Read Pahari, Kullu 1 कुरिन्थियों 2 Bible Online

1 कुरिन्थियों 2 - Pahari, Kullu bible

1 कुरिन्थियों 2

¹हे विश्वासी भाइयो, बैहणियो, हांऊँ तुसा हागै च़लाकी सैंघै गैला केरदा नैंई आऊ, न ही आपणी बुद्धि रा बड़ा दिखावा केरदा आऊ, पर हांऊँ तैबै आऊ ताकि परमेश्वरा रा भेद प्रगट केरनु।

²किबैकि मैं ऐ प्रण केरू ती कि तुसाबै यीशु मसीह होर तेइरी क्रूसा पैंधै हुई मौऊती रै अलावा किछ़ होर न सिखानू।

³हांऊँ कमज़ोर होर डौरा सैंघै, होर बड़ै कोमदैआ तुसा सैंघै रौहू।

⁴ज़ैबै मैं तुसा मौंझ़ै प्रचार केरू मैं ऐ साबित नैंई केरू कि हांऊँ बड़ा बुद्धिमान सा। मैं सिर्फ़ ऐ कोशिश केरी कि परमेश्वरा री आत्मा आपणी शक्ति रिहाए।

⁵तैबै कि तुसरा बशाह मांहणु रै ज्ञाना पैंधै नैंई, बल्कि परमेश्वरा री शक्ति पैंधै निर्भर हुआ लोड़ी।

⁶फिरी भी ज़ो लोका आत्मा न मजबूत सी तिन्हां बै आसै ज्ञान शुणा सी पर ऐई दुनिया रा होर दुनिया रै नाश होणु आल़ै हाकिमा रा ज्ञान नैंई, ज़ो पल भरा रा सा।

⁷पर आसै परमेश्वरा रा सौ गुप्त भेदा रा ज्ञान, गुप्त रीति न दसा सी, ज़ो परमेश्वरै दुनिया बनाणै न पैहलै आसरी महिमा री तैंईंयैं ठहराहुन्दा सा।

⁸दुनिया रै हाकिमा ऐई ज्ञाना रै बारै न किछ़ नैंई जाणदै, अगर जाणदै ता महिमामय प्रभु बै क्रूसा पैंधै नैंई चढ़ाँदै।

⁹पर ज़ैण्ढा कि पवित्र शास्त्रा न लिखूंदा सा कि, “ज़ो गैला औछियै नैंई हेरू, होर कोनै नैंई शुणु, होर ज़ो गैला मांहणु रै मैना न नैंई ऑथि, सौ ऐ सा ज़ो परमेश्वरै आपणै झ़ुरी डाहणु आल़ै री तैंईंयैं त्यार केरी सा।”

¹⁰पर परमेश्वरै तिन्हां बै आपणै पवित्र आत्मा रै ज़रियै आसा प्रेरिता पैंधै जाहिर केरू; किबैकि आत्मा सैभ गैला, मतलब परमेश्वरै री गहरी गैला भी परखा सा।

¹¹मांहणु मौंझ़ै कुण कोई मांहणु री गैला बुझा सा, सिर्फ़ मांहणु री आत्मा ज़ो तेईन सा। तैण्ढै ही परमेश्वरै री गैला भी कोई नैंई जाणदा, सिर्फ़ परमेश्वरै री आत्मा।

¹²पर आसै दुनिया रै लोका सांही नैंई सोच़दै, पर आसै सौ आत्मा पाई सा, ज़ो परमेश्वरा री तरफा न सा, कि आसै तिन्हां गैला बै बुझ़ै, ज़ुण परमेश्वरै आसाबै धिनी सा।

¹³आसरा हरेक शब्द ज़ो आसै बोला सी परमेश्वरा री आत्मा रै ज़रियै सिखाहुन्दा सा होर मांहणु री बुद्धि रै ज़रियै नैंई। ऐ परमेश्वरा री आत्मा आसरी मज़त केरा सा कि आसै आत्मिक गैला बै आत्मिक लोका बै सिखाऐ।

¹⁴पर लोका ज़ो आत्मिक नैंई ऑथि परमेश्वर री आत्मा ज़रियै सच़ाई बै प्राप्त नैंई केरी सकदै। तिन्हरी तैंईंयैं ऐ सैभ मूर्खता सैंघै भौरुआन्दा सा होर ते समझी नैंई पांदै किबैकि आत्मिक मांहणु आत्मा री गैला बै समझी सका सी।

¹⁵ज़ुणी लोकै पवित्र आत्मा प्राप्त केरी ते पवित्र आत्मा ज़रियै सिखाहुन्दी गैला बै समझी सका सी। पर ज़ुणी लोकै पवित्र आत्मा नैंई पाई ते तिन्हां लोका रै बिचारा बै नैंई समझी सका सी ज़ुणी आँध्रै पवित्र आत्मा सा।

¹⁶किबैकि, “प्रभु रा मन कुणिऐ जाणु सा, कि तेइबै सिखालै?” पर आसा न मसीह रा मन सा।