Read Pahari, Kullu गलातियों 6 Bible Online

गलातियों 6 - Pahari, Kullu bible

गलातियों 6

¹ओ भाइयो बैहणियो, अगर कोई विश्वासी अपराध केरदा ढोकिया सा, ता तुसै ज़ुण आत्मिक सी, झ़ुरी सैंघै तेइबै सही बौता न वापस आंणनै री तैंईंयैं तेइरी मज़त केरा होर आपु भी साबधान रौहा, कि तुसै भी परीक्षा न नी पोड़ै लोड़ी।

²आसाबै एकी-दुज़ै री मज़त केरनी चेहिऐ, आसा मौंझ़ै न ज़ो कोई मुश्किला न सा, होर ऐण्ढी तैरहा आसै मसीह रै बिधाना बै पूरा केरा।

³किबैकि अगर कोई आपु बड़ा समझ़ा सा होर ज़ैबैकि सौ सच़ी न ऐण्ढा नैंई ऑथि, ता सौ आपणै आपा बै धोखा देंदा लागा सा।

⁴पर हर एक आपणै कोमा बै परखे, तैबै होरी रै बारै न नी पर आपु पैंधै घमण्ड केरनै रा मौका मिलणा।

⁵किबैकि आसा मौंझ़ै न हर कोई आपणै बर्तावा री तैंईंयैं आपु ज़िम्मैबार सा।

⁶ज़ुणिबै परमेश्वरा रा वचना सिखाईया ज़ाँदा लागा सा, तिन्हां हागै ज़ो किछ़ भी सा सौ आपणै सिखाणु आल़ै बै देणा चेहिऐ।

⁷आपु बै धोखा मता देंदै, कोई भी परमेश्वरा बै मूर्ख नैंई बणाई सकदा, किबैकि मांहणु ज़ो किछ़ बाह सा सोऐ काटा सा।

⁸किबैकि ज़ो मांहणु आपणै पापी स्वभावा री इच्छा बै पूरा केरा सा तेई नाश होंणा। पर ज़ो मांहणु पवित्र आत्मा री इच्छा बै पूरा केरा सा तेई हमेशा री ज़िन्दगी पाणी।

⁹आसाबै भलै कोम केरनै न हिम्मत नैंई छ़ौड़नी, किबैकि अगर आसै हिम्मत नैंई छ़ौड़लै ता परमेश्वरा रै बौगता न ईनाम पाणा।

¹⁰तैबै ज़ौखै तक मौका मिले आसाबै सैभी लोका सैंघै भलाई केरनी चेहिऐ, खास केरिया मसीह न विश्वासी सैंघै।

¹¹हेरा, मैं केतरै बड़े-बड़े अक्षरा न आपु आपणै हौथै तुसाबै लिखू सा।

¹²ज़ो लोका तुसाबै खतना केरनै री तैंईंयैं बोलदै लागै सी सिर्फ़ ऐ रिहाणै री कोशिश केरदै लागै सी कि ते केतरै बड़ै सी। ते मसीह रै क्रूसा रा प्रचार केरनै री बजहा न परेशानी न पौड़ना।

¹³किबैकि खतना कराणू आल़ै आपु ता मूसै रै बिधाना न नैंई च़लदै, पर तुसरा खतना कराणा चाहा सी, कि ते दुज़ै यहूदी रै सामनै घमण्ड केरी सकलै कि तुसै तिन्हरी बजहा न खतना केरू सा।

¹⁴पर ऐण्ढा नी हुआ लोड़ी कि हांऊँ कोई होरी गैला पैंधै घमण्ड केरनु, सिर्फ़ आसरै प्रभु यीशु मसीह रै क्रूसा रा, ज़ुणिरै ज़रियै दुनिया मेरी नज़री न होर हांऊँ दुनिया री नज़री न क्रूसा पैंधै च़ढ़ाऊ सा।

¹⁵एथा न कोई फर्क नैंई पौड़दा कि तुसै खतना केरुऐदै सी या नैंई। पर ऐ फर्क पौड़ा सा कि परमेश्वरै तुसै पवित्र आत्मा रै कोमा रै ज़रियै एक मांहणु बणाऊ सा।

¹⁶परमेश्वरा तिन्हां सैभी बै आपणी शान्ति देणी ज़ो ऐई बिधाना रा पालन केरा सी होर तिन्हां बै आशीष देणी। ते परमेश्वरा रै लोका सी।

¹⁷कोई भी मुँभै दुःख न दै किबैकि ज़ो नशाण मेरै शरीरा न सी रिहा सी कि हांऊँ परमेश्वरा रा सेवक सा।

¹⁸ओ भाइयो बैहणियो, हांऊँ प्रार्थना केरा सा आसरै प्रभु यीशु मसीह रा अनुग्रह तुसा सैभी सैंघै होंदा रौहै। आमीन।