Read Pahari, Kullu रोमियो 4 Bible Online

रोमियो 4 - Pahari, Kullu bible

रोमियो 4

¹यहूदियै रै रूपा न आसाबै आपणै बुज़ुर्ग अब्राहमा रै बारै न कि बोलणा चेहिऐ? सौ कि बजहा ती ज़ुणिरी तैंईंयैं सौ धर्मी ठहराऊ ती?

²किबैकि अगर अब्राहम भलै कोमा न धर्मी ठहराऊ होंदा, ता तेइबै घमण्ड केरनै री बजहा होंणी ती, पर सौ परमेश्वरा रै सामनै आपणै भलै कोमा री तैंईंयैं घमण्ड नैंई केरी सकदा।

³पवित्र शास्त्र कि बोला सा? “परमेश्वरै ज़ो किछ़ बोलू, अब्राहमै तेथा पैंधै बशाह केरू, होर परमेश्वरै सौ धर्मी ठहराऊ।”

⁴कोम केरनु आल़ै बै तेइरी मजदूरी देणा दान नी होंदा, पर तेइरा हक्क समझिया सा।

⁵पर तुसै ज़ो किछ़ केरा सी तेथा री बजहा न परमेश्वर तुसाबै ग्रहण नैंई केरी सकदा। परमेश्वर पापी बै ग्रहण केरा सा, सिर्फ़ ज़ो तेई पैंधै बशाह केरा सी।

⁶ज़ुणिबै परमेश्वर बिना कर्म केरिया धर्मी ठहरा सा, तेइबै दाऊद शास्त्रा न धन्य बोला सा।

⁷“धन्य सी तै, ज़ुणिरै बुरै कोम माफ केरै, होर ज़ुणिरै पाप बिसरै।

⁸धन्य सा सौ मांहणु ज़ुणिबै परमेश्वर पापी नी ठहराला।”

⁹ता ऐ धन्य बोलणा, कि सिर्फ़ खतना केरूऐदै रै तैंईंयैं सा, कि बिना खतना केरनु आल़ै बै भी सा? ज़ो शास्त्र बोला सा आसै ता सौ बोला सी कि अब्राहमा रै तैंईंयैं तेइरा परमेश्वरा रै वचना पैंधै बशाह केरना धर्मी गिणुआ।

¹⁰ता ऐण्ढा कैबै हुआ? खतनै री दशा न कि बिना खतनै री दशा न? खतनै री दशा न नी बल्कि बिना खतनै री दशा न हुआ।

¹¹परमेश्वरै सौ पैहलै न ग्रहण केरू ती होर धर्मी ठहराऊ ती, ज़ैबैकि सौ खतना बगैर ती। खतना रा नशाण ग्रहण केरनै री एक मोहर सा। तैबै सौ तिन्हां लोका रा आत्मिक बापू सा ज़ो बशाह केरा सी पर खतना बगैर सी, तिन्हां लोका बै तिन्हरै बशाह री बजहा न धर्मी ठहराईया सा।

¹²होर सौ तिन्हां खतना केरूऐदै रा बुज़ुर्ग सा, ज़ुण न सिर्फ़ खतना केरूऐदै रा, बल्कि तिन्हरा भी ज़ुण आसरै बुज़ुर्ग अब्राहमा सांही ज़िन्दगी ज़िन्दै लागै सी, ज़ुण तेइयै बगैर खतना री दशा न केरू ती।

¹³परमेश्वरै अब्राहमा सैंघै वायदा केरू कि सौ होर तेइरा खानदान दुनिया रै वारिस होंणा, पर ज़ैबै तेइयै ऐ वायदा केरू कि ऐथा री तैंईंयैं नी हुआ कि अब्राहम मूसै रै बिधाना रा पालन केरदा लागा ती, बल्कि ऐ एथा री तैंईंयैं हुआ कि अब्राहमै परमेश्वरा पैंधै बशाह केरु, सौ धर्मी गिणुआ।

¹⁴किबैकि अगर ज़ो बिधाना बै मना सी तिन्हरी तैंईंयैं दुनिया रा वारिस होंणै रा वायदा केरू, ता बशाह बेकार सा होर वायदा बी बिना मतलबा रा सा।

¹⁵ज़ो कोई बिधाना बै पूरी तैरहा नैंई मनदा, परमेश्वरा बै तेई पैंधै झ़िक एज़ा सा, होर ज़ौखै बिधान नी ऑथि, तौखै बिधाना रा पालन बी नैंई ऑथि।

¹⁶तैबै लोकै बशाह केरिया परमेश्वरा रा वायदा प्राप्त केरू, ऐ तैबै होआ सा कि वायदा अनुग्रह सैंघै होई सकलै। तैबै अब्राहमा रै सैभ औलाद ऐई वायदै बै पाई सकै, ऐ सिर्फ़ तिन्हां लोका री तैंईंयैं नैंई ऑथि ज़ो मूसा रै बिधाना रै मुताबक रौहा सी, बल्कि ज़ो कोई अब्राहमा सांही बशाह न रौहा सा, ज़ो आसा सैभी रा बुज़ुर्ग सा।

¹⁷शास्त्र बोला सा कि, “मैं तू बोहू ज़ाति रा बुज़ुर्ग ठहराऊ सा” परमेश्वरा री नज़री न अब्राहम आसरा बापू सा। तिन्हैं तेई परमेश्वरा पैंधै बशाह केरू, ज़ुण मूँएंदै बै ज़िन्दा केरा सा, होर ज़ुण च़ीज़ा ऑथिऐ नैंई, तिन्हां बै बी आंणा सा।

¹⁸परमेश्वरै अब्राहमा न बोलू कि तेई बोहू औलाद प्राप्त केरनी, होर हालांकि सैभ किछ़ हेरुआ कि सौ बोहू लोका रा बापू नैंई बणी सकू, “सौ बशाह डाहन्दा रौहू होर तेइयै आश नैंई खोई।” अब्राहमै हेरू कि सौ शोहरु पैदा केरनै न बोहू खापरा ती, किबैकि सौ लगभग शौऊ बौर्षा न ज़ादा रा ती, सारा बी शोहरु पैदा केरनै लायक नैंई ती। पर अब्राहम आपणै बशाह न कमज़ोर नैंई हुआ।

²⁰होर न अविश्वासी बणीया परमेश्वरा रै वायदै पैंधै शक केरू, पर बशाह न पक्के होईया परमेश्वरै री महिमा केरी।

²¹होर पक्का जाणी लेआ, कि ज़ुणी गैला रा परमेश्वरै वायदा केरु सा, सौ तेसा बै पूरी केरनै री भी सामर्थ रखा सा।

²²“तेइरै बशाह री बजहा न सौ परमेश्वरै धर्मी ठहराऊ।”

²³होर ऐ वचन शास्त्रा न लिखू सा, “बशाह री तैंईंयैं परमेश्वरै सौ धर्मी ठहराऊ” न सिर्फ़ अब्राहमा री तैंईंयैं लिखू।

²⁴पर आसरी तैंईंयैं बी ज़ुणिबै परमेश्वरा धर्मी ठहराईणा, मतलब अगर आसै परमेश्वरा पैंधै बशाह केरलै, ज़ुणियै आसरै प्रभु यीशु बै मूँएंदै न ज़िन्दा केरू, ता आसा बी बशाह री बजहा न धर्मी ठहराईणा।

²⁵यीशु आसरै अपराधा री बजहा न मौरनै री तैंईंयैं ढोकुआ, होर परमेश्वरै आसाबै परमेश्वरा सैंघै धर्मी ठहराणै री तैंईंयैं यीशु बै ज़िन्दा बी केरु।