Read Pahari, Kullu रोमियो 8 Bible Online

रोमियो 8 - Pahari, Kullu bible

रोमियो 8

¹तैबै ऐबै ज़ुण मसीह यीशु न सी, तिन्हां पैंधै सज़ा रा हुक्म नैंई ऑथि।

²पवित्र आत्मा तुसाबै ज़िन्दगी देणी ज़ुण मसीह यीशु न एज़ा सा होर तुसै पाप होर मौऊती न मुक्त केरनै।

³किबैकि ज़ुण कोम मूसै रा बिधान आसरै शरीरा रै पापी स्वभावा री बजहा न कमज़ोर होईया नैंई केरी सकू, तेइबै परमेश्वरै केरू, मतलब आपणै ही बेटै बै आसा सांही पापमय शरीरा रै बराबर, होर आसरै पापा री तैंईंयैं बली होंणै री तैंईंयैं भेज़ू, परमेश्वरै मसीह रै शरीरा न पापा री निन्दा केरी होर सज़ा धिनी।

⁴तैबै कि बिधाना री माँग आसा न ज़ुण शरीरा रै पापी स्वभावा रै मुताबक नैंई बल्कि पवित्र आत्मा रै मुताबक चला सी, पूरी हो।

⁵किबैकि ज़ो लोक पापी स्वभावा रै अधीन होआ सी तै पापा री गैला रै बारै न सोचा सी, पर ज़ो पवित्र आत्मा रै अधीन होआ सी तै पवित्र आत्मा बै खुश केरनु आल़ी गैला रै बारै न सोचा सी।

⁶शरीरा पैंधै मन लाणा ता मौऊत सा, पर आत्मा पैंधै मन लाणा ज़िन्दगी होर शान्ति सा।

⁷किबैकि शरीरा पैंधै मन लाणा ता परमेश्वरा न दुश्मनी केरना सा, किबैकि न ता परमेश्वर बिधान रै अधीन सा, न कैधी ऐण्ढा होई सका सा।

⁸होर ज़ुण पापी स्वभावा रै वशा न सी, तै परमेश्वरा बै कैधी खुश नी रखी सकदे।

⁹पर ज़ैबै परमेश्वरा री आत्मा तुसा आँध्रै सा, तैबै तुसै शरीरा री दशा न नैंई, पर आत्मिक दशा न सी। अगर कोई न मसीह री आत्मा नैंई ऑथि ता सौ मसीह रा मांहणु नैंई ऑथि।

¹⁰होर अगर मसीह तुसा न रौहा सा, ता पापा री बजहा न शरीरा री मौऊत होंणै पैंधै बी, धर्मा री बजहा न तुसरी आत्मा जिन्दी सा।

¹¹अगर परमेश्वरा री आत्मा ज़ुणियै यीशु मूँएंदै न ज़िन्दा केरू तुसा आँध्रै सा, ता ज़ुणियै मसीह मूँएंदै न ज़िन्दा केरू, तेई तुसा रै मूँएंदै शरीरा बै भी आपणी आत्मा री बजहा न ज़ुण तुसा आँध्रै सा ज़िन्दा केरना।

¹²तैबै भाइयो बैहणियो, आसै बै आपणी इच्छा रै मुताबक ज़िन्दगी नैंई ज़ीणी चेहिऐ।

¹³किबैकि अगर तुसै आपणै पापी स्वभावा न शरीरा रै मुताबक ज़ीआ सी ता तुसा परमेश्वरा न दूर होंणा, पर अगर तुसै पवित्र आत्मा री शक्ति रै ज़रियै शरीरा री इच्छा बै खत्म केरलै ता ज़िन्दै रौहणा।

¹⁴किबैकि ज़ेतरै लोका परमेश्वरा री आत्मा रै द्वारा चला सी, सिर्फ़ सोऐ परमेश्वरा री औलाद सी।

¹⁵किबैकि तुसाबै गुलामे री आत्मा नी मिली, कि तुसै फिरी डौरा, पर तुसाबै परमेश्वरा री आत्मा मिली सा ज़ैबै तिन्हैं तुसै आपणी औलाद बोलिया गोद लेऐ, ज़ुणीन आसै ओ बापू बोलिया शाधा सी।

¹⁶पवित्र आत्मा आपुऐ आसरी आत्मा सैंघै मिलिया ऐ गुआही देआ सा, कि आसै परमेश्वरा री औलाद सी।

¹⁷होर अगर आसै औलाद सी, ता वारिस भी सी, होर परमेश्वरा रै वारिस होर मसीह रै सैंघी वारिस सी। अगर आसै मसीह सांही दुःख सौहलै ज़ैण्ढै कि तेइयै सौहै ता आसै तेई सैंघै महिमा बी पाणी।

¹⁸मुँभै पक्का सा कि ऐई बौगता रै दुःख कष्ट तेसा महिमा रै सामनै ज़ुण परमेश्वर आसाबै प्रगट केरनु आल़ा सा, किछ़ भी नैंई ऑथि।

¹⁹किबैकि दुनिया बड़ी आशा भौरुइदी नज़रा न परमेश्वरा री सच़ी औलाद प्रगट होंणै रा इंतज़ार केरदी लागी सा।

²⁰किबैकि परमेश्वरै ज़ो किछ़ बी बणाऊ सा, तेइयै आपणी कीमत खोई, ऐ तैबै नैंई हुआ किबैकि तै आपु ऐण्ढा होंणा चाहा ती, पर परमेश्वरै ऐण्ढा केरू। पर तौखै आश सा।

²¹सृष्टि तेई रोज़ा रै इंतज़ारा न सा ज़ैबै सौ मौऊती होर नाशा न महिमामय आज़ादी न परमेश्वरा री औलादा सैंघै सैंघी होलै।

²²किबैकि आसाबै पता सा, कि पापा रै शुरूआती न सारी दुनिया ऐबै तैंईंयैं ज़ैण्ढै एक बेटड़ी बच्च़ा पैदा होंणै न पैहलै दुःख होर कष्टा न पोड़ीया तड़फदी रौहा सा, तैण्ढै चिखदी होर दुःखा न तड़फदी रौहा सा।

²³होर बल्कि दुनिया ही तड़फदी नैंई पर आसै भी ज़ुणीन होंणु आल़ी महिमा रै पैहलै फौल़ च़खणै रै रूपा न पवित्र आत्मा रा बास सा, आपुऐ आपणै-आपा न तड़फा सी, पर आसै ऐबै बी तेई बौगता रा इंतज़ार केरा सी ज़ैबै परमेश्वर आसाबै आपणी औलाद बनाणै री तैंईंयैं च़कला होर शरीरा री बुराई न छुटकारा देला।

²⁴तेई भविष्य री महिमा री आशा रै ज़रियै ता आसरी मुक्ति होआ सा, पर अगर आसा हागै पैहलै न किछ़ सा, ता आसाबै एथा री आश केरनै री जरूरत नी ऑथि? किबैकि ज़ुणी च़ीज़ा बै ज़ैबै कोई हेरदा लागा सा, ता तेसा च़ीज़ा री कि आश केरनी?

²⁵पर आसै ऐण्ढा किछ़ पाणै री आश केरा सी ज़ो आसा हागै हाज़ी तक नैंई ऑथि, तैबै आसै एथा बै पाणै तक धीरजा सैंघै इंतज़ार केरा सी।

²⁶ऐण्ढी तैरहै, ज़ुणी हागै बुद्धि नैंई ऑथि, पवित्र आत्मा आसाबै मज़त केरा सा, किबैकि आसै प्रार्थना केरनै री तैंईंयैं सही गैला बै नैंई जाणदै; पर पवित्र आत्मा आपुऐ आसरी तैंईंयैं ऐण्ढी तैरहा प्रार्थना केरा सा कि ज़ुणिरा शब्दा न बयान नैंई केरी सकदै।

²⁷होर परमेश्वर मना बै जाँणा सा, कि पवित्र आत्मा कि बोला सा, किबैकि सौ परमेश्वरा रै लोका री तैंईंयैं परमेश्वरा री इच्छा रै मुताबक प्रार्थना केरा सा।

²⁸होर आसाबै पता सा, कि ज़ुण लोका परमेश्वरा सैंघै झ़ुरी केरा सी, तिन्हरी तैंईंयैं सारी गैला भलाई बै पैदा केरा सी, मतलब ज़ुणिबै परमेश्वरै चुनै सी।

²⁹किबैकि ज़ुणिरै बारै न परमेश्वरा बै पैहला न पता सा तेइयै तिन्हां बै आपणै बेटै होंणै री तैंईंयैं चुनु सा, ताकि सौ बोहू भाई बैहणा मौंझ़ै न ज़ेठा ठहरला।

³⁰फिरी ज़ुणा तेइयै पैहलै न चुनै सी, तै शाधे बी सी, होर ज़ुणिबै तेइयै शाधे सा, ते धर्मी बी ठहराऐ सी, होर ज़ुणा धर्मी ठहराऐ सी, तिन्हां बै महिमा बी धिनी सा।

³¹ता आसा इन्हां गैला रै बारै न कि बोलणा? अगर परमेश्वर आसा धिरै सा, ता आसरा दुश्मन कुण होई सका सा?

³²परमेश्वरै आपणा एकलौता बेटा भी आपु हागै नी रखु, पर सौ तेइबै आसा सैभी री तैंईंयैं आपणै दुश्मना बै धिना, ता तेई आसाबै सैभ किछ़ देणा, ज़ो तेइयै वायदा केरू ती।

³³परमेश्वरा रै चुनैदै लोका पैंधै कुण दोष लाई सका सा? परमेश्वर ता सौ सा ज़ुणियै तै धर्मी ठहराऐ।

³⁴होर कुण सा ज़ो सज़ा रा हुक्म देई सका सा? यीशु मसीह ता सौ सा ज़ुण मूँआ बल्कि मूँएंदै न ज़िन्दा भी हुआ, होर परमेश्वरा रै दैहिणै धिरै बेठा सा, होर आसरी तैंईंयैं प्रार्थना बी केरदा रौहा सा।

³⁵कुण आसाबै मसीह री झ़ुरी न आँगी केरी सका सा? कि क्लेश, कि दुःख, कि उपद्रव, कि अकाल, कि नाँगापन, कि ज़ोखिम, कि तलवार?

³⁶ज़ैण्ढा शास्त्रा लिखूदा सा, “कि तेरै तैंईंयैं आसै हर बौगत मौऊती रै खतरै न सी, आसै काटणू आई भेड़ा बराबर गिणीया सी।”

³⁷पर इन्हां सैभी बुरी गैला न आसै तेइरै ज़रियै ज़ुण आसा न झ़ुरी केरा सा, आसरी पूरी जीत सा।

³⁸किबैकि हांऊँ पक्का जाँणा सा, कि न मौऊत, न ज़िन्दगी, न स्वर्गदूत, न प्रधानताएं, न वर्तमान, न भविष्य, न शक्ति, न उँचाई,

³⁹न गहराई, होर न कोई होर सृष्टि, आसाबै परमेश्वरा रै झ़ुरी न, ज़ुण आसरै प्रभु यीशु मसीह न सा आँगी केरी सकदी।