Read Pahari, Kullu 2 कुरिन्थियों 3 Bible Online

2 कुरिन्थियों 3 - Pahari, Kullu bible

2 कुरिन्थियों 3

¹कि आसै फिरी भी आपणी सराउथी केरदै लागै? कि आसाबै केतरै लोका सांही सिफारिशे री चिट्ठी तुसा हागै लेणै री जरूरत सा?

²तुसै ऐण्ढी चिट्ठी सांही सी ज़ो हर कोई बै परमेश्वरा री तैंईंयैं मेरै कोमा री सिफारिश केरा सी, ज़ो तुसा रै दिला न लिखु हुन्दी सा, होर हर कोई एथा बै पौढ़ी सका सा होर तुसरै बिच़ा न आसरै शोभले कोमा बै पछ़ियाणी सका सी।

³ऐ प्रगट सा, कि तुसै मसीही री एक चिट्ठी सांही सी, होर ऐ चिट्ठी आसरी सेवा रा नतीज़ा ती; होर ज़ो स्याही सैंघै नी लिखदे; पर ज़िन्दै परमेश्वरै री आत्मा सैंघै पात्थरै री तख्ती (पटिया) पैंधै नी, पर दिले री मांस रूपी पटिया पैंधै लिखु सा।

⁴आसै मसीहै रै द्वारा परमेश्वरै पैंधै ऐण्ढाऐ बशाह रखा सी।

⁵ऐण्ढा नी, कि आसै आपणै आपु बै ऐथा लायक समझा सी, कि आपणी तरफा न कौसी गैला रा विचार केरी सकले; पर आसरी योग्यता परमेश्वरै री तरफा न सा।

⁶ज़ुणियै आसै नोंऊँऐं वायदै रै सेवक होंणै रै लायक भी बणाऊ सा, मूसै लिखेंदे बिधाना रै सेवक नी पर पवित्र आत्मा रै; किबैकि मूसै रा लिखूदा बिधान नी मैनणु आल़ै री सज़ा मौऊत सा, पर पवित्र आत्मा हमेशा री ज़िन्दगी देआ सा।

⁷होर पराणै वायदै मौऊत आंणी। ज़ुणिरै अक्षर पात्थरा पैंधै खोणीया लिखी रै ती, औखै तैंईंयैं महिमामय हुई, कि मूसा रै मुँहा पैंधै ज़ो प्याशे सांही च़मकदा लागी रा ती तेथा री बजहा न ज़ो कम होंदा रौहा ती, इस्राइली लोका तेई रै मुँहा बै हेरी नी सकदै।

⁸ता आत्मा रा वायदा होर भी महिमामय किबै नी होंणा?

⁹किबैकि ज़ैबै दोष लाणु आल़ा वायदा तेजोमय ती, ता धर्म केरनु आल़ा वायदा होर भी ज़ादा महिमामय किबै नी होंणा?

¹⁰होर ज़ो तेजोमय ती, सौ भी तेसा शक्ति री बजहा न ज़ो तेथा न ज़ादा महिमामय ती, किछ़ महिमामय नी हुऐ।

¹¹किबैकि मूसा रा बिधान एक महिमा सैंघै धिनु ती, ज़ो लोमे बौगता तक नी रौहु, पर नोंऊँऐं वायदै री महिमा बोहू ज़ादा सा किबैकि ऐ हमेशा री तैंईंयैं रौहा सा।

¹²ता ऐण्ढी आशा रखिया आसै हिम्मती सैंघै बोला सी।

¹³होर आसै मूसा सांही नी, ज़ुणियै आपणै मुँहा पैंधै परदा पाऊ ती कि इस्राइली लोक तेइरै मुँहा न परमेश्वरा रै च़मका बै कम होंदेआ नी हेरणा होर आखरी न सौ च़मक राशणी।

¹⁴पर ते मुर्ख बणै सी, किबैकि औज़ा तैंईंयैं पुराणै नियमा बै पौढ़दै बौगत तिन्हां रै दिला न भी सोऐ पर्दा पोड़ी रौहा सा; पर पर्दा तैबै हटा सा ज़ैबै मसीह पैंधै बशाह केरा सी।

¹⁵होर औज़ा तैंईंयैं ज़ैबै कैबै भी मूसै रा बिधाना न पौढ़ा सी, ता तिन्हां रै दिला पैंधै पर्दा पौड़िया रौहा ती होर तैबै तै पूरी तैरहा नी समझ़दै ती।

¹⁶पर ज़ैबै कैबै तिन्हां रा मन प्रभु धिरै फिरला, ता तैबै सौ पर्दा फेटै हटणा।

¹⁷प्रभु ता आत्मा सा: होर ज़ौखै कौखै प्रभु रा आत्मा सा ता तौखै बिधाना न आज़ादी सा।

¹⁸पर आसै सैभ एक ऐण्ढै मुँहा सैंघै परमेश्वरा री महिमा एक शीशै सांही छाँऊ केरा सी ज़ुणिन पर्दा नी ऑथि। परमेश्वर आसाबै हमेशा सांही बढ़दी महिमा होर च़मकदार महिमा न तेई सांही ज़ादा होंणै री तैंईंयैं बणादा लागा सा। होर ऐ परमेश्वरा रा कोम सा ज़ो पवित्र आत्मा रै रूपा न महसूस केरा सा।