Read Pahari, Kullu 1 कुरिन्थियों 13 Bible Online

1 कुरिन्थियों 13 - Pahari, Kullu bible

1 कुरिन्थियों 13

¹अगर हांऊँ मांहणु, होर स्वर्गदूतै री भाषा बोलणु, होर झ़ुरी नी केरनु, ता हांऊँ ठनठणांदा पीतल, होर झनझणादी झंझरी सांही सा।

²होर अगर हांऊँ भविष्यवाणी केरनु, होर सैभ रहस्या होर सभी तैरहा रै ज्ञाना बै समझनु, होर मुँभै औखै तैंईंयैं बशाह होला, कि हांऊँ ढौगा बै हटाला, पर झ़ुरी नी केरनु, ता हांऊँ किछ़ भी नी ऑथि।

³अगर हांऊँ आपणी पूरी ज़ायदात (दौलत) गरीबा बै खियानु, या आपणा शरीर फुकिणै री तैंईंयैं देंनु, होर झ़ुरी नी केरनु, ता मुँभै किछ़ भी फाईदा नी ऑथि।

⁴झ़ुरी धीरजवान सा; होर कृपालु सा, झ़ुरी डाह नी केरदी; झ़ुरी आपणी सराउथी नी केरदी, होर फूलदी नैंई।

⁵झ़ुरी दुज़ै री बेइज़ती नी केरदी, झ़ुरी आपणी भलाई नी च़ाँहदी, झुँझलांदी नी, बुरा नी मनदी।

⁶झ़ुरी पापा न खुश नी होन्दी, पर सच़ाई न खुश होआ सा।

⁷सौ सैभ गैला सौहा सा, सौ सैभी गैला रा बशाह केरा सा, सैभी गैला री आशा केरा सा, सैभी गैला न धीरज रखा सा।

⁸झ़ुरी कैधी खत्म नी होंदी; भविष्यवाणी ता खत्म होंणी, भाषा होली ता ते भी खत्म होंदी रोहणा; ज्ञान होला ता सौ भी खत्म होंणा।

⁹आसै सैभ किछ़ नी ज़ाणदै होर आसरी भविष्यवाणी अधूरी सा।

¹⁰पर ज़ैबै सर्वसिद्ध ऐणा, ता अधूरा खत्म होंणा।

¹¹ज़ैबै हांऊँ शोहरु ऐ ती, ता हांऊँ शोहरु सांही बोला ती, होर शोहरु सांही मन ती शोहरु सांही समझ ती; पर ऐबै स्याणा हुआ सा, ता शोहरु सांही गैला छ़ौड़ी धिनी।

¹²ऐबै आसाबै ज़ो परमेश्वरा रै बारै न हेरिया सा सौ शीशे न धुँधला हेरणै सांही सा, पर बादा न आसै सौ आमनै सामनै हेरना सा। होर ऐई बौगता आसै सैभ किछ़ नैंई ज़ाणदै पर तेई बौगता आसै सैभ किछ़ ज़ाणना, ज़ैण्ढा परमेश्वर आसाबै पूरी तैरहा समझा सा।

¹³त्राऐ च़ीजा सी ज़ुणियै हमेशा तक बणी रौहणा सा बशाह, आशा होर झ़ुरी। पर इन्हां सैभी मौंझ़ै सैभी न बड़ी झ़ुरी ही सा।