्ड केरी सका सा।

¹⁸मसीहै मेरै ज़रियै केरेदै कोमा री बजहा न हांऊँ बोलणै री हिम्मत केरा सा कि हांऊँ होरी ज़ाति रै लोका बै परमेश्वरा रा पालन कराणै लायक सा। तिन्हैं यीशु मसीह पैंधै बशाह केरू ज़ैबै तिन्हैं मेरै वचन शुणै होर मेरै कोम हेरै।

¹⁹पवित्र आत्मा रै ज़रियै मुँभै धिनीदी शक्ति न हांऊँ शक्तिशाली नशाण होर नोखै कोमा केरा सा। तैबै ज़ौखै बी हांऊँ यरूश्लेम शैहरा न लेइया इल्लुरिकुमा प्रदेशा तैंईंयैं नौठा; मैं तौखै सैभी लोका बै यीशु मसीह रै बारै न खुशी रा समाद शुणाऊ।

²⁰पर मेरै मना री इच्छा ऐ सा, कि ज़ौखै-ज़ौखै मसीह रा नाँ नैंई पुजू, तौखै खुशी रा समाद शुणानु, ऐण्ढा नी हुआ लोड़ी कि होरी री नीऊँआ पैंधै घौर बणानू।

²¹पर हांऊँ ऐ केरना चाहा सा ज़ो शास्त्र बोला सा, “ज़ुणी हागै मसीह रा खुशी रा समाद नैंई पुजू सा, तिन्हाऐ हेरना होर ज़ुणियै नैंई शुणु सा तिन्हां समझणा।”

²²किबैकि मैं तिन्हां ज़ैगा पैंधै मसीह रै बारै न खुशी रै समादा रा प्रचार केरनै री कोशिश केरी सा ज़ौखै तिन्हैं मसीह रै बारै न नैंई शुणु, मुँभै तुसा हागै ऐणै न कई बार रोकू।

²³पर ऐबै मुँभै इन्हां प्रदेशा न कोम केरनै री तैंईंयैं होर ज़ैगा नैंई रौही, होर बोहू बोर्षा न मुँभै तुसा आगै ऐणै री इच्छा सा।

²⁴होर ज़ैबै हांऊँ स्पेन देशा बै ज़ानू ता तुसा हागै होईया जाँणा किबैकि मुँभै आश सा कि तेसा सफरा न तुसा सैंघै मिलनू, होर तुसा री संगती न ज़ैबै मेरा मन भौरला, ता हांऊँ चाहा सा कि तुसै मुँभै स्पेन जाणै री तैंईंयैं मज़त केरा।

²⁵पर ऐबै ता हांऊँ विश्वासी लोका बै भेंट देणै री तैंईंयैं यरूश्लेम शैहरा बै च़लू सा।

²⁶किबैकि कि मकिदुनिया होर अखाया प्रदेशा रै लोका बै ऐ शोभला लागा, कि यरूश्लेम शैहरा रै गरीब विश्वासी लोका री तैंईंयैं किछ़ दान देलै।

²⁷तिन्हैं ऐ खुशी सैंघै केरू, तै यरूश्लेमा न रौहणु आल़ै रै ऋणी बी सी, किबैकि होरी ज़ाति बै यरुश्लेमा रै विश्वासी न खुशी रै समादा रा आत्मिक आशीर्वाद मिलू, तैबै तिन्हैं ऐ महसूस केरू कि बदलै न ढैबुऐ देइया आर्थिक रूपा न तिन्हरी मज़त केरी सकलै।

²⁸तैबै मूँ ऐ कोम पूरा केरिया होर तिन्हां बै ऐ दान देइया तुसा हागै होईया स्पेन देशा बै जाँणा।

²⁹होर मुँभै पता सा, कि ज़ैबै मूँ तुसा हागै ऐणा, ता मसीह री पूरी आत्मिक आशीषा सैंघै ऐणा।

³⁰होर ओ भाइयो बैहणियो, प्रभु यीशु मसीह न आसरै बशाह री बजहा न होर पवित्र आत्मै आसाबै ज़ो झ़ुरी धिनी सा, तेथा री बजहा न हांऊँ तुसा सैंघै अर्ज़ा केरा सा कि तुसै मेरी तैंईंयैं परमेश्वरा न बड़ी इमानदारी सैंघै प्रार्थना केरा।

³¹कि हांऊँ यहूदिया प्रदेशा रै यहूदी अविश्वासी लोका न बच़िया रौहणु, होर मेरी ऐ सेवा ज़ुण यरूश्लेम शैहरा री तैंईंयैं सा, विश्वासी लोका बै शोभली लागी लोड़ी।

³²होर हांऊँ परमेश्वरा री इच्छा न तुसा हागै खुशी सैंघै एज़िया तुसा सैंघै बशाँ केरनु।

³³हांऊँ प्रार्थना केरा सा कि परमेश्वर ज़ो शान्ति दैआ सा, तुसा सैभी सैंघै रौहू लोड़ी। आमीन।