Read Pahari, Kullu रोमियो 6 Bible Online

रोमियो 6 - Pahari, Kullu bible

रोमियो 6

¹ता आसा कि बोलणा? कि आसा पाप केरदै रोहणा, कि अनुग्रह बोहू होला?

²कैधी बी नैंई, ज़ैबै आसै पापा रै तैंईंयैं मूँऐ तैबै बी तेई पापा न रोहिया ज़िन्दगी किबै बिताणी?

³आसै जाँणा सी कि आसै सैभियै ज़ेतरै मसीह यीशु री संगती न, ज़ैबै आसै बपतिस्मा लेऊ, आसै तेई सैंघै मूँऐं।

⁴तैबै ज़ैबै आसरा बपतिस्मा हुआ तैबै आसै मूँऐं होर मसीह सैंघै पोथुये ज़ैण्ढै पिता परमेश्वरै आपणी महिमा रै ज़रियै यीशु मसीह बै मूँएंदै न ज़िन्दा केरू, तैण्ढै आसा बी नौंऊँईं ज़िन्दगी ज़ीणी।

⁵ज़ैबै आसै बपतिस्मा लेआ सी ता तेइरी मौऊती री समानता न सैंघी होआ सी होर फिरी पक्का सा कि आसै बी तेई सैंघै ज़िन्दा होंणा।

⁶किबैकि आसाबै पता सा कि आसरी पराणी ज़िन्दगी मसीह यीशु सैंघै क्रूसा पैंधै खत्म हुई, ताकि आसरा पापा आल़ा शरीर खत्म होला, होर आगै बै आसै पापा रै गुलाम नी रौहलै।

⁷किबैकि ज़ैबै आसै मसीह सैंघै मूँऐं, आसै पापा री शक्ति न मुक्त हुऐ।

⁸ऐबै ज़ैबै आसै मसीह सैंघै मूँऐ, ता आसरा बशाह ऐसा कि तेई सैंघै ज़िन्दै भी होंणा।

⁹किबैकि आसाबै पता सा कि मसीह मूँएंदै न ज़िन्दै होंणै न बाद ऐबै फिरी मौरनु आल़ा नैंई, किबैकि तेई पैंधै मौत भी राज नैंई केरी सकदी।

¹⁰किबैकि ज़ैबै मसीह मूँआ ता पापा री तैंईंयैं एकियै बारी मूँआ, पर ऐबै सौ ज़िन्दा सा, ता परमेश्वरा री सेवा केरनै री तैंईंयैं ज़िन्दा सा।

¹¹ऐण्ढाऐ तुसै भी आपणै आपा बै पापा री शक्ति री तैंईंयैं ता मूँऐं, पर परमेश्वरा री सेवा केरनै री तैंईंयैं यीशु मसीह न आपणै आपा बै ज़िन्दै समझ़ा।

¹²तैबै पापा न भौरूइदी इच्छा बै आपणी ज़िन्दगी न राज केरनै मता देआ, कि तुसै आपणी पापा री इच्छा रा पालन केरी सकलै।

¹³होर न आपणै शरीरा रै औंगा बै बुरै कोमा री तैंईंयैं इस्तेमाल होंणै री तैंईंयैं देआ, पर आपणै आपा बै मूँऐंदै न ज़िन्दै हुऐदें सोचिया आपणी ज़िन्दगी बै परमेश्वरा री सेवा री तैंईंयैं देआ। होर आपणै शरीरा रै औंगा बै धर्मा रै कोमा री तैंईंयैं इस्तेमाल होंणै री तैंईंयैं आपणी ज़िन्दगी बै पूरी तैरहा न परमेश्वरा बै देआ।

¹⁴तैबै तुसा पैंधै पापा रा राज नैंई होंणा, किबैकि तुसै ऐबै मूसै रै बिधाना रै अधीन नैंई ऑथि, बल्कि परमेश्वरा रै अनुग्रह रै अधीन सी।

¹⁵ता कि हुआ? कि आसा तैबै पाप केरना, कि ऐबै आसै मूसै री बिधान रै अधीन नैंई बल्कि परमेश्वरा रै अनुग्रह रै अधीन सी? कैधी बी नैंई।

¹⁶तुसै जाँणा सी कि ज़ैबै तुसै कोई बै आपणै आपा बै गुलामा रै रूपा न देआ सी, तैबै सौ मांहणु तुसरा मालक होआ सा होर तुसाबै सौ केरना चेहिऐ ज़ो सौ बोला सा। तुसै पापा रै गुलाम होई सका सी ज़ो मौऊती धिरै जा सा या तुसै परमेश्वरा रा पालन केरना चुनी सका सी ज़ो धार्मिक ज़िन्दगी धिरै जा सा।

¹⁷तुसै पैहलै पापा रै गुलाम ती पर ऐबै तुसै खरै मना सैंघै उपदेश मैनणु आल़ै बणै, ज़ो तुसाबै शिक्षा धिनी ती, तैबै हांऊँ परमेश्वरा रा धन्यवाद केरा सा।

¹⁸होर परमेश्वरै तुसै पापा री शक्ति न छड़ाऐ होर ज़ो सही सा सौ केरनै री तैंईंयैं तुसै परमेश्वरा रै गुलाम हुऐ।

¹⁹हांऊँ तुसाबै ऐण्ढी तैरहा लिखा सा ताकि आम आदमी बी आसानी सैंघै समझी सकलै, कि ज़ैण्ढै तुसै पैहलै आपणी इच्छा रै गुलाम ती होर तुसै हर किस्मै रै छ़ोतले होर बुरै कोम केरा ती, पर ऐबै तुसै आपणै शरीरा रै औंगा बै पवित्रता री तैंईंयैं धार्मिकता रै गुलाम बणिया परमेश्वरा बै सौंपा।

²⁰ज़ैबै तुसै पापा रै गुलाम ती ता तुसै सही कोम केरनै लायक नैंई ती।

²¹तुसै बुरै कोम केरै, होर ऐबै तुसै तिन्हां न शर्मिंदा सी। ता तुसै कि हासिल केरू? किबैकि ऐण्ढै बुरै कोमा रा अंत ता मौऊत सा।

²²पर ऐबै पापा न आज़ाद होईया होर परमेश्वरा रै गुलाम होईया ऐबै तुसै तिन्हां गैला बै केरा सी, ज़ो पवित्रता धिरै बै नेआ सा ज़ुणी रा अंत हमेशा री ज़िन्दगी सा।

²³किबैकि पापा रा नतीज़ा ता मौऊत सा, पर ज़ो वरदान परमेश्वर आसाबै देआ सा सौ आसरै प्रभु यीशु न हमेशा री ज़िन्दगी सा।