Read Pahari, Kullu 2 कुरिन्थियों 9 Bible Online

2 कुरिन्थियों 9 - Pahari, Kullu bible

2 कुरिन्थियों 9

¹मुँभै तुसाबै तिन्हां ढैबुऐ रै बारै न लिखणा जरूरी नैंई ऑथि। ज़ुणिबै तुसै यरुश्लेमा न विश्वासी लोका री तैंईंयैं देणै री तरकीब बणा सी।

²किबैकि हांऊँ तुसै रै मनै री इच्छा बै जाँणा सा, ज़ुणिरी बजहा न हांऊँ मकिदुनिया प्रदेशा रै विश्वासी रै सामनै तुसरै बारै न घमण्ड सा, कि तुसै अखाया प्रदेशा रै लोका ऐकी बौर्षा न पौरे त्यार हुऐ सी, होर तुसरी खुशियै होर भी बोहू लोका उत्साहित केरै सी।

³पर मैं तीतुस सैंघै दुई होर विश्वासी भाई तैबै भेजी रै सी, कि आसै ज़ो घमण्ड केरू ती तुसरै बारै, सौ ऐसा गैला न बेकार नी होला; पर ज़ैण्ढा मैं बोलू ती; तैण्ढै ही तुसै बी यरुश्लेमा रै विश्वासी बै ढैबुऐ देणै री तैंईंयैं त्यार रौहा।

⁴ऐण्ढा नी होला, कि अगर किछ़ विश्वासी मकिदुनिया प्रदेशा न मूँ सैंघै ऐसै, होर तुसा हागै ढैबुऐ त्यार नी हुऐ होलै, ता कि पता, तुसरै ऐई बशाह री बजहा न आसै शर्मिंदा होलै, पर तुसा होर बी ज़ादा शर्मिंदा होंणा।

⁵तैबै मैं विश्वासी भाइया सैंघै ऐ अर्ज़ केरनी जरूरी समझ़ी कि ते पैहलै तुसा हागै एलै होर ज़ो ढैबुऐ तुसै खुलै दिला न धिनै ज़ुणिरै बारै न हांऊँ पैहलै न वचन देआ केरा ती, कि त्यार केरिया रखलै, कि ऐ दबाव सैंघै नी पर खुलै दिला न धिनैदै ढैबुऐ सांही त्यार हो।

⁶पर गैल ता ऐसा, कि ज़ो थोड़ा बाहा सा सौ थोड़ाऐ काटा बी सा; होर ज़ो ज्यादा बाहा सा, सौ ज्यादा काटा।

⁷हर एक जन ज़ैण्ढा आपणै मना न सोचिया रखा सा तैण्ढाऐ दान केरी न कि कुड़ी कुड़ीया, होर न दबाव सैंघै, किबैकि परमेश्वर खुशी सैंघै देणु आल़ै सैंघै खुश रौहा सा।

⁸परमेश्वरा सैभी तैरहा रा अनुग्रह तुसाबै तुसरी जरूरता न ज़ादा देई सका सा। ज़ुणी सैंघै सैभी गैला न होर सैभी बौगता न, सैभ किछ़, ज़ो तुसाबै जरूरी होला, तुसा हागै रोहला, ताकि तुसा हागै हमेशा सैभ किछ़ रज़ होंणा होर हर खरै कोमा री तैंईंयैं देई सकलै।

⁹ज़ैण्ढा शास्त्रा न लिखु सा, परमेश्वर ज़रूरतमन्द लोका बै खुलै दिला सैंघै देआ सा, होर सौ ज़ो किछ़ बी केरा सा सौ सही सा होर हमेशा री तैंईंयैं बणी रोहणा।

¹⁰पर परमेश्वर हमेशा किसाना बै बाहणै री तैंईंयैं बेज़ा, होर खाँणै री तैंईंयैं रोटी देआ सा। ता, ऐण्ढी तैरहा, परमेश्वरा हमेशा तुसाबै रज़ धन देणा ताकि तुसै ज़रूरतमंदा बै खुलै दिला न मज़त केरनै री तैंईंयैं ज़ादा न ज़ादा काबिल बणी सकलै।

¹¹परमेश्वर तुसाबै हर गैला न आशीष देणी ताकि तुसै हमेशा खुलै दिला सैंघै देई सकलै। होर ज़ैबै आसै ज़रूरतमंदा हागै तुसरा खुलै दिला सैंघै धिनुदा दान देआ सी ता तै लोका परमेश्वरै रा धन्यवाद केरा सी।

¹²किबैकि ऐसा सेवा बै पूरा केरनै सैंघै, विश्वासी लोकै री कमी घटी पूरी होआ सी, पर लोका री तरफा न परमेश्वरै रा बोहू-बोहू धन्यवाद होआ सा।

¹³किबैकि दुज़ै री मज़त केरनै री तैंईंयैं ढैबुऐ देणै री सेवा रा सबूत स्वीकार केरिया ते परमेश्वरै री महिमा प्रगट केरा सी, कि तुसै मसीह रै खुशी रै समादा बै मनिया तेथा रै अधीन रौहा सी, होर गरीब विश्वासी री, होर सैभी री मज़त खुलै दिला सैंघै केरदै रौहा सी।

¹⁴होर तिन्हां तुसरी तैंईंयैं परमेश्वरा न प्रार्थना केरनी; तै तुसाबै प्यार केरा सी, किबैकि तै ज़ांणा सा परमेश्वरै तुसा लोका पैंधै बड़ा अनुग्रह केरू सा।

¹⁵परमेश्वरा रा धन्यवाद हो तिन्हरै बखाना न बाहर दाना री तैंईंयैं, ज़ो कि तेइरा बेटा यीशु मसीह सा।