Read Pahari, Kullu रोमियो 9 Bible Online

रोमियो 9 - Pahari, Kullu bible

रोमियो 9

¹हांऊँ मसीह न सच़ बोला सा, झूठ नी बोलदा, होर मेरै विचार बी पवित्र आत्मा न होईया गुआही देआ सा।

²कि मुँभै बड़ा दुःख सा, होर हांऊँ आपणै लोका री तैंईंयैं हमेशा दुःखी रौहा सा।

³किबैकि हांऊँ चाहा ती, कि आपणै यहूदी भाई होर बैहणिया री तैंईंयैं ज़ुण मेरी आपणी जाति रै सी, हांऊँ आपुऐ मसीह न शापित होंदा।

⁴तै मेरी ज़ेहि इस्राइली लोका सी, होर तै परमेश्वरा रै गोद लेऐदै होंणै री तैंईंयैं चुनै सी, होर महिमा, होर वायदै, होर बिधान, आराधना, होर प्रतिज्ञाएं तिन्हैं री सा।

⁵अब्राहम, इसहाक होर याकूब तिन्हरै बुजुर्ग सी, शरीरा रै मुताबक मसीह बी इस्राइली ती। सौ परमेश्वर सा ज़ो सैभी पैंधै राज केरा सा, ज़ुगा-ज़ुगा तैंईंयैं तेइरी स्तुति हुई लोड़ी। आमीन।

⁶पर ऐ नैंई, कि परमेश्वरा आपणै वायदै बै केरनै न नाकामयाब रौहै, तैबै नैंई कि ज़ुण इस्राइली रै खानदाना न सी, तै सैभ सच़िऐ इस्राइली सी।

⁷अब्राहमै रै खानदाना न पैदा होंणै न ही सैभ तिन्हरी सच़ी औलाद नैंई होंदी, किबैकि परमेश्वरै अब्राहमा न बोलू, “ज़ो इसहाका रै खानदाना न जन्म लेआ सी, तिन्हां ही तेरै खानदान होंणा।”

⁸मतलब शरीरा री औलाद परमेश्वरा री औलाद नैंई, पर सिर्फ़ वायदै री औलाद अब्राहमा री औलाद मनिणा।

⁹किबैकि वायदै रा वचन ऐ सा, “आगलै बौर्ष मूँ ऐई बौगतै दबारा ऐणा तैबै तेरी लाड़ी सारा रा एक बेटा पैदा होंणा।”

¹⁰ऐ मता भूला कि इसहाक होर रिबका रै जुड़ुवा बेटै सैंघै कि हुआ।

¹¹पैदा होंणै न पैहलै या किछ़ बी भला या बुरा केरनै न पैहलै परमेश्वरै रिबका बै दसू कि तेसा रै बड़ै बेटै होछ़ै बेटै री सेवा केरनी। परमेश्वरै ऐ रिहाणै री तैंईंयैं बोलू, कि सौ आपणी आपुऐ पसन्द बणा सा होर ऐण्ढा किछ़ बी नैंई ती ज़ो कि तिन्हां मौंझ़ै कोइयै केरू ती।

¹³ज़ैण्ढा कि शास्त्रा लिखू सा “मैं सैभी न ज़ादा याकूबा सैंघै झ़ुरी केरी पर एसावा सैंघै नैंई।”

¹⁴ता आसा कि बोलणा? कि परमेश्वरा अन्यायी सा ज़ो सौ चुनना चाहा सा? कैधी भी नैंई!

¹⁵किबैकि परमेश्वर मूसा बै बोला सा, कि “हांऊँ ज़ुणी पैंधै दया केरना चाहनु, तेई पैंधै दया केरनी, पर ज़ुणी कोई पैंधै कृपा केरना चाहनु, तेई पैंधै कृपा केरनी।”

¹⁶ता परमेश्वरा सौ मांहणु चुनना, ज़ुणी पैंधै सौ दया केरनै रा फैसला केरा सा, तिन्हरी पसन्द ऐसा गैला पैंधै निर्भर नैंई ऑथि कि लोका कि चाहा सी या कि केरनै री कोशिश केरा सी।

¹⁷किबैकि पवित्र शास्त्रा न परमेश्वरै मिस्रा रै राजा फिरौना सैंघै बोलू कि, “मैं तू तैबै राजा बणाऊ सा, कि तो न आपणी शक्ति रिहानु, होर मेरै नाँ रा समाद सारी धौरती ज़ौखै लोका सी तौखै हुई लोड़ी।”

¹⁸होर सौ ज़ुणी पैंधै चाहा सा, तेई पैंधै दया केरा सा, होर ज़ुणिबै चाहा सा तेइरा मन हठी केरा सा।

¹⁹फिरी किछ़ लोका मूँ सैंघै बोलणा, अगर ऐण्ढा सा ता परमेश्वर कैण्ढै फैसला केरी सका सा कि आसै गलत सी? किबैकि ज़ो सौ केरना चाहा सा कोई तेथा बै नैंई रोकी सकदा।

²⁰ओ भाई, तू कुण सा ज़ुण परमेश्वरा सैंघै बैहस केरा सा? कि बणाईदी ज़ो चीज़ बनाणु आल़ै बै पूछ़ा सा कि “तैं हांऊँ ऐण्ढी किबै बणाई?”

²¹कुम्हारा बै कि माटै पैंधै अधिकार नी ऑथि, कि एकियै ढेरा न सौ एक शोभला भाँडा होर तेई ढेरा न एक खराब भाँडा नी बणाई सकदा?

²²परमेश्वरा बै बी ऐण्ढै केरनै रा अधिकार सा ज़ैण्ढा सौ आपणै लोका सैंघै केरला परमेश्वर आपणी झ़िका बै रिहाणा चाहा ती, नाश होंणै लायक हर कोई रै खिलाफ़ आपणी शक्ति प्रगट केरना चाहा ती। पर एथा रै बजाय तेइयै धीरज रखु।

²³तेइयै ऐ केरू किबैकि सौ रिहाणा चाहा ती (मसीह रै बलिदाना रै ज़रियै) सौ केतरा महान सा ज़ैबै सौ तिन्हां लोका पैंधै दया केरा सा ज़ुण तेइयै आपणी महिमा न साँझ़ा केरनै री तैंईंयैं चुनु सा।

²⁴मतलब चाहे यहूदी होर होरी ज़ाति आसै चुनैदै सी।

²⁵ज़ैण्ढा सौ होशे भविष्यवक्ता री कताबा न भी बोला सा, “ज़ुण मेरै लोका नैंई ती, सौ मूँ आपणै लोका बनाणै,” ज़ो मेरै प्यारे नैंई ती, तिन्हां बै प्यारे बोलणा;

²⁶होर, “ऐण्ढा होंणा कि ज़ुणी ज़ैगा तिन्हां बै बोलू ती, तुसै मेरै लोका नैंई ऑथि, ‘तेसा ज़ैगा न तिन्हां जिन्दै परमेश्वरा रै औलाद होंणा।’ ”

²⁷होर यशायाह भविष्यवाणी केरनु आल़ै इस्राइला रै बारै न लेरा मारी-मारिया बोला सा, “चाहे इस्राइला रै औलादा री गिणती समुन्दरा रै रेता बराबर होली, तैबै भी तिन्हां मौंझ़ै थोड़ै बच़णा।

²⁸किबैकि प्रभु छ़ेकै ही दुनिया रै लोका रा न्याय केरना।”

²⁹ज़ैण्ढा भविष्यवाणी केरनु आल़ै यशायाहे पैहलै बी लिखुदा सा, “कि अगर सर्वशक्तिमान परमेश्वरै आसाबै खानदाना रखणै रा हुक्म नैंई धिना होंदा, ता आसा सदोम होर अमोरा रै शैहरा न लोका सांही बणना ती, ज़ुणिबै परमेश्वरै पूरी तैरहा नाश केरै।”

³⁰ता आसा कि बोलणा? ऐ होरी ज़ाति आपु बै परमेश्वरा सैंघै धर्मी ठहराणै री कोशिश नैंई केरदै लागै ती, पर तिन्हां बै तिन्हरै बशाह री बजहा न परमेश्वरा सैंघै धर्मी ठहराऊ ती।

³¹पर इस्राइली रै लोक, ज़ुण मूसै री बिधाना रा पालन केरदैआ परमेश्वरा रै ज़रियै धर्मी ठहराणा चाहा ती।

³²ऐ कैण्ढै होई सका सा, तैबै कि सौ बशाह न नैंई, पर मैना भलै कोमा न तेइरै ज़रियै धर्मी ठहराणा चाहा ती, इस्राइली रै लोकै तेई ठोकर खाँणु आल़ै पात्थरा न ठोकर खाई।

³³ज़ैण्ढा शास्त्रा न लिखुदा सा, “हेरा, मूँ सिय्योना न ठोकर लाणु आल़ा पात्थर होर ठोकर लागणु आई टोहल रखणी ज़ुण तेई पैंधै बशाह रखला, तिन्हां कैधी भी लज्जित नी होंणा।”