Read Pahari, Kullu 1 कुरिन्थियों 9 Bible Online

1 कुरिन्थियों 9 - Pahari, Kullu bible

1 कुरिन्थियों 9

¹हांऊँ आज़ाद सा ज़ो हांऊँ चाहा सा केरनै री तैंईंयैं। हांऊँ एक प्रेरित सा। मैं प्रभु यीशु हेरू सा होर तेई पैंधै बशाह केरनै री तैंईंयैं तुसरी अगुवाई केरी सा।

²अगर दुज़ै लोक बशाह केरनै बै त्यार नैंई कि हांऊँ प्रभु यीशु रा प्रेरित सा, पर तुसै विश्वासी भाई, बैहणियो बै बशाह ज़रूर केरना चेहिऐ। किबेकी हांऊँ सौऐ मांहणु सा ज़ुणियै खुशी रा समाद तुसा हागै आंणु। तुसरा यीशु मसीह न बशाह ऐ साबित केरा सा कि हांऊँ पूरी तैरहा न तेइरा प्रेरित सा।

³ज़ो लोका मेरै प्रेरित होंणै रै अधिकारा रै बारै न सवाल केरा सी तिन्हरी तैंईंयैं मेरा ऐ ज़वाब सा।

⁴मेरै होर बरनबासा री तैंईंयैं प्रेरित होंणै रै नातै ऐ अधिकार ज़रूर सा कि तुसा न आपणी सेवकाई री तैंईंयैं खाँणा होर आर्थिक मज़त लेई सकै।

⁵ज़ैण्ढै दुज़ै प्रेरित होर प्रभु रै भाई होर पतरस आपणी लाड़ी बै सैंघै नेआ सी सफरा रै दौरान, मूँ हागै भी अधिकार सा कि हांऊँ भी मसीह बेटड़ी न ब्याह केरनु होर आपु सैंघै नेहनू।

⁶कि सिर्फ़ मुँभै होर बरनबासा बै ही कोम केरना ज़रूरी सा आपणी ज़रूरत बै पूरा केरनै री तैंईंयैं?

⁷कोई कैधी आपणा खर्च़ा केरिया सपाई रा कोम केरा सा? कुण अँगूरा रा बगीच़ा लाईया तेथा रा फ़ौल नी खाँदा? कुण सा ज़ो भेड़ै रै छ़ुण्डा रा पौहरा केरिया तिन्हां रा दूध नी पिन्दा?

⁸हांऊँ ऐ गैला मांहणु रै विचारा रै मुताबक नैंई बोलदा। कि ऐही गैला मूसा रै बिधाना न नैंई लिखीदी सा?

⁹किबैकि मूसै रै बिधाना न लिखु होंदा सा, “खौल फेरदी घेरै बौल्दा रा मुँह हेरी बौनदा।” कि परमेश्वर बौल्दे री ही फिक्र केरा सा?

¹⁰नाँह, ऐ खास केरिया आसरी तैंईंयैं भी बोलू सा होर लिखु सा। किबैकि खरा ऐ सा, कि बाह्णु आल़ा आशा सैंघै बाहा सा, होर मोंडणु आल़ा हिस्सेदार होंणै री आशा न मोंडदा रौहला।

¹¹ता ज़ैबैकि आसै तुसाबै खुशी रा समाद शुणाऊ, एथा रै बदलै आसै तुसा न आर्थिक मज़त लेई ता कि ऐ तुसरी तैंईंयैं मुश्किल गैल सा?

¹²अगर तुसै तुसा मौंझ़ै प्रचार केरनु आल़ै री मज़त केरी, ता कि तिन्हां न बढ़ी केरिया ऐतरा भी अधिकार नैंई ऑथि कि तुसै आसरी मज़त केरलै? पर आसै सैभ किछ़ सौहणै री त्यार हुऐ ताकि मसीह रै खुशी रै समादा पैंधै बशाह केरनै री तैंईंयैं कोई रुकावट न हो।

¹³तुसै शोभली तैरहा जाँणा सी कि ज़ो मन्दिरा न सेवा केरा सी तिन्हां बै मन्दिरा न खाँणा मिला सा होर ज़ो बेदी री सेवा केरा सी तिन्हां बै बेदी रा हिस्सा मिला सा।

¹⁴ऐण्ढी तैरहा प्रभुऐ भी ठहराऊ, कि ज़ो मांहणु खुशी रा समाद शणा सी, तिन्हरी ज़रूरता तिन्हां लोक रै ज़रियै पूरी केरूई लोड़ी ज़ो खुशी रा समाद शुणा सी।

¹⁵पर मैं इन्हां मौंझ़ै न कोई भी अधिकार इस्तेमाल नी केरू, होर मैं ता ऐ गैला तैबै नी लिखी, कि मेरी तैंईंयैं ऐण्ढा केरू लोड़ी, किबैकि एथा न ता मेरा मौरना खरा सा किबैकि मुँभै ऐसा गैला पैंधै घमण्ड केरनै न कोई नैंई रोकी सकदा कि हांऊँ आपु आपणी हेर-शुण केरा सा।

¹⁶मुँभै कोई अधिकार नैंई कि हांऊँ खुशी रै समाद शुनाणै रै कोमा न घमण्ड केरनु। मुँभै ऐ कोम केरनै रा हुक्म मिलू सा मेरी तैंईंयैं ऐ बड़ी भयानक गैल होंणी अगर मैं खुशी रा समाद नी शुणाऊ होंदा।

¹⁷किबैकि अगर हांऊँ आपणी मर्जी न बोला सा, ता मजदूरी मुँभै मिलणी सा, पर हांऊँ एथा बै ज़िम्मैबारी समझिया केरा सा किबैकि परमेश्वरै मुँभै ऐ कोम धिनु सा।

¹⁸ता मेरी मजदूरी कि सा? सौ ऐ सा कि मुँभै मौका मिलू सा खुशी रै समादा बै मुफ्ती न शुनाणै रा तैबै ज़ैबै हांऊँ खुशी रा समाद शणा सा ता हांऊँ आपणै कोई अधिकारा री माँग नैंई केरदा।

¹⁹हांऊँ एक आज़ाद मांहणु सा होर मेरा कोई मालक नैंई ऑथि हांऊँ सैभी लोका रा गुलाम बणु सा ताकि हांऊँ बोहू लोका बै मसीह हागै आंणनु

²⁰हांऊँ यहूदी मांहणु री तैंईंयैं यहूदी बणु ताकि यहूदी मांहणु बै मसीह न आंणी सकनू। ज़ो मांहणु बिधाना रै अधीन सी हांऊँ भी तिन्हरी तैंईंयैं बिधाना रै अधीन बणु, ताकि तिन्हां मांहणु बै ज़ो बिधाना रै अधीन सी मसीह न आंणी सकनू।

²¹ज़ैबै हांऊँ होरी ज़ाति सैंघै ज़ो बिधाना रा पालन नैंई केरदै हांऊँ भी बिधाना न दूर रौहन्दा ताकि हांऊँ तिन्हां बै मसीह न आंणी सकनू, पर हांऊँ परमेश्वरा रै बिधाना बै अनदेखा नी केरदा पर हांऊँ मसीह रै बिधाना बै मना सा।

²²हांऊँ कमज़ोरा री तैंईंयैं कमज़ोर बणु, कि कमज़ोर बै मसीह न आंणनु। हांऊँ सैभी मांहणु री तैंईंयैं सैभ किछ़ बणु सा, कि कैण्ढी भी तैरहा कौसी ऐकी मांहणु बै बच़ाई सकनू।

²³होर हांऊँ सैभ किछ़ खुशी रै समादा बै फैलाणै री तैंईंयैं केरा सा, ताकि तेइरी आशीषा सैंघै हिस्सेदार होई सकनू।

²⁴तुसै जाँणा सी कि दौउड़ा न ता सैभ दौउड़ा सी, पर ईनाम एकै ही नेया सा। तुसै भी ऐण्ढै दौऊड़ा कि मसीह न ईनाम पाई सकै।

²⁵होर सैभ खिलाड़ी आपणी त्यारी रै दौरान अनुशासना न रौहा सी, एक ऐण्ढा ईनाम पाणै री ज़ुणिरा रंग रूप छ़ेकै धुँधला होंणा। पर आसै ता ऐ सैभ किछ़ तैबै केरा सी ऐण्ढा मुकट पाणै री तैंईंयैं ज़ो हमेशा तक रौहा सा।

²⁶तैबै हांऊँ सीधै तेसा आखरी लाईना धिरै दौउड़ा सा, हांऊँ तेई मुक्कैबाजा सांही नैंई ऑथि ज़ो बागरी न मुक्कै मारा सा, पर सही नशाणै न मुक्कै मारा सा।

²⁷हांऊँ आपणै शरीरा बै आपणै काबू न आंणा सा होर तेइबै हांऊँ आपणा गुलाम बणा सा; ताकि दुज़ै बै खुशी रा समाद शनाणै न बाद कोइँछ़ै हांऊँ आपणा ईनाम न खोनू।