Read Pahari, Kullu 2 कुरिन्थियों 7 Bible Online

2 कुरिन्थियों 7 - Pahari, Kullu bible

2 कुरिन्थियों 7

¹ओ प्यारो परमेश्वरा न आसाबै ज़ैबै ऐ प्रतिज्ञा मिली सा, ता एज़ा, आसै आपणै आपु बै शरीर होर आत्मै री सारी गंदगी न च़ोखै केरै, होर परमेश्वरै री डौर रखदैआ आसाबै पवित्र ज़िन्दगी ज़ीणै री पूरी कोशिश केरनी चेहिऐ।

²आसाबै आपणै दिला न ज़ैगा देया आसै कौसी सैंघै अन्याय नी केरू, न कौसी रा किछ़ बिगाड़ु, होर न कोई ठगु।

³हांऊँ तुसाबै दोषी बनाणै री तैंईंयैं ऐण्ढा नी बोलदा, किबैकि मैं ऐण्ढा पैहलै ही बोलू सा, कि तुसै आसरै दिला न ऐण्ढै बसी रै सी कि आसै तुसरी तैंईंयैं मौरने ज़ीणै री तैंईंयैं त्यार सी।

⁴हांऊँ तुसा सैंघै बड़ी हिम्मती सैंघै बोलदा लागा सा, मुँभै तुसा पैंधै बड़ा घमण्ड सा; हांऊँ बोहू शान्ति सैंघै भोरुआ सा; आपणै सारै दुःखा न हांऊँ खुशी सैंघै भरपुर रौहा सा।

⁵किबैकि ज़ैबै मैं त्रोआस शैहर छ़ौड़ू होर मकिदुनिया प्रदेशा न आऐ, तैबै भी आसाबै कोई चैन नी मिलु, पर आसै च़ोहू पासै न दुःख पा सी; बाहरै झ़गड़ै ती; आँध्रै डौर ती।

⁶फिरी भी उदास मांहणु बै शान्ति देणु आल़ै परमेश्वरै तितुसै रै ऐणै न आसाबै शान्ति धिनी सा।

⁷होर न आसाबै केल्है पर तेइरी तेसा शान्ति न भी, ज़ो तेइबै तुसरी तरफा न मिली ती; हौर तेइयै तुसरी इच्छा, होर तुसरै दुःख होर मेरी तैंईंयैं तुसरै मगन होंणै रा समाचार आसाबै शुणाऊ, ज़ुणी सैंघै मुँभै होर भी खुशी मिली।

⁸मुँभै दुःख नी ऑथि कि मैं सौ सख्त चिट्ठी तुसाबै भेज़ी, हालांकि मुँभै पैहलै बड़ा दुःख ती, किबैकि मुँभै पता ती कि ऐ थोड़ी देरी री तैंईंयैं तुसरी तैंईंयैं दुःख देणु आल़ी ती।

⁹ऐबै हांऊँ खुश सा पर ऐथा री तैंईंयैं नी कि तुसाबै दुःख हुआ पर ऐथा री तैंईंयैं कि तुसै तेई दुःखा री बजहा न आपणा मन पापा न बदलू, किबैकि तुसरा दुःख परमेश्वरै री तरफा न ती, कि आसरी तरफा न तुसाबै कोई गैला रा नुकसान नी होला।

¹⁰किबैकि परमेश्वर री मर्जी रै मुताबक ज़ो दुःख होआ सा सौ ऐण्ढा पश्चाताप पैदा केरा सा ज़ुणिरा नतीज़ा उद्धार सा होर ज़ुणी सैंघै पछ़ताणा नी पौड़दा पर दुनिया रै लोका रा दुःख हमेशा री मौऊती तरफ़ नेआ सा।

¹¹तैबै हेरा, ऐई परमेश्वरा री मर्जी रै मुताबक दुःखा न तुसा आँध्रै कि पैदा हुआ; तेथा न तुसाबै केतरी लगन, बचाव, झ़िक, डौर, इच्छा, ज़ोश होर बुरा केरनु आल़ै बै सज़ा देणै री चाहा पैदा हुई! तुसै आसा रै प्रति हर तरफा न ऐ साबित केरू सा, कि तुसै एसा गैला न निर्दोष सी।

¹²फिरी ज़ो सख्त चिट्ठी मैं तुसाबै लिखी ती, सौ न ता तेई बजहा न लिखी, ज़ुणियै अन्याय केरू, होर न तेई बजहा न ज़ुणी पैंधै अन्याय केरू, पर तैबै लिखी कि तुसरा ज़ोश ज़ो आसा री तैंईंयैं सा, सौ परमेश्वरा रै सामनै तुसा पैंधै ज़ाहिर होला।

¹³तैबै आसाबै हिम्मत हुई; होर आसरी ऐसा हिम्मती सैंघै तितुसै री खुशी री बजहा न होर भी खुशी हुई किबैकि तेइरा ज़ीऊ तुसा सैभी री बजहा न हरा भरा हुआ सा।

¹⁴अगर मैं तेई रै सामने तुसरै बारै न किछ़ घमण्ड रिहाऊ, ता शर्मिंदा नैंई हुआ, पर ज़ैण्ढी आसै तुसाबै सैभ गैला सच़-सच़ बोली ती, तैण्ढाऐ आसरा तितुसा रै सामनै घमण्ड रिहाणा सच़ हुआ।

¹⁵ज़ैबै तेइबै तुसा सैभी रै हुक्म मनणै री याद एज़ा सा, कि कैण्ढै तुसै डौरदै होर कोमदैआ तेई सैंघै मिले; ता तेइरी झ़ुरी तुसरी तैंईंयैं बी बढ़दी जा सा।

¹⁶हांऊँ खुशी मना सा, कि तुसरी तरफा न मुँभै सभी गैला न हिम्मत मिला सा।