Read Pahari, Kullu 2 कुरिन्थियों 5 Bible Online

2 कुरिन्थियों 5 - Pahari, Kullu bible

2 कुरिन्थियों 5

¹किबैकि आसै जाँणा सी, कि ज़ैबै आसै शरीर रूपी डेरै न रौहा सी, ज़ो थोड़ै बौगता री तैंईंयैं आसाबै दुनिया न मिलु सा; होर ज़ैबै ऐई दुनिया रा अंत होंणा, तैबै आसाबै परमेश्वरै री तरफा न स्वर्गा न ऐण्ढा शरीर मिलणा, ज़ो हमेशा री तैंईंयैं होंणा।

²ऐथा न ता आसै बोहू दाह सौहा सी, होर बड़ी इच्छा रखा सी; कि आपणै स्वर्गा रै शरीरा बै धारण केरलै।

³कि तेथा रै लाणै सैंघै आसै कैधी नाँगै नी होलै।

⁴होर आसै ऐई शरीर रुपी डेरै न रौंहदी घेरै दुःखा रै बौझा बै सौहंदै रौहा सी, किबैकि आसै इन्हां संसारिक शरीरा बै नैंई छ़ौड़ना च़ाँहदै, लेकिन आसै चाहा सी कि परमेश्वर आसाबै स्वर्गीय शरीर दै। ताकि नाश होंणु आल़ा ऐ शरीरा हमेशा री ज़िन्दगी न बदलुआ लोड़ी।

⁵होर ज़ुणियै आसै नोंऊँऐं शरीरा री तैंईंयैं त्यार केरै सी सौ परमेश्वर सा, ज़ुणियै आसाबै बयानै न पवित्र आत्मा धिनी सा।

⁶ता आसै हमेशा हिम्मत रखा सी होर ऐ जाँणा सी; कि ज़ैबै तैंईंयैं आसै शरीरा न रौहा सी, तैबै तैंईंयैं आसै प्रभु न दूर सी ज़ो स्वर्गा न सा।

⁷आसै तेई पैंधै बशाह केरिया ज़िन्दै लागै सी, न कि तेइबै हेरिया।

⁸तैबै आसै हिम्मत रखा सी, होर ज़ैबै आसै मौरा सी ऐई शरीरा न अलग होईया प्रभु सैंघै रोहणा होर भी खरा समझा सी।

⁹ऐसा बजहा न आसरै मना रा ज़ोश सा, कि चाहे आसै तेई सैंघै स्वर्गा न रौहलै, चाहे आसै औखै ऐसा धौरती न रौहलै पर आसै तेइबै खरै लागलै।

¹⁰किबैकि जरूरी सा, कि आसा सैभी रा हाल मसीह रै न्याय सिहांसना सामनै खुलिणा सा, कि सैभे मांहणु आपणै-आपणै खरै माड़े कोमै रा बदला ज़ो तेइयै शरीरा न केरी रै सी पालै।

¹¹तैबै प्रभु रा डौर मनिया आसै लोका बै सच़ाई पैंधै बशाह केरनै री अर्ज़ा केरा सी होर परमेश्वर आसरा हाल पूरी तैरहा जाँणा सा; होर मेरी आशा ऐ सा, कि तुसै आसाबै सच़ियै ठीक ढँगै जाँणा सी।

¹²आसै फिरी भी आपणी सराउथी नी केरदै पर आसै आपणै बारै न तुसाबै घमण्ड केरनै रा मौका देया सी, कि तुसै तिन्हां बै ज़वाब देई सकले, ज़ो मना पैंधै नी, पर दिखाबटी गैला पैंधै घमण्ड केरा सी।

¹³अगर कोई बोलै कि आसै पागल सी, ता ऐ परमेश्वर होर आसा रै बिच़ा न सा। अगर आसै सही दिमागा रै सी ता ऐ तुसा री तैंईंयैं खरा सा।

¹⁴किबैकि मसीही री झ़ुरी आसाबै विवश केरा सा; तैबै ऐ पक्का सा कि ज़ैबै एक मांहणु सैभी री तैंईंयैं मूँआ ता आसै सैभे पराणी ज़िन्दगी न मूँऐ।

¹⁵होर मसीह ऐण्ढी तैरहै सैभी री तेइयै मूँआ, कि ज़ो ज़िन्दै सी, ते आगै बै आपणी तैंईंयैं नैंई ज़ीलै पर तेइरी तेइयै ज़ीलै ज़ो तिन्हरी तेइयै मूँआ होर फिरी ज़िन्दा हुआ सा।

¹⁶ता ऐबै न फेटै आसा कोई मांहणु बै बाहरली च़ीजा रै मुताबक नी समझणा, होर अगर आसै ता मसीहा बै भी बाहरली च़ीजा रै मुताबक जाँणा ती, पर ऐबै न लेईया ऐण्ढा नी जाँणना।

¹⁷अगर कोई मसीह न सा ता सौ नोंऊँई सृष्टि सा: पराणी आदत खत्म हुई सा; हेरा, तै सैभ नोंऊँई हुई सा।

¹⁸होर सैभ गैला परमेश्वरै री तरफा न सी, ज़ुणियै मसीही रै द्वारा आपु सैंघै आसरा मेल-मिलाप कराऊ सा, होर तेइयै आसाबै आपणै होर दुज़ै रै बिच़ा न मेल — मिलापे री सेवा आसाबै धिनी सा।

¹⁹मतलब परमेश्वरै मसीह न होईया आपु सैंघै दुनिया रा मेल-मिलाप केरू सा, होर लोका रै पापा रा दोष तिन्हां पैंधै नैंई लाऊ होर परमेश्वरै आसाबै मेल-मिलापा रा वचन धिना सा।

²⁰तैबै आसै मसीह रै राजदूत सी; मैना परमेश्वर आसरै द्वारा अर्ज़ केरा सा, आसै मसीही री तरफा न अर्ज़ा केरा सी, कि परमेश्वरा सैंघै मेल-मिलाप केरा।

²¹मसीहै कोई पापा नैंई केरू ती, फिरी बी तेइबै परमेश्वरै आसरी तैंईंयैं पाप ठहराऊ, कि आसै परमेश्वरा री नज़री न धर्मी बणी सकलै, किबैकि मसीहै आसा रै पापा री तैंईंयैं सज़ा भुगती।