Read Pahari, Kullu 1 कुरिन्थियों 8 Bible Online

1 कुरिन्थियों 8 - Pahari, Kullu bible

1 कुरिन्थियों 8

¹ऐबै तेई सवाला रै बारै न ज़ो तुसै मूर्ति रै सामनै बलि केरूईदी च़ीजा रै बारै पुछ़ू सा। हाँ आसै जाँणा सी कि आसा सैभी बै ज्ञान सा ऐई सवाला रै बारै न, ज्ञान आसा आपणै आपा रै बारै न घमण्ड महसूस करवा सा, पर झ़ुरी ही मण्डली बै मज़बूत करवा सा।

²ज़ो मांहणु सोचा सी कि आसै सैभ किछ़ जाँणा सी असली न सौ किछ़ नी ज़ाणदै।

³ज़ो मांहणु परमेश्वरा सैंघै झ़ुरी केरा सा, ता परमेश्वर तेइबै पछ़ियाणा सा।

⁴आसै जाँणा सी कि मूर्ति रै सामनै बलि केरूईदी च़ीजा बै खाँणै रै बारै न, मूर्ति दुनिया न कोई परमेश्वर नैंई ऑथि, पर ऐकै सच़ा परमेश्वरा सा।

⁵फिरी भी आसमाना मौंझ़ै होर धौरती पैंधै बोहू सारै ईश्वर कहलाइया सी ज़ैण्ढै कि बोहू सारै ईश्वर होर प्रभु सी।

⁶तैबै भी आसरी तैंईंयैं ता ऐकै परमेश्वर सा: मतलब आसरा पिता ज़ुणिरी तरफा न सैभ च़ीज़ा सी, होर आसै भी तेई रै सी। होर ऐकै प्रभु सा, मतलब यीशु मसीह, ज़ुणियै सैभ च़ीजा बणाई, होर आसाबै भी तेइरै ज़रियै ज़िन्दगी मिली सा।

⁷पर सैभ विश्वासी ऐई गैला बै नी ज़ाणदै, पर किछ़ मांहणु सोचा सी कि मूर्ति ही सच़ सा, होर ज़ो मूर्ति रै सामनै बलि केरूईदी च़ीजा बै खा सी ता ते ऐ सोचा सी कि ऐ सच़ै ईश्वरा री आराधना सा, होर ज़ुणी सैंघै तिन्हरा मन अशुद्ध होआ सा।

⁸खाँणा-पिणा आसाबै परमेश्वरा हागै नी नैंई सकदा। अगर आसै नी खालै, ता आसरा किछ़ नुकसान नी होंणा, होर खालै ता आसरा किछ़ फाईदा भी नी ऑथि।

⁹पर साबधान रौहा, कि ऐण्ढा नी लोड़ी हुआ, कि तुसरी आज़ादी ज़ो बशाह न कमज़ोर सी पापा न पौड़नै रा मौका देला।

¹⁰मना कोई मांहणु रा मन कमज़ोर सा होर सौ तुसाबै ज़ुणी हागै ऐ ज्ञान सा कि कोई भी मूर्ति रै मन्दिरा न रोटी खाँदै हेरला, कि तेइबै मूर्ति रै सामनै बलि केरूईदी च़ीजा बै खाँणै री हिम्मत नी होंणी?

¹¹ऐण्ढी तैरहा तेरै खरै ज्ञाना री बजहा न सौ कमज़ोर विश्वासी भाई ज़ुणिरी तैंईंयैं मसीह मौरू सा, तेई मसीह न बशाह केरनै न रुकणा।

¹²ऐण्ढी तैरहा तुसै एकी दुज़ै विश्वासी भाई रै बरोधा न पाप केरा सी, होर तिन्हां बै ऐई कोमा केरनै री तैंईंयैं उत्साहित केरा सी ज़ो तिन्हां बै पता सा कि सौ गलत सा ता तुसै मसीह रै बरोधा न पाप केरा सी।

¹³ऐण्ढी तैरहा अगर मेरै खाँणै री बजहा न कोई विश्वासी पापा न पौड़नै री बजहा बणा सा ता मूँ ज़ैबै तक ज़िन्दा सा दबारा मांस नी खाँणा किबैकि हांऊँ नी च़ाँहदा कि मेरी बजहा न कोई होरी विश्वासी बै ठेस लागै।