Read Pahari, Kullu 2 कुरिन्थियों 4 Bible Online

2 कुरिन्थियों 4 - Pahari, Kullu bible

2 कुरिन्थियों 4

¹तैबै ज़ैबै आसा पैंधै ऐण्ढी दया हुई सा, कि आसाबै परमेश्वरा रै सन्देशा रै प्रचारा केरनै री सेवा मिली सा, तैबै ता आसै हिम्मत नी छ़ौड़दै।

²पर आसै शर्मनाक गुप्त कोम छ़ौड़ी धिनै सी, होर न च़लाकी सैंघै च़ला सी, होर परमेश्वरै रै वचना न मिलावट नी केरदै, पर सच़ाई बै प्रगट केरा सी, परमेश्वरै रै सामनै सैभी मांहणु बै बशाह सा कि आसा पैंधै बशाह केरी जाई सका सी।

³पर ज़ो खुशी रा समाद आसै प्रचार केरा सी सौ छुपूदा सा, ता ऐ नाश होंणु आल़ै री तैंईंयैं छुपूदा।

⁴ऐई दुनिया रै ईश्वर शैतानै तिन्हां अविश्वासी री बुद्धि कांणी केरी सा, ताकि तै मसीह री महिमा रै बारै न खुशी रै समादा न ऐणु आल़ै प्याशा नैंई हेरी सकलै, ज़ो ऐ रिहा सा कि परमेश्वर कैण्ढा सा।

⁵किबैकि आसै आपणै नैंई, पर मसीह यीशु रा प्रचार केरा सी, कि सौ प्रभु सा, होर तेइरै बारै न ऐ बोला सी कि आसै यीशु मसीह री बजहा न तुसरै सेवक सी।

⁶तैबै शुरुआती न परमेश्वरै बोलू, कि निहारै न प्याशा च़मकला होर परमेश्वरै आसरै दिला न एक प्याशै सांही समझ़ धिनी सा, ताकि आसै यीशु मसीह न परमेश्वरा री महिमा प्रगट केरी सकलै।

⁷पर आसै माटै रै भाण्डै सांही सी ज़ुणीन खजाना कठा केरा सी। कि ऐ बड़ी शक्ति आसरी तरफा न नी, पर परमेश्वरै री तरफा न सा।

⁸आसै च़ोहू पासै न दुःख तकलीपा ता भोगा सी, पर दुःखा न नाश नी होंदै; उलझन ता सा, पर निराश नी होंदै।

⁹सताए ता जा सी; पर छ़ौड़ी नी ज़ाँदै; शोटा ता सी, पर नाश नी होंदै।

¹⁰आसै यीशु री बजहा न हर रोज़ मौऊती रा सामना केरा सी। आसरा शरीर रिहा सा कि तेइरी मौऊत कैण्ढी ती, तैबै तेइरी ज़िन्दगी बी आसरै नाश होंणु आल़ै शरीरा न हेरी सका सी।

¹²ता एथा रा मतलब सा कि आसै लगातार मौऊती रा सामना केरदै लागै सी लेकिन एथा रा नतीज़ा ऐ सा कि तुसै हमेशा री ज़िन्दगी प्राप्त केरा सी।

¹³होर आसा न सौहै बशाह री आत्मा सा, “ज़ुणिरै बारै न पवित्र शास्त्रा न लिखुंदा सा, कि मैं बशाह केरु, तैबै हांऊँ बोला सा, आसै भी बशाह केरा सी, तेबैता बोला सी।”

¹⁴किबैकि आसै जाँणा सी, ज़ुणियै प्रभु यीशु बै मूँऐंदै न ज़िन्दा केरू सा, सौऐ आसाबै भी प्रभु यीशु रै सैंघै ज़िन्दै केरनै, होर तुसा सैंघै आसा सैभी बै बी आपणै सामनै पेश केरनै।

¹⁵किबैकि ज़ो किछ़ हुआ सा तुसरी तैंईंयैं सा ताकि ज़ादा न ज़ादा लोका जाणना कि परमेश्वर केतरा दयालु सा होर तिन्हां तेइरा धन्यवाद होर आदर केरना।

¹⁶तैबै आसै हिम्मत नैंई चोड़दै; ज़ैबैकि आसरा बाहरी मांहणु रा शरीर नाश बी होंदा जा सा, ता बी आसरा आँध्रै रा मांहणु हर रोज नोऊँआ होंदेआ जा सा।

¹⁷ऐ होछ़ी परेशानीयां आसाबै हमेशा री महिमा री तैंईंयैं त्यार केरदी लागी सा एथा रै आगै आसरी सारी परेशानी किछ़ बी नैंई होंणी।

¹⁸तैबै आसै तिन्हां परेशानी बै नैंई हेरदै; ज़ुणिबै आसा ऐबै हेरा सका सी, बल्कि आसै तिन्हां च़ीजा पैंधै नज़र पा सी। ज़ुणी चिजा बै आसै हेरा सी, तै छ़ेकै खत्म होंणी, पर ज़ुणी चिजा बै आसै हेरी नी सकदै तिन्हां हमेशा री तैंईंयैं रौहणा।