Read Pahari, Kullu 1 कुरिन्थियों 10 Bible Online

1 कुरिन्थियों 10 - Pahari, Kullu bible

1 कुरिन्थियों 10

¹ओ भाइयो, बैहणियो हांऊँ तुसाबै याद दिलाणा च़ाहा सा आपणै बुज़ुर्गा रै बारै न ज़ो कई बौर्षा पैहलै रेगिस्ताना न ती। इन्हां सैभी री अगुवाई ऐकै बादला रै ज़रियै हुई ज़ो सैभी रै आगै-आगै चला ती होर सैभी रै सैभ समूँद्रै रै बीचा न पार हुऐ।

²होर मूसा रा च़ेला बणनै री तैंईंयैं लोका बपतिस्मा सांही समुन्द्र होर बादला न होइया नौठै।

³होर सैभिए सौऐ रोटी खाई ज़ो परमेश्वरै तिन्हां बै स्वर्गा न धिनी ती।

⁴होर सैभिए एकै आत्मिक पाणी पिऊ, किबैकि ते तेसा आत्मिक टोहली न पिया ती ज़ो तिन्हां सैंघै-सैंघै चौला ती; होर सौ टोहली मसीह ती।

⁵पर परमेश्वर तिन्हां सैभी न खुश नी हुआ, तैबै ते बौणा न मूँए।

⁶ऐ सैभ गैला आसरी तैंईंयैं उदाहरण बणी, कि ज़ैण्ढै तिन्हैं लालच केरू, तैण्ढै आसै भी बुरी च़ीजा रा लालच नी केरना।

⁷होर न तुसै मूर्तिपूजा केरनु आल़ै बणा; ज़ैण्ढै तिन्हां न केतरै बणै ती, ज़ैण्ढा पवित्र शास्त्रा न लिखुदा सा कि, “लोका खाँदै पिन्दै होर भोगविलासा न लागी रौहै।”

⁸होर न आसा व्यभिचार केरना; ज़ैण्ढा कि तिन्हां मौंझ़ै न केतरै मांहणुऐ ऐण्ढा केरू तैबै ते ऐकी रोज़ा न त्रेई हज़ार लोका मूँऐ।

⁹होर मसीह बै मौता परखा; ज़ैण्ढा कि तिन्हां मौंझ़ै केतरै लोकै केरू, होर ते कीड़ै रै ज़रियै नाश केरै।

¹⁰होर न तुसै कुड़कुड़ाऐ, ज़ैण्ढै कि तिन्हां मौंझ़ै केतरै लोका कुड़कुड़ाऐ, होर स्वर्गदूता रै ज़रियै ते नाश केरै।

¹¹पर ऐ सैभ गैला, ज़ो तिन्हां सैंघै हुई ती, उदाहरण री रीति न ती होर ते आसरी च़िताऊणी री तैंईंयैं लिखी सा ज़ो ऐसा दुनिया रै आखरी बौगता तक रौहा सी।

¹²तैबै अगर कोई विश्वासी ज़ो ऐ सोच़ा सा, कि हांऊँ बशाह न मजबूत सा, ता सौ साबधान रौहै, कोइँछ़ै ऐण्ढा नी लोड़ी हुआ कि सौ तेई पापा न पौड़ला।

¹³परमेश्वर सच़ा सा होर सौ तुसाबै शक्ति न बाहर परिक्षा न नी पौड़नै देंदा, बल्कि परीक्षा न बाहरै खोला सा, ताकि तुसै सौही सकलै।

¹⁴तेसा बजहा न, ओ मेरै प्यारो मूर्तिपूजा न बचिया रौहा।

¹⁵हांऊँ बुद्धिमान ज़ाणिया, तुसाबै बोला सा; ज़ो हांऊँ बोला सा, तेइबै तुसै परखा।

¹⁶प्रभु भोजा रै बौगत सौ धन्यवादा रा कटोरा, ज़ुणिबै आसै धन्यवाद केरिया ग्रहण केरा सी, मसीह रै लोहू रै सहभागी सी। सौ रोटी ज़ुणिबै आसै चोड़ा सी, सौ मसीह रै शरीरा री सहभागिता सा।

¹⁷तैबै कि ऐकै रोटी सा ज़ो मसीह सा, फिरी आसै ज़ो कई विश्वासी सी एक बणा सी, किबैकि आसै सैभ तेसा ऐकै रोटी न खा सी।

¹⁸तिन्हां इस्राइला मांहणु रै बारै न सोच़ा ज़ो च़ढ़ाऊदी बलि बै खा सी, होर सौ परमेश्वरा री बेदी रै कोमा न सहभागी भी होआ सी।

¹⁹कि हांऊँ ऐ बोलदा लागा सा कि मूर्ति होर मूर्ति बै च़ढ़ाऊ हुन्दी बलि खास सा या कि मूर्ति सच़िऐ ईश्वर सा?

²⁰कैधी नैंई, हांऊँ ऐ बोला सा कि ऐ बलि परमेश्वरा री तैंईंयैं नैंई ऑथि, पर सौ बुरी आत्मा बै च़ढ़ा सी, होर हांऊँ नी च़ाँहदा कि तुसै बुरी आत्मा रै भागीदार होलै।

²¹तुसै प्रभु रै कटोरै, होर बुरी आत्मा रै कटोरै दुई न कठै नी पिई सकदे! तुसै प्रभु री मेजा न होर बुरी आत्मा री मेजा न, तिन्हां दुई न भागी नी होई सकदे।

²²अगर तुसै ऐण्ढै केरलै ता तुसा ज़रूर प्रभु बै झ़िक च़कणी। याद रखा कि तुसै तेईन ज़ादा शक्तिमान नैंई ऑथि।

²³तुसा मौंझ़ै न किछ़ लोका ऐण्ढै बोलदै लागै सी, “आसै ज़ो चाहे केरी सका सी!” पर हांऊँ तुसाबै बोला सा सैभ किछ़ खरा होर फायदैमन्द नैंई ऑथि।

²⁴आपणी ही भलाई रै बारै न मता सोच़दै, बल्कि दुज़ै री भलाई रै बारै न भी सोच़ा।

²⁵ज़ैबै तुसै मांस खरीददै बज़ार जा सी ता तेइबै कीमतियै खाईत् होर आपणै मना बै साफ़ रखेइत् होर ऐ मता पूछ़दै कि ऐ मांस कौखै न आऊ।

²⁶तुसै ऐईबै खाई सका सी किबैकि पवित्र शास्त्रा न लिखू सा, “धौरती होर तेथा री सारी भरपूरी प्रभु री सा।”

²⁷अगर अविश्वासी मौंझ़ै न तुसाबै कोई नेउता देला ता, होर तुसै जाँणा च़ाहलै, ता ज़ो किछ़ तुसा सामनै रखलै ता तेथा बै खाई होर ऐ मत पूछ़दै कि ऐ बलि केरूआदा मांस सा या नैंई ताकि तुसै आपणा आपा बै दोषी महसूस नैंई केरी सकलै।

²⁸अगर कोई तुसाबै बोलला, “ऐ ता मूर्ति रै सामने च़ढ़ाऊ हुन्दी च़ीज सा,” ता तेई दसणु आल़ै री बजहा न, होर मना री बजहा न मतेई खाई।

²⁹ऐ होई सका सा कि ऐ तुसरै मना री तैंईंयैं परेशानी नैंई होंणी पर ऐ दुज़ै मांहणु रै मना री बजहा न सा। कोई बै ऐ नी बोलणा चेहिऐ कि ज़ो हांऊँ केरा सा सौ गलत सा, किबैकि सौ आपु सोच़ा सा कि ऐ गलत सा।

³⁰अगर हांऊँ खाँणा धन्यवाद केरनै न बाद खा सा, ता फिरी ज़ुणी री तैंईंयैं मैं धन्यवाद धिना तेथा री तैंईंयैं मेरी बदनामी किबै होआ सा?

³¹आखरी न हांऊँ ऐ बोलणा चाहा कि, चाहे तुसै खालै, चाहे पिया, चाहे ज़ो किछ़ केरलै, सैभ किछ़ परमेश्वरै री महिमा री तैंईंयैं केरा।

³²तुसरी ज़िन्दगी ऐण्ढी होंणी चेहिऐ कि तुसै न यहूदी, न होरी ज़ाति, होर न परमेश्वरै री मण्डली री तैंईंयैं परेशानी री बजहा बणा।

³³हांऊँ हमेशा दुज़ै बै खुश केरनै री कोशिश केरा सा न कि आपणै आपा बै, होर हांऊँ ऐण्ढा ऐसा आशा न केरा सा कि बोहू लोका री मुक्ति हो।