Read Pahari, Kullu 1 कुरिन्थियों 12 Bible Online

1 कुरिन्थियों 12 - Pahari, Kullu bible

1 कुरिन्थियों 12

¹हे सैभ भाइयो, बैहणियो हांऊँ च़ाहा सा कि तुसै आत्मिक वरदाना रै बारै न जाँणा कि कैण्ढै तेइरा इस्तेमाल केरना।

²तुसै जाँणा सी, कि ज़ैबै तुसै होरी ज़ाति ती, ता ज़ैण्ढै गूंगी मूर्ति रै पिछ़ै चलाऐ जा ती तैण्ढै चला सी।

³तैबै हांऊँ तुसाबै समझाणा चाहा सा ज़ो कोई परमेश्वरा री पवित्र आत्मा री अगुवाई न चला सी, सौ नी बोली सकदा कि, “यीशु श्रापित हो” होर पवित्र आत्मा रै ज़रियै ही बोली सका सा कि, “यीशु ही प्रभु सा।”

⁴आत्मिक वरदान ता कई किस्मा रै सी, पर ऐकै पवित्र आत्मा सा ज़ो सैभी वरदाना रा स्रोत सा।

⁵होर सेवा भी कई किस्मा री सा ज़ो आसै प्रभु री तैंईंयैं केरा सी, पर आसै सैभ ऐकै प्रभु री सेवा केरा सी।

⁶कई तरीकै न परमेश्वर आसरी ज़िन्दगी न कोम केरा सा, पर सौऐ परमेश्वर आसा सैभी रै ज़रियै कोम केरा सा।

⁷आसा मौंझ़ै न हर एकी बै आत्मिक वरदान धिना सा, ताकि आसै एकी दुज़ै री मज़त केरलै।

⁸परमेश्वरा री आत्मा ऐकै मांहणु बै बुद्धि न भौरुआन्दा सन्देश बोलणै रा वरदान देआ सा, सौऐ आत्मा दुज़ै मांहणु बै ज्ञाना न भौरुआन्दा सन्देश बोलणै रा वरदान देआ सा।

⁹सौऐ आत्मा एक मांहणु बै प्रभु न बड़ा बशाह केरनै रा वरदान देआ सा होर दुज़ै बै आत्मा रै ज़रियै बीमारा बै ठीक केरनै रा वरदान देआ सा।

¹⁰फिरी सौऐ आत्मा कौसी बै सामर्था रै कोम केरनै री शक्ति होर कौसी बै भविष्यवाणी री, होर कौसी बै आत्मा री परखा री, होर कौसी बै कई किस्मा री भाषा री, होर कौसी बै भाषा रा मतलब दसणै रा वरदान धिना सा।

¹¹ऐ सैभ वरदान सौऐ पवित्र आत्मा रा कोम सा सौ हर विश्वासी बै आपणी इच्छा रै मुताबक वरदान देआ सा।

¹²किबैकि ज़ैण्ढी तैरहा आसरै शरीरा न कई किस्मा रै अलग-अलग औंग सी होर सैभी औंगा रा अलग-अलग कोम सा फिरी भी आसै सैभ विश्वासी कठै मसीह न एक शरीरा रै बराबर सी।

¹³तैण्ढी तैरहा न आसै सैभ चाहे यहूदी, या होरी ज़ाति, चाहे गुलाम या आज़ाद सैभी रा ऐकै पवित्र आत्मा रै ज़रियै बपतिस्मा हुआ सा ताकि एक शरीर बणी सकै, होर आसै सैभी आँध्रै सौऐ पवित्र आत्मा सा।

¹⁴किबैकि शरीरा न ऐकै औंग नी, पर बोहू सारै सी।

¹⁵अगर टाँग बोलली, “हांऊँ हौथ नी ऑथि, तैबै हांऊँ शरीरा रा औंग नी ऑथि,” ता कि सौ ऐसा बजहा न शरीरा रा नी ऑथि?

¹⁶होर अगर कोन बोलला, “हांऊँ औछ़ी नी ऑथि,” तैबै हांऊँ शरीरा रा औंग नी ऑथि, तैबै कि सौ ऐसा बजहा न शरीरा नी ऑथि?

¹⁷अगर सारा शरीर औछ़ी ही होली ता शुणना कौखै न होंणा ती? अगर सारा शरीर कोन होन्दा ता सूंघणा कौखै न होंणा ती?

¹⁸पर सच़िऐ परमेश्वरै सैभ औंग आपणी मर्जी रै मुताबक एक-एक केरिया शरीरा न रखी रै सी।

¹⁹अगर शरीरा न ऐकै औंग होन्दा, ता ऐ शरीर नी होन्दा।

²⁰पर ऐबै औंग ता बोहू सी, पर शरीर ऐकै सा।

²¹औछ़ी हौथा बै नी बोली सकदी, “मुँभै तेरी ज़रूरत नी ऑथि,” होर न मुँडी टाँगा बै बोली सकदी, “मुँभै तेरी जरुर नी ऑथि।”

²²पर शरीरे रै किछ़ औंग ज़ुण होरी न कमज़ोर हेरिया सी, ते बोहू ही जरूरी सी।

²³होर शरीरे रै ज़ुणी औंगा बै आसै आदरै योग्य नी समझदे तिन्हां बै आसै ज़ादा आदर केरा सी; होर आसरै शोभले नी लागणु आल़ै औंग होर भी शोभले होआ सी।

²⁴फिरी भी आसरै शोभले औंगा बै ऐथा री जरूरत नी, पर परमेश्वरै शरीर ऐण्ढा बणाई रा सा, कि ज़ुणी औंगा बै आदरै री कमी ती सौऐ बोहू खास बणु।

²⁵ताकि शरीरा न फूट नी हो, पर औंग एकी होरी री बराबर फिक्र केरै।

²⁶तैबै अगर एक औंग दुःख पा सा, ता सैभ औंग तेई सैंघै दुःख पा सी, होर अगर एकी औंगे री सराहना होआ सा, ता तेई सैंघै सैभ औंग खुशी मना सी।

²⁷तैण्ढी तैरहा तुसै भी मिलिया मसीही रा शरीर सी, होर तेइरै अलग-अलग औंग सी।

²⁸होर परमेश्वरै ऐई मसीह रै शरीर मतलब मण्डली न आसा सैभी बै अलग-अलग कोम केरनै री तैंईंयैं धिनै सी। पैहलै तेइयै किछ़ लोका प्रेरिता रै रूपा न चुनै, दुज़ै भविष्यवाणी केरनु आल़ा, त्रीज़ै शिक्षक, होर सामर्था रै कोम केरनु आल़ै, होर बीमारी बै ठीक केरनु आल़ै, होर दया केरनु आल़ै, होर प्रधान, होर कई किस्मा री भाषा बोलणु आल़ै।

²⁹सैभै मांहणु प्रेरित नी ऑथि। सैभै मांहणु भविष्यवाणी केरनु आल़ा नी ऑथि। सैभै मांहणु शिक्षा देणु आल़ै नी ऑथि। सैभै मांहणु सामर्था रै कोम केरनु आल़ै नी ऑथि।

³⁰सैभी मांहणु बै बीमारा बै ठीक केरनै रा वरदान नी ऑथि। सैभै मांहणु अलग-अलग भाषा नी बोली सकदै।

³¹सैभे मांहणु अनुवाद नी केरी सकदै। तुसै बड़ै न बड़ै वरदाना री धुना न रौहा! पर हांऊँ तुसाबै होर भी सैभी न शोभली बौत दसा सा।