Read Pahari, Kullu रोमियो 16 Bible Online

रोमियो 16 - Pahari, Kullu bible

रोमियो 16

¹हांऊँ तुसा न फीबे री, ज़ुण आसरी सैंघी विश्वासी बैहण होर किंख्रिया शैहरा री मण्डली री सेवा केरनु आल़ी सा, हांऊँ तुसाबै तेसा न मिला सा।

²कि तुसै ज़ैण्ढा पवित्र लोका बै लोड़ी, तेसा बै प्रभु रा समझिया ग्रहण केरा, होर ज़ुणी गैला न भी तेसा बै तुसरी मज़ती री जरूरत होली, ता तेसरी मज़द केरा, किबैकि सौ बोहू लोका री होर बल्कि मेरी भी भला केरनु आई हुई सा।

³प्रिस्किला बैहण होर तेसरा लाड़ा अक्विला ज़ुण यीशु न मेरै सैंघी सी, नमस्कार।

⁴तिन्हैं मेरै प्राण बचाणै री तैंईंयैं आपणा प्राण खतरै न पाऊ ती, होर हांऊँ केल्हा नी बल्कि होरी ज़ाति री सारी मण्डली भी तिन्हां रा धन्यवाद केरा सा।

⁵होर तेसा मण्डली बै भी नमस्कार ज़ुण तिन्हां रै घौरा न कठा होआ सी। मेरै प्यारे इपैनितुस बै ज़ुण मसीह न आसिया रा पैहला बशाह केरनु आल़ा सा नमस्कार

⁶मरियमा बै ज़ुणी तेसै तुसा री तैंईंयैं बोहू मेहनत केरी, नमस्कार।

⁷भाई अन्द्रुनीकुस होर बैहण युनियासा बै ज़ुण मेरै सैंघी, होर मूँ सैंघै जेला बै बी नौठै ती, होर प्रेरिता न बड़ै नाँ आल़ै ती, होर ऐ बी मूँ न पैहलै मसीह न आऐ ती, नमस्कार।

⁸अम्पलियातुसा बै, ज़ुण प्रभु न मेरा प्यारा सा, नमस्कार।

⁹उरवानुसा बै, ज़ुण मसीह न आसरा सैंघी सा, होर मेरै प्यारे इस्तखुसा बै नमस्कार।

¹⁰अपुल्लोस ज़ुणियै स्पष्ट रूपा न रिहाऊ कि सौ मसीह रै प्रति केतरा बफादार सा, नमस्कार। अरिस्तुबुलुस रै टबरा बै नमस्कार।

¹¹मेरै सैंघी यहूदी हिरोदियोना बै नमस्कार। नरकिस्सुसा रै टबरा बै ज़ुण लोका प्रभु न बशाह केरा सी तिन्हां बै नमस्कार

¹²बेटड़ी त्रुफेना होर त्रुफेसा बै ज़ुण प्रभु न मेहनत केरा सा तेसा बै नमस्कार। प्यारी पिरसिसा बैहणा बै ज़ुणियै प्रभु न बोहू मेहनत केरी सा नमस्कार

¹³रुफुस बै ज़ुण परमेश्वरा रै ज़रियै प्रभु री सेवा न आपणै खास कोम केरनै री तैंईंयैं चुनु सा, होर तेइरी आमा बै ज़ुण मेरी भी आमा सांही सा, दुई बै नमस्कार।

¹⁴अंसुक्रितुस होर फिलगोन होर हिर्मेस होर पत्रुबास होर तिन्हां सैंघलै विश्वासी भाई लोका बै नमस्कार।

¹⁵फिलुलुगुस होर युलिया होर निर्युस होर तेइरी बैहण, होर उलुम्पास होर तेई सैंघलै सैभी पवित्र लोका बै नमस्कार।

¹⁶आपु न मसीह रै प्यारा न नमस्कार केरा। तुसाबै मसीह री सारी मण्डली री तरफा न नमस्कार।

¹⁷ऐबै हे भाइयो होर बैहणियो हांऊँ तुसा न अर्ज़ा केरा सा, कि ज़ुण सचाई री शिक्षा तुसाबै मिली सा एथा न अलावा अगर कोई लोका, फुट पाणै, होर ठोकर खाँणै री बजहा होआ सी, तिन्हां लोका न साबधान रौहा होर तिन्हां लोका न दूर रौहा।

¹⁸किबैकि ऐण्ढै लोका प्रभु मसीह री नैंई, बल्कि आपणै पेटा री सेवा केरा सी, होर मीठी-मीठी गैला केरिया सीधै साधे होर भोलै मांहणु बै भड़का सी।

¹⁹तुसरै प्रभु रा हुक्म मनणु आई गैला री चर्चा सारै लोका न फैली सा, तैबै ता हांऊँ तुसा रै बारै न खुशी मना सा, पर हांऊँ ऐ चाहा सा, कि तुसै भलाई री तैंईंयैं बुद्धिमान, पर बुराई री तैंईंयैं भोलै बणीया रौहा,

²⁰शान्ति रै परमेश्वरा बड़ी छ़ेकै शैताना रा नाश केरिया तुसरै अधीन केरना, आसरै प्रभु यीशु रा अनुग्रह तुसा पैंधै हुआ लोड़ी।

²¹तीमुथियुस मेरै सैंघी रा, होर लुकियुस होर यासोन होर सोसिपत्रुस मेरै सैंघी यहूदी रा तुसाबै नमस्कार।

²²हांऊँ ज़ुण पौलुसा री तैंईंयैं चिट्ठी लिखणु आल़ै तिरतियुसा रा प्रभु न तुसाबै मेरा नमस्कार।

²³गयुसा रा ज़ुण मेरा होर मण्डली री हेर-शुण केरा सा तेइरा तुसाबै नमस्कार, इरास्तुस ज़ुण शहरा रा भंडारी सा, होर भाई कारतुसा रा, तुसाबै नमस्कार।

²⁴हांऊँ प्रार्थना केरा सा कि आसरै प्रभु यीशु रा अनुग्रह तुसा पैंधै हुआ लोड़ी।

²⁵ऐबै ज़ो तुसाबै खुशी रा समाद ज़ो हांऊँ प्रचार केरा सा मतलब यीशु मसीह रै बारै न प्रचारा रै मुताबक तुसाबै बशाह न मजबूत केरी सका सा, तेई भेदा रै मुताबक ज़ुण हमेशा न गुजुईया रौहू।

²⁶पर ऐबै प्रगट होईया हमेशा रौहणु आल़ै परमेश्वरा रै हुक्मा न भविष्यवक्ता री कताबा रै ज़रियै सैभी ज़ाति रै लोका बै खुशी रा समाद दसू सा कि ते बशाह केरिया हुक्म मनणु आल़ै बणलै।

²⁷तेई नौखै बुद्धिमान परमेश्वरा री यीशु मसीह री ज़रियै हमेशा महिमा होंदै रौहै। आमीन।