Read Pahari, Kullu 2 कुरिन्थियों 2 Bible Online

2 कुरिन्थियों 2 - Pahari, Kullu bible

2 कुरिन्थियों 2

¹मैं आपणै मना न ऐ सोचिया रखु ती कि फिरी तुसा हागै तौखै एज़िया तुसाबै दुःख नी देनु।

²किबैकि अगर हांऊँ तुसाबै दुःखी केरनु, ता मुँभै खुशी देणु आल़ै कुण होंणा, सौहै केल्है ज़ुण मैं दुःखी केरै?

³होर मैं ऐ गैला तुसाबै तैबै लिखी सा, कि कोइँछ़ै ऐण्ढा नी लोड़ी हुआ; कि ज़ुणिबै मेरै ऐणै न खुशी मिलणी, हांऊँ तिन्हां न दुःखी होणु; किबैकि मुँभै तुसा सैभी पैंधै ऐसा गैला रा बशाह सा कि ज़ो मेरी खुशी सा, सौऐ तुसा सैभी री भी सा।

⁴बड़ै दुःख होर मना रै कष्टा न हांऊँ तुसरी तैंईंयैं बोहू रोई-रोईया ऐ चिट्ठी लिखा सा, तेथा री तैंईंयैं नी, कि तुसै दुःखी होलै, पर ऐथा री तैंईंयैं कि तुसै तेसा बोहू झ़ुरी बै ज़ाणलै, ज़ो मुँभै तुसा सैंघै सा।

⁵अगर कोइयै दुःखी केरै सी, ता मुँभै ही नी पर किछ़-किछ़ ता तुसै सैभ बी दुःखी केरै सी, कि एथा न ज़ादा हांऊँ तुसाबै किछ़ होर नी बोलणा च़ाँहदा।

⁶ऐण्ढै मांहणु री तैंईंयैं ज़ो सज़ा सैभी विश्वासीयै धिनी सा, सौ बोहू सा।

⁷तैबै ऐथा न खरा सा कि तेइबै माफ केरलै, होर शान्ति देलै, ऐण्ढा नी लोड़ी हुआ कि सौ मांहणु दुःखा न पोड़ीया रोहला।

⁸ऐसा बजहा न हांऊँ तुसा न अर्ज़ केरा सा, कि तुसै आपणी झ़ुरी रा सबूत देआ

⁹किबैकि मैं तैबै भी लिखु ती, कि तुसाबै परखणू, कि तुसै मेरी सैभी गैला बै मनणै री तैंईंयैं त्यार होलै, कि नी।

¹⁰ज़ुणिरा तुसै किछ़ माफ केरा सी ता तेइबै हांऊँ भी माफ केरा सा, किबैकि ज़ो किछ़ बी माफ केरनै री ज़रूरत सा, ज़ैबै हांऊँ केरा सा, हांऊँ ऐण्ढा मसीह रै अधिकारा सैंघै तुसरै फायदै री तैंईंयैं केरा सा।

¹¹कि शैताना रा आसा पैंधै दाव नी च़लला, किबैकि आसै तेइरी बुरी च़ाला बै ज़ांणा सी सौ आसाबै हमेशा पाप कराणै रै तरीकै री तरकीब बणा सा।

¹²हौर ज़ैबै हांऊँ मसीह रा खुशी रा समाद, शुणाणै री तैंईंयैं त्रोआस शैहरा न आऊ, होर प्रभुऐ मुँभै प्रचार केरनै रा एक बड़ा मोका धिना।

¹³हांऊँ बड़ा परेशान हुआ, ज़ैबै मैं आपणा भाई तीतुस तौखै नी हेरू, तैबै हांऊँ त्रोआस शैहरा रै विश्वासी न विदा लेइया तीतुसा बै तोपणै री तैंईंयैं मकिदुनिया प्रदेशा बै वापस आऊ।

¹⁴पर परमेश्वरै रा धन्यवाद हो, किबैकि मसीह हागै ज़ीत सा होर सौ आसरी अगुवाई केरा सा होर आसरै ज़रियै मसीह बै ज़ाणनै रै ज्ञाना री हर ज़ैगा खुशबू सांही फैला सा।

¹⁵किबैकि आसै परमेश्वरै री तैंईंयैं मसीह रै ज़रियै भकेईदै धूपा सांही सी। आसरै द्वारा फैलाऊदा सन्देश एक खुशबू सांही सा ज़ो सैभी लोका री तैंईंयैं फैलदा लागा सा, ज़ो लोका बच़ाऐंदै सी होर ज़ो लोका बच़ाऐंदै नैंई ऑथि।

¹⁶केतरै लोका री तैंईंयैं ता मौरनै रै खातर मौउती री बास, होर केतरै लोका री तैंईंयैं ज़िन्दगी री खातर ज़िन्दगी री खुशबु, होर पूरी तैरहा न कोई बी ऐसा ज़िम्मैबारी बै निभाणै रै लायक नी ऑथि।

¹⁷किबैकि आसै तिन्हां बोहू लोका सांही नी, ज़ो परमेश्वरै रै वचना बै ढैबुऐ री तैंईंयैं प्रचार केरा सी, पर आसै हमेशा परमेश्वरा री मौज़ुदगी न मसीह द्वारा इमानदारी सैंघै बोला सी।