Read Pahari, Kullu रोमियो 3 Bible Online

रोमियो 3 - Pahari, Kullu bible

रोमियो 3

¹कि यहूदी बै फिरी होरी जाति पैंधै कोई फायदा होआ सा? या खतना केरनै न कोई कीमत सा?

²हाँ एथा री बड़ी कीमत सा, सैभी न जरूरी गैल ऐ सा कि परमेश्वरै रै वचन यहूदी बै धिनै ती।

³अगर किछ़ यहूदी लोका बशाह चोड़नू आल़ै भी निकतै ता कि हुआ? तिन्हां रै बशाह चोड़नै न परमेश्वरै री सच़ाई बेकार थोड़ी नी हुई?

⁴कैधी भी नैंई, पर परमेश्वर हमेशा सच़ बोला सा होर हर मांहणु झूठा ठहरै, होर ज़ैण्ढा शास्त्र परमेश्वरा रै बारै न बोला सा कि “ज़ुणीन तू आपणी गैला न धर्मी ठहरै होर न्याय केरदी घेरै जय पाल्ला।”

⁵तैबै अगर आसरै बुरै कोम परमेश्वरा री धार्मिकता बै रिहा सी, ता आसा कि बोलणा? कि परमेश्वरा री तैंईंयैं झ़िकिणा होर आसाबै सज़ा देणा गलत सा अन्यायी सा? (ऐ ता हांऊँ मांहणु री सोच़ा पैंधै बोला सा।)

⁶कैधी भी नैंई, अगर परमेश्वर आसा यहूदी रा न्याय केरनै न सही नैंई ऑथि ता सौ ऐई दुनिया रै लोका रा न्याय कैण्ढै केरी सका सा?

⁷“अगर मेरै झूठा री बजहा न परमेश्वरै री सच़ाई तेइरी महिमा री तैंईंयैं बोहू प्रगट हुई, ता हांऊँ पापी बराबर किबै सज़ा रै लायक ठहराऊ?”

⁸होर “आसा बुराई किबै नी केरनी, कि भलाई पैदा हो?” ज़ैबै आसा पैंधै ऐ दोष ला सी, होर केतरै ऐ बोला सी, कि ऐ आसरा बोलणा सा, पर किछ़ लोका मेरै बारै न ऐण्ढी गैला बोला सी, तिन्हां बै दोषी ठहराणा ठीक सा।

⁹फिरी कि हुआ? कि आसै यहूदी, होरी जाति न शोभलै सी? कैधी भी नैंई, किबैकि आसै यहूदी होर होरी ज़ाति दुई पैंधै ऐ दोष लाऊ कि ऐ सैभ पापा रै वशा न सी।

¹⁰ज़ैण्ढा शास्त्रा न लिखू सा कि “परमेश्वरा री नज़री न कोई बी धर्मी नैंई, एक भी नैंई;

¹¹ऐण्ढा कोई बी मांहणु नैंई, ज़ो सच़िऐ समझ़ा सा कि सही कि सा; कोई बी परमेश्वरा बै जाणना नैंई च़ाँहदा।

¹²सैभिए परमेश्वरा रा नाँह केरू सा, सैभ परमेश्वरा री तैंईंयैं बेकार बणै सी, कोई भलाई केरनु आल़ा नैंई, एक भी नैंई।”

¹³तिन्हरी गैला तैण्ढी गन्दी सा ज़ैण्ढै कि खुली कब्रा न गन्दी बास एज़ा सा, तिन्हैं आपणी जीभा न छल केरू सा, “तिन्हां रै होंठा न साँपा रा जहर भौरुआ सा।”

¹⁴“होर तिन्हरी बोली श्राप होर बुरी-बुरी गैला न भौरुई सा।”

¹⁵“होर तै हत्या केरनै री तैंईंयैं भैगा सी।

¹⁶ज़ौखै भी ते जा सी, तै बुराई होर दुःख आंणा सी।

¹⁷तै दुज़ै न लड़ाई केरै बगैर शान्ति सैंघै कैण्ढै ज़ीआ सी नैंई जाणदै।”

¹⁸“तिन्हां न परमेश्वरा रा डौर ही नैंई ऑथि।”

¹⁹आसाबै पता सा कि मूसै रा बिधान ज़ो किछ़ बोला सा, तिन्हां बै बोला सा, ज़ुण मूसै री बिधानै रै मनणु आल़ै सी, तैबै हर मुँह बंद केरिना, होर सारी दुनिया रै लोक परमेश्वरा री नज़री न दोषी सी।

²⁰किबैकि बिधाना बै मनणै न कोई भी प्राणी परमेश्वरा सामनै धर्मी नी ठहरिणा, किबैकि मूसै रा बिधान आसाबै रिहा सा कि आसै पापी सी।

²¹पर ऐबै मूसै रै बिधाना रै बगैर परमेश्वर आसाबै तेई सैंघै धर्मी ठहरा सा, ज़ुणिरी गुआही मूसै रै बिधान होर भविष्यवक्ता री कताबा न पैहलै न ओरु लिखी सा कि आसै कैण्ढै परमेश्वरा रै ज़रियै धर्मी ठहराईणा।

²²परमेश्वर सैभी सैंघै एक ज़ेही बर्ताव केरा सा। सौ लोका बै सिर्फ़ तैबै ग्रहण केरा सा, किबैकि तिन्हां बै यीशु मसीह पैंधै बशाह सा।

²³किबैकि सैभियै पाप केरू, होर परमेश्वरा री महिमा न दूर सी।

²⁴पर परमेश्वरा रै अनुग्रह न तेइयै आसाबै आसरै पापा री सज़ा न यीशु मसीह रै ज़रियै छुटकारा धिना, परमेश्वरा सैंघै मुफ्ती न धर्मी ठहराऊ।

²⁵परमेश्वरै मसीह बै आसा री तैंईंयैं बलिदान होंणै री तैंईंयैं भेज़ू, मसीहै आपणा लोहू बहाऊ ताकि आसै तेई पैंधै बशाह केरिया परमेश्वरा हागै एज़ी सकलै। होर परमेश्वरै ऐ रिहाणै री तैंईंयैं केरू कि पैहलै सौ धीरज रखणै होर पापी बै माफ केरनै न सही ती। ऐ भी रिहा सा कि परमेश्वर सही सा ज़ैबै सौ तिन्हां लोका बै ग्रहण केरा सा ज़ो यीशु पैंधै बशाह रखा सी।

²⁷ता कि कोई ऐण्ढी च़ीज़ सा ज़ुणी पैंधै आसै घमण्ड केरी सका सी? तेइरी ता ज़ैगा ही नैंई ऑथि। कुणी नियमा री बजहा न? कि ऐण्ढा तैबै सा ज़ो आसै बिधाना बै मना सी, नैंई, पर ऐ तैबै सा कि आसरा बशाह यीशु मसीह पैंधै सा।

²⁸तैबै आसै जाँणा सी कि परमेश्वरै आसै सिर्फ़ बशाह रै ज़रियै धर्मी ठहराऊ होर मूसा रै बिधाना बै मनणै न नैंई।

²⁹परमेश्वर कि सिर्फ़ यहूदी रा सा? कि होरी ज़ाति रा नी ऑथि? हाँ, होरी ज़ाति रा भी सा।

³⁰किबैकि एकै परमेश्वर सा ज़ुण खतना केरूऐदै होर बिना खतना रै लोका बै भी बशाह री बजहा न धर्मी ठहरा सा।

³¹अगर आसै यीशु मसीह न बशाह न बच़ाई जा सी, ता कि आसै मूसै रै बिधाना बै व्यर्थ ठहरा सी? कैधी नैंई, पर एथा बै होर बी मजबूत केरा सी।