Read Pahari, Kullu गलातियों 5 Bible Online

गलातियों 5 - Pahari, Kullu bible

गलातियों 5

¹मसीहै आसै मूसा रै बिधाना न आज़ाद केरू सा, आपणी आज़ादी न मजबूत रौहा होर दबारा मूसा रै बिधान मनणै री तैंईंयैं आपु बै गुलाम मता बणा।

²हेरा, परमेश्वरा रै सामनै धर्मी ठहराईणै री तैंईंयैं अगर खतना करालै ता, एथा रा मतलब ज़ो मसीहै केरू सा तेथा न तुसाबै कोई फ़ायदा नैंई।

³फिरी भी हांऊँ एकी बारी हर एक खतना केरनु आल़ै बै बोला सा, ज़ेतरै भी खतना केरेदै सी तिन्हां सैभी बै मूसा रा सारा बिधान मनणा पौड़ना।

⁴तुसै ज़ुण मूसै रै बिधाना रै मनणै रै ज़रियै धर्मी ठहराईणा चाहा सी, तुसै आपु बै मसीह न होर परमेश्वरा रै अनुग्रह न अलग केरा सी।

⁵पर परमेश्वरा री आत्मा आसाबै धार्मिकता ग्रहण केरनै री तैंईंयैं बेसब्री न इंतज़ार करांदी लागी सा, ज़ो परमेश्वरै देणै रा वायदा केरू किबैकि आसै तेई पैंधै बशाह केरा सी।

⁶किबैकि अगर आसै मसीह यीशु सैंघै एक हुए सी, चाहे सौ खतना केरुऐदै सी या नैंई ऑथि, ऐ जरूरी नैंई ऑथि। तुसरा बशाह ही सा ज़ो इन्हां सैभी गैला रा मायने डाह सा होर तुसाबै होरी सैंघै झ़ुरी करा सा।

⁷तुसै मसीह सैंघै तुसरै रिश्ते न ऐतरी शोभली तैरहा बढ़दै लागै ती, ऐबै कुणी गैलै तुसै रोके सी, कि सच़ाई बै मता मनदै?

⁸ऐण्ढी झ़ूठी शिक्षा ता परमेश्वरा री तरफा न नैंई ऑथि ज़ुणियै तुसाबै आपणी औलाद होंणै री तैंईंयैं शाधै।

⁹होशियार रौहा, किबैकि ज़ो लोका बोला सी सौ सच़ सा, “थोड़ा ज़ेही मलेड़ा पूरै मुछ़ुऐदै पिठै बै मलेड़ा बणा सा।”

¹⁰पर हांऊँ परमेश्वरा पैंधै बशाह डाहा सा कि तुसै होरी री गैला ग्रहण नैंई केरनी, पर मेरी गैला रा पालन केरना, पर ज़ो तुसा री तैंईंयैं परेशानी पैदा केरा सा चाहे कोई भी होला तिन्हां बै परमेश्वरा सज़ा जरुर देणी।

¹¹पर हे भाइयो बैहणियो, हांऊँ प्रचार केरा सा कि खतना जरूरी नैंई ऑथि, होर तैबै हांऊँ यहूदी रै ज़रियै लगातार सताईया सा; अगर मैं मसीह री मौऊती रै प्रचारा रै बदलै खतना रा प्रचार केरू होंदा ता यहूदी लोका हांऊँ नैंई सताणा ती।

¹²भला होंदा ज़ो तुसरी तैंईंयैं परेशानी पैदा केरा सी, तै आपु बै तुसा न पूरी तैरहा न अलग केरदै।

¹³हे भाइयो बैहणियो, तुसै आज़ाद होंणै री तैंईंयैं परमेश्वरा रै ज़रियै शाधै सी; पर ऐण्ढा न हो कि ऐ आज़ादी तुसरी शरीरा री इच्छा बै पूरा केरनै री तैंईंयैं मौका बणै, एथा रै बदलै एकी दुज़ै सैंघै झ़ुरी होर सेवा केरा।

¹⁴किबैकि सारा मूसै रा बिधान एकियै हुक्मा न पूरा होआ सा, “ज़ैण्ढा तू आपु बै झ़ुरा सा तैण्ढा तू आपणै पड़ेशी सैंघै बी झ़ुरी केर।”

¹⁵पर अगर तुसै एकी-दुज़ै बै जानवरा सांही दोंदा सैंघै काटिया होर च़िरिया खा सी, ता साबधान रौहा, कि एकी दुज़ै रा नाश नैंई केरू लोड़ी।

¹⁶पर हांऊँ बोला सा, कि पवित्र आत्मा रै मुताबक चला, ता तुसै शरीरा री इच्छा कोई भी तरीकै न पूरी नैंई केरी सकदे।

¹⁷किबैकि आसरा पापी स्वभाव पवित्र आत्मा रै बरोधा न, होर पवित्र आत्मा पापी स्वभावा रै बरोधा न सा, होर ऐ एकी-दुज़ै रै बरोधी सी, तैबै कि ज़ो किछ़ तुसै हमेशा केरना चाहा सी सौ तुसै नैंई केरदै।

¹⁸अगर तुसै पवित्र आत्मा री रीति न चला सी, ता मूसा रै बिधान रै अधीन मता रौंहदै।

¹⁹पापी स्वभावा रै कोम ता प्रगट सी, मतलब बुरै कोम होर लुचपन, शर्मा री गैला,

²⁰मूर्तिपूजा, जादू, दुश्मनी, झ़गड़ै, ईर्ष्या, झ़िक, बरोध, फूट, पाखण्डीपन,

²¹डाह, मतवालापन, लिलाक्रीड़ा, होर इन्हां सांही होर भी कोम सी, इन्हां रै बारै न हांऊँ तुसाबै पैहलै न ओरु चेताऊणी देआ सा, ज़ैण्ढा मैं पैहलै धिनी भी सा, कि ऐण्ढै-ऐण्ढै कोम केरनै आल़ै परमेश्वरा रै राज्य रै आशीषा रै हिस्सेदार नी होई सकदै।

²²पर पवित्र आत्मा रै गुण, झ़ुरी, आनन्द, शान्ति धीरज, कृपा, भलाई, बफदारी,

²³नम्रता, होर संयम सा ऐण्ढै गुणा रै बरोधा न ता कोई भी बिधान नैंई ऑथि।

²⁴होर ज़ुण लोका यीशु मसीह रै सी, तिन्हैं पापी स्वभावा री सारी इच्छा होर लालचा सैंघै क्रूसा पैंधै च़ढ़ायै।

²⁵अगर आसै पवित्र आत्मा री बजहा न ज़िन्दै सी, ता आसाबै पवित्र आत्मा रै मुताबक च़लणा भी सा।

²⁶आसै घमण्डी होईया एकी दुज़ै बै नैंई छेड़े, होर न एकी दुज़ै न ईर्ष्या केरै।