Read Pahari, Kullu 1 कुरिन्थियों 3 Bible Online

1 कुरिन्थियों 3 - Pahari, Kullu bible

1 कुरिन्थियों 3

¹हे विश्वासी भाइयो होर बैहणियो हांऊँ तुसा सैंघै ऐण्ढी तैरहा गैला नैंई केरी सकदा, ज़ैण्ढै आत्मिक लोका सैंघै; पर ज़ैण्ढै संसारिक लोका सैंघै, होर तिन्हां सैंघै ज़ो मसीह न बच्चे सी।

²मैं तुसाबै दूध पिआऊ, नाज़ नैंई खियाऊ; किबैकि तुसै तेइबै खाई नैंई सकदै ती; पर ऐबै तैंईंयैं भी खाई नैंई सका सी, मतलब मैं तुसाबै वचना री गहराई रा मतलब नैंई सिखाऊ पर सान गैला सिखाई।

³अगर तुसै विश्वासी सी फिरी बी तुसरा बर्ताव अविश्वासी सांही सा। हांऊँ ऐ जाँणा सा, किबैकि तुसा मौंझ़ै न बोहू सारै जलन रैखा सी होर एकी दूजै सैंघै ऐबै लड़दै-झगड़दै रौहा सी होर अविश्वासी सांही न्याय केरा सी।

⁴किबैकि ज़ैबै एक बोला सा, हांऊँ पौलुसा रा सा, होर दुज़ा, “हांऊँ अपुल्लोस रा सा,” ता कि तुसै दुनिया रै मांहणु सांही नैंई?

⁵अपुल्लोस होर हांऊँ पौलुस आम सेवक सा ज़ुणियै तुसै बै बशाह न आंणनै री मज़त केरी, पर प्रभु सा ज़ुणियै सैभ किछ़ केरू।

⁶मैं तुसाबै परमेश्वरा रा सन्देश शुणाऊ होर अपुल्लोसै तुसाबै बशाह न मजबूत होंणै री तैंईंयैं शिक्षा धिनी, पर परमेश्वरै तुसाबै आत्मिक रूपा न बढ़नै री शक्ति धिनी।

⁷तैबै न ता सन्देश शुनाणु आल़ा बड़ा सा, होर न शिक्षा देणु आल़ा, पर परमेश्वर सैभ किछ़ सा ज़ो बढ़ाणु आल़ा सा।

⁸शुनाणु आल़ै होर शिक्षा देणु आल़ै दूई रा मकसद एकै सा; होर इन्हां दुऐ आपणी मेहनता रै मुताबक परमेश्वरा न ईनाम पाणा।

⁹किबैकि आसै परमेश्वरा रै सैंघी सी होर कुरन्थी शैहरा न रौहणु आल़ै तुसै विश्वासी एक छेता सांही सी ज़ो परमेश्वरा रा सा, होर ऐ भी कि हांऊँ तुसरी तुलना तेई घौरा सैंघै केरी सका सा ज़ुणिबै परमेश्वर बणांदा लागा सा।

¹⁰मैं बुद्धिमानी सैंघै कोम केरू ज़ो परमेश्वरा मुँभै केरनै बै धिनु ती; मैं तुसरै शैहरा न खुशी रा समाद प्रचार केरू होर तुसा मौंझ़ै न पैहलै लोका बै यीशु पैंधै बशाह केरनै न मज़त केरी। एथा न बाद दुज़ै मसीह रै सेवकै, ज़ो कोम जारी रखु सौ मैं शुरू केरू ती। पर आसा मौंझ़ै न सैभ सेवका बै ध्याना सैंघै विचार केरना चेहिऐ कि आसाबै परमेश्वरा रा कोम कैण्ढा केरना।

¹¹ऐई घौरा बै ज़ो परमेश्वरा बणांदा लागा सा यीशु मसीह तेई घौरा री मनियादी सांही सा। सौऐ एकमात्र मनियाद सा ज़ुणिरा रा मतलब, यीशु मसीह ही एक बौत सा ज़ुणिरै ज़रियै लोका परमेश्वरा बै जाँणा सी।

¹²अगर मसीह रै सेवक सही शिक्षा सिखा सी ज़ो परमेश्वरै तिन्हां बै धिनी सा ता ते ऐण्ढा घौर बनाणु आल़ै सांही सी ज़ुणिरी री मनियाद सुना, च़ाँदी होर कीमती पात्थर ज़ैण्ढी शोभली किस्मा री च़ीज़ा रै ज़रियै बणाईया सा। पर अगर ते झ़ूठी शिक्षा देआ सी ता ते ऐण्ढै घौर बनाणु आल़ै सांही सी ज़ुणिरी मनियाद गाह, लकड़ी भूज़ा सांही खराब किस्मा च़ीज़ा रै ज़रियै बणाईया सा।

¹³ज़ो भी आसै ऐई मनियादी पैंधै बणा सी सौ न्याय रै रोजा न औगी सैंघै परेखिणा। तैबै सैभी लोका बै पता लागणा कि आसै सूना, च़ाँदी होर कीमती पात्थरा या लकड़ी, गाह होर भूज़ै रा इस्तेमाल केरू सा।

¹⁴अगर ज़ो किछ़ आसै ऐसा मनियादी पैंधै केरू सा नैंई फ़ुकीला ता आसाबै ईनाम मिलणा।

¹⁵अगर मसीह बोला सा कि कोई एकी मांहणु रा कोम ज़ो तेइयै केरू सा शोभला नैंई ऑथि ता मसीहै तेई मांहणु बै ईनाम नैंई देणा। हालांकि, तेई मांहणुऐ परमेश्वरा री धिनीदी हमेशा री ज़िन्दगी नैंई खोणी।

¹⁶कि तुसै नैंई जाणदै कि तुसै परमेश्वर रा मन्दिर सी, होर परमेश्वर री आत्मा तुसा न रौहा सा?

¹⁷अगर कोई परमेश्वरै रै मन्दिरा बै नाश केरला ता परमेश्वर तेइबै नाश केरला; किबैकि परमेश्वर रा मंदिर पवित्र सा, होर सौ तुसै सी।

¹⁸कोई आपणै आपा बै धोखा न देआ : अगर तुसा मौंझ़ै कोई ऐई दुनिया री गैला न आपणै आपा बै ज्ञानी बूझा सा, ता सौ ऐई दुनिया री गैला न मूर्ख बणै ताकि सौ ज्ञानी हो।

¹⁹किबैकि ऐई दुनिया रा ज्ञान परमेश्वर रै नेड़ मूर्खता हे, ज़ैण्ढा कि पवित्र शास्त्रा न लिखुन्दा सा, “सौ ज्ञानी बै तिन्हरी च़लाकी सैंघै फसा सा,”

²⁰होर शास्त्र ऐ बोला सा, “प्रभु ज्ञानी रै बिचारा बै जाँणा सा, कि सौ बेकार सी।”

²¹ज़ो किछ़ कोइयै केरू सा तेथा रै बारै न डींग मारना बन्द केरा। पौलुस, अपुल्लोस होर पतरस तुसा सैभी रा सा। असली न, दुनिया, ज़िन्दगी, मौऊत, ऐणु आल़ा होर होणु आल़ा सैंघै सैभ किछ़ तुसरा सा।

²³होर तुसै मसीह रै सी, होर मसीह परमेश्वर रा सा।