Read Pahari, Kullu 1 कुरिन्थियों 6 Bible Online

1 कुरिन्थियों 6 - Pahari, Kullu bible

1 कुरिन्थियों 6

¹ज़ैबै तुसरा दुज़ै विश्वासी सैंघै लड़ाई होली ता, तुसाबै फैसला केरनै री तैंईंयैं अधर्मी न्यायधीशा हागै ज़ाणै री कोई ज़रूरत नी ऑथि। तुसरै झ़गड़ै रै बारै न फैसला केरनै री तैंईंयैं तुसाबै मण्डली रै होरी विश्वासी बै पूछ़णा चेहिऐ।

²कि तुसै नी जाणदै कि पवित्र लोका दुनिया रै लोका रा न्याय केरना? ज़ैबै तुसाबै दुनिया रै लोका रा न्याय केरना सा ता कि तुसा होछ़ी न होछ़ी लड़ाई रा न्याय केरनै रै लाइक नैंई?

³कि तुसै नी जाणदै कि आसा स्वर्गदूता रा फैसला केरना? ता कि दुनिया री गैला रा फैसला नी केरना?

⁴अगर तुसाबै दुनिया री गैला रा फैसला केरना हो, ता कि ते बशाणै ज़ो मण्डली न किछ़ नी समझी ज़ाँदै?

⁵हांऊँ तुसाबै शर्मिंदा केरनै री तैंईंयैं ऐण्ढा बोला सा। कि सच़िऐ तुसा मौंझ़ै न एक भी बुद्धिमान नी मिलदा, ज़ो आपणै सैंघी विश्वासी रा फैसला केरी सकला?

⁶बल्कि एक विश्वासी दुज़ै विश्वासी रै खिलाफ़ मुकदमा केरा सा, होर सौ भी अविश्वासी लोका रै सामनै।

⁷औखै तक कि एकी दुज़ै सैंघै ऐण्ढा मुकदमा भी तुसरी तैंईंयैं एक हार सा। अन्याय बै स्वीकार किबै नैंई केरै होर ऐ तौखै छ़ौड़ै? आपु बै धोखा किबै नी दै?

⁸बल्कि तुसै ता आपु गलत सी होर आपणै सैंघी विश्वासी बै भी धोखा देआ सी, होर सौ भी आपणै सैंघी विश्वासी रा।

⁹कि तुसै नी जाणदै कि अन्यायी लोका परमेश्वरा रै राज्या रै हकदार नैंई होंणा? धोखा मता खाऐ; न वेश्या, न मूर्तिपूजा केरनु आल़ै, न व्यभिचारी, न लुचै, पुरुषगामी,

¹⁰होर न च़ोर, न लालची, न नशेड़ी, न गाल़ी देणु आल़ै, न ठगणु आल़ै परमेश्वरै रै राज्य रै हकदार होंणा।

¹¹होर तुसा मौंझ़ै केतरै लोका पैहलै ऐण्ढै ती, पर तुसै प्रभु यीशु मसीह रै अधिकारा न होर आसरै परमेश्वरा री आत्मा न आपणै पाप धोऐ होर पवित्र हुये होर धर्मी ठहरै।

¹²तुसै बोली सका सी कि सैभ चीज़ा मेरी तैंईंयैं शोभली ता सी, किबैकि हांऊँ एक विश्वासी सा, पर सैभ चीज़ा फायदै री तैंईंयैं नी ऑथि, सारी चीज़ा मेरी तैंईंयैं शोभली सी, पर मूँ कौसी भी गैला रा गुलाम नी बणना।

¹³तुसै बोली सका सी रोटी पेटा री तैंईंयैं, होर पेट रोटी री तैंईंयैं सौ सच़ सा, पर परमेश्वरा आसरै पेट होर रोटी दुऐ नाश केरनै। शरीर व्यभिचारे री तैंईंयैं नी, पर प्रभु री तैंईंयैं सा, होर प्रभु शरीरै री तैंईंयैं सा।

¹⁴होर परमेश्वरै आपणी शक्ति सैंघै आसरा प्रभु यीशु मूँऐंदै न ज़िन्दा केरू, तैण्ढै आसै भी मूँऐंदै न ज़िन्दै केरनै।

¹⁵कि तुसै नी जाणदै कि तुसरा शरीर मसीह रा औंगा सा? ता कि मूँ मसीह रा औंग लेईया तिन्हां बै वेश्या रा औंग बनाणा? कैधी भी नैंई।

¹⁶कि तुसै नी जाणदै, ज़ो कोई वेश्या सैंघै रिश्ता बणा सा, सौ तेसा सैंघै एक शरीर होआ सा? किबैकि शास्त्रा न लिखु सा: “तिन्हां दुई एक शरीर होंणा।”

¹⁷होर ज़ो प्रभु री संगता न रौहा सी, सौ तेई सैंघै एक आत्मा होआ सा।

¹⁸व्यभिचारा न बचिया रौहा; कोई दुज़ा पापा शरीरा बै ऐतरा स्पष्ट रूपा न प्रभावित नैंई केरदा ज़ैण्ढै ऐ केरा सा, पर व्यभिचार केरनु आल़ा आपणै ही शरीरा रै खिलाफ़ पाप केरा सा।

¹⁹कि तुसै नी जाणदै, कि तुसरा शरीर पवित्र आत्मा रा मन्दिर सा, ज़ो तुसा न बसु होंदा सा होर तुसाबै परमेश्वरै री तरफा न मिलू सा; होर तुसै आपणै नी ऑथि?

²⁰किबैकि ज़ैबै परमेश्वरै यीशु बै भेज़ू ता तेइयै तुसरी तैंईंयैं एक बड़ी कीमत धिनी सा, तैबै आपणै शरीरा सैंघै परमेश्वरै री महिमा केरा।