Read Pahari, Kullu 1 कुरिन्थियों 1 Bible Online

1 कुरिन्थियों 1 - Pahari, Kullu bible

1 कुरिन्थियों 1

¹हांऊँ पौलुस ऐ चिट्ठी लिखदा लागा सा। आसरा विश्वासी भाई सोस्थिनेस मूँ सैंघै सा ज़ैबै हांऊँ ऐ लिखदा लागा सा। परमेश्वरै हांऊँ तैबै शाधु कि हांऊँ यीशु मसीह रा प्रेरित बणी सकनू, किबैकि परमेश्वरा री ऐ इच्छा ती।

²हांऊँ ऐ चिट्ठी कुरिन्थियुसै शैहरा री मण्डली रै विश्वासी बै लिखदा लागा सा ज़ो परमेश्वरै आपणै पवित्र लोका बणनै री शाधै सी। तेइयै तुसै यीशु मसीह रै ज़रियै पवित्र केरू सा ज़ैण्ढै कि तेइयै सैभ लोका री तैंईंयैं ज़ो सैभ ज़ैगा रौहा सी केरू सा होर ज़ो प्रभु यीशु रै नाँ पैंधै बशाह केरा सी ज़ो तिन्हरा हो आसरा प्रभु सा।

³आसरै परमपितै री धिरै न होर आसरै परमेश्वर यीशु मसीह री धिरै न, तुसा सैभी बै अनुग्रह होर शान्ति मिली लोड़ी।

⁴हांऊँ तुसरी तैंईंयैं हमेशा परमेश्वरा बै धन्यवाद देआ सा, तिन्हां वरदाना बै ज़ो तुसाबै अनुग्रह न मिलू सा, किबैकि तुसै मसीह सैंघै जुड़ेदै सी।

⁵तुसै मसीह सैंघै जुड़ेदै सी तैबै तेइयै तुसाबै बोहू सारी योग्यता धिनी सा, ज़ैण्ढै तेइरै वचना रा प्रचार केरना होर तेइरै वचना बै समझणै री योग्यता।

⁶ऐ योग्यता साबित केरा सा कि ज़ो मसीह रा सन्देश मैं तुसाबै शणाऊ सा सौ सच़ा सा।

⁷ज़ुणी आत्मिक वरदाना री तुसाबै ज़रूरत सौ सैभ तुसा हागै सा ज़ैबैकि तुसा आसरै प्रभु यीशु मसीह रै दबारा ऐणै रा बड़ी इच्छा सैंघै इंतज़ार केरदै लागै सी।

⁸परमेश्वर तुसाबै आखरी तैंईंयैं बशाह न मजबूत केरनै ताकि तुसै आसरै प्रभु यीशु मसीह रै दबारा ऐणै तक निर्दोष ठहरलै।

⁹परमेश्वर सच़ा सा, ज़ुणियै तुसै आपणै बेटै आसरै प्रभु यीशु मसीह री संगती न शाधूदा सा।

¹⁰हे विश्वासी भाइयो, हांऊँ आपणै प्रभु यीशु मसीह रै नाँ न तुसा हागै अर्ज़ा केरा सा कि तुसै सैभियै एकै गैल बोला होर तुसा न फूट नी लोड़ी, बल्कि एक मन होईया मिलिया रौहा।

¹¹किबैकि हे मेरै विश्वासी भाइयो, खलोए रै घरानै रै लोकै मुँभै तुसरै बारै न दसू सा कि तुसा न झ़गड़ै होंदै लागै सी।

¹²मेरै बोलणै रा मतलब ऐसा कि, तुसा न कोई ता आपु बै पौलुसा रा होर कोई पतरसा रा होर अपुल्लोस होर कोई मसीह रा बोला सा।

¹³कि तुसरी तैंईंयैं खरा सा कि मसीह रै लोका ऐण्ढी तैरहा बोंडलै? कि पौलुस तुसरी तैंईंयैं क्रूसा पैंधै च़ढ़ाउआ? या तुसाबै पौलुसै रै नाँ रा बपतिस्मा मिलू? कैधी नैंई।

¹⁴हांऊँ परमेश्वरा रा धन्यवाद केरा सा कि, क्रिस्पुस होर गयुस भाई बै छ़ौड़िआ मैं तुसा मौंझ़ै कौसी बै बपतिस्मा नी धिना।

¹⁵तैबै कोई ऐ नी बोली सकदा कि तुसै मेरा च़ेला होंणै री तैंईंयैं बपतिस्मा लेऊ सा।

¹⁶होर हाँ, मैं स्तिफनासै रै घरानै बै भी बपतिस्मा धिना, इन्हां छ़ौड़िआ मुँभै याद नी ऑथि कि मैं कौसी होरी बै बपतिस्मा धिना।

¹⁷किबैकि मसीहै हांऊँ बपतिस्मा देणै री तैंईंयैं नी, बल्कि खुशी रा समाद शनाणै री तैंईंयैं भेज़ू सा होर ऐ मेरै च़लाकी भरै शब्दा रा ज्ञाना रै मुताबक नी, कोइँछ़ै ऐण्ढा नी लोड़ी हुआ कि मसीह रा क्रूसा पैंधै रा बलिदाना री सामर्थ बेकार ठहरला।

¹⁸किबैकि क्रूसा री कथा नाश होणू आल़ै री तैंईंयैं मूर्खता सा, पर आसा मुक्ति पाणु आल़ै रै तैंईंयैं परमेश्वरा री शक्ति सा।

¹⁹किबैकि पवित्र शास्त्रा न लिखू सा कि, “मूँ ज्ञानवाना रा ज्ञान नष्ट केरना, होर समझ़दारै री समझ़ तुच्छ केरनी।”

²⁰ऐबै कौखै रौहै सौ ज्ञानवान लोका? ऐबै कौखै रौहै पवित्र ग्रन्था रै शास्त्री? ऐबै कौखै नौठै ते लोका ज़ो ऐ सोच़ा सी कि तिन्हां हागै सैभ ज़वाब सी? कि परमेश्वरै ऐ साबित नैंई केरू कि दुनिया रा ज्ञान मूर्खता सा?

²¹परमेश्वर ज्ञानी सा होर तेइयै फैसला केरू कि ऐण्ढा न हो कि लोका दुनिया रै ज्ञाना रै ज़रियै तेइबै जाणनै री कोशिश केरलै। एथा रै बदलै परमेश्वरै तिन्हां लोका रा उद्धार केरू ज़ुणियै आसरै मुर्खता भरै सन्देशा न बशाह केरू।

²²यहूदी ता चमत्कार चाहा सी होर होरी ज़ाति ज्ञाना बै तोपदै रौहा सी।

²³पर आसै ता क्रूसा पैंधै च़ढ़ाऐदै मसीह रा प्रचार केरा सी, ज़ो यहूदी री तैंईंयैं ठोकरै री बजहा होर होरी ज़ाति री तैंईंयैं मूर्खता सा।

²⁴आसरा मसीह रै बारै सन्देश परमेश्वरा री शक्ति होर बुद्धि सा तिन्हां यहूदी होर होरी ज़ाति री तैंईंयैं ज़ुणिबै परमेश्वरै चुनै सी।

²⁵किबैकि ज़ो च़ीजा परमेश्वरै री मूर्खता बराबर लागा ती सौ मांहणु रै ज्ञाना न भी ज़ादा ज्ञानवान सा, होर ज़ो च़ीजा परमेश्वरै री कमजोरी बराबर लागा ती सौ मांहणु री ताकता न भी ज़ादा बलवान सा।

²⁶हे विश्वासी भाइयो, याद केरा कि तुसै कुण ती ज़ैबै परमेश्वरै तुसै चुनै ती। ऐई दुनिया रै लोकै नैंई सोचु होला कि तुसा मौंझ़ै न कई बुद्धिमान, शक्तिशाली होर कई इज़तदार टबरा मौंझ़ै न सी।

²⁷पर, परमेश्वरै दुनिया रै मूर्ख चुनै कि बुद्धिमाना बै शर्मिंदा केरलै, होर परमेश्वरै दुनिया रै कमज़ोरा बै चुनु कि बलवाना बै शर्मिंदा केरलै।

²⁸परमेश्वरै ते लोका चुनै ज़ुणिबै दुनिया रै लोका नीच होर तुच्छ बुझा सी, होर ज़ो कोई कोमा रै नैंई ऑथि ऐण्ढा सोचा सी, ताकि ज़ो दुनिया रै लोक ज़ुणी च़ीज़ा बै खास समझा सी तेइबै नाश केरलै।

²⁹परमेश्वरै ऐण्ढा तैबै केरू ताकि कोई मांहणु तेई सामनै घमण्ड नैंई केरी सकलै।

³⁰तुसै परमेश्वरा री औलाद सी, तेइयै यीशु मसीह भेज़ू आसाबै पापा न छुटकारा देणै री तैंईंयैं बुद्धिमान बनाणै री तैंईंयैं, ग्रहण योग्य होर पवित्र बनाणै री तैंईंयैं।

³¹ताकि ज़ैण्ढा पवित्र शास्त्रा न लिखू सा, तैण्ढाऐ होला, “ज़ुण घमण्ड केरला सौ प्रभु रै ज़रियै केरेदै कोमा पैंधै घमण्ड केरला।”