Read Pahari, Kullu इफिसियों 2 Bible Online

इफिसियों 2 - Pahari, Kullu bible

इफिसियों 2

¹यीशु न बशाह केरनै न पैहलै तुसै मूँएंदै सांही ती, तुसा हागै ज़िन्दगी नैंई ती ज़ो परमेश्वरा न सा किबैकि तुसै पाप केरू होर परमेश्वरा रा हुक्म नैंई मनू।

²ज़ैबै तुसै पैहलै ऐई दुनिया रै लोका री रीति न च़ला ती, होर तुसै शैताना बै मना ती ज़ो कि आसमाना न बुरी आत्मा पैंधै राज़ केरा सा, ज़ुण हाज़ी भी परमेश्वरा रा हुक्म नी मनणु आल़ै लोका रै दिला न कोम केरा सा।

³एक बारी आसै भी आपणै पापी स्वभावा रै स्वार्थी इच्छा रै अधीना न ती। आसरै स्वभावा न आसै दुज़ै सांही परमेश्वरा री झ़िका रै अधीन ती।

⁴पर परमेश्वर ज़ुण दयालू ती! आसै आपणै पापा री बजहा न मूँऐंदै ती, पर परमेश्वरै आसा सैंघै ऐतरी झ़ुरी केरी कि तेइयै आसाबै मसीह सैंघै ज़िन्दा केरू होर परमेश्वरा रा महान अनुग्रह रा दान तुसाबै बच़ा सा।

⁶किबैकि मसीह सैंघै आसरै रिश्ते री बजहा न तेइयै आसै मसीह सैंघै मूँऐंदै न ज़िन्दा केरू, होर तेई सैंघै स्वर्गीय ज़ैगा न बशाऊ।

⁷परमेश्वरै ऐ केरू ताकि ऐणु आल़ै ध्याड़ै न सैभी लोका बै रिहाई सकलै कि तेइरा अनुग्रह केतरा महान सा, ज़ो किछ़ तेइयै केरू एथा न तेइयै आसाबै ऐ अनुग्रह रिहाऊ ज़ो मसीह यीशु सैंघै एक सा।

⁸किबैकि ज़ैबै तुसै बशाह केरू परमेश्वरै तुसै आपणै अनुग्रह न बच़ाऐ होर तुसै आपणै आपा बै नैंई बच़ाऊ पर ऐ परमेश्वरा रा एक दान सा।

⁹होर न ऐ तुसरै कोमा री बजहा न सा, ताकि तुसै एथा पैंधै घमण्ड केरै।

¹⁰किबैकि आसै परमेश्वरा री रचना सी होर मसीह यीशु न भलै कोम केरनै री तैंईंयैं नोंऊँऐं लोका सांही त्यार केरै सी, ज़ुण परमेश्वरै आसरी तैंईंयैं पैहलै न ओरु त्यार केरै सी।

¹¹एथा बजहा न याद केरा कि तुसै ज़ुण पैदाईश होरी ज़ाति रै सी, होर यहूदियै तुसरा मज़ाक उड़ाऊ किबैकि तुसै खतना नैंई केरदै पर ते केरा सी। पर तिन्हरा सौ रीति-रुआज़ सिर्फ़ तिन्हरै शरीरा री तैंईंयैं केरिया सा।

¹²तुसै लोका तेई बौगता मसीह बै नैंई जाणदै ती होर इस्राइलै री प्रजा रै ज़ैगा न अलग केरुऐदै, होर प्रतिज्ञा रै वायदै रै हकदार नैंई ती, होर बगैर आश होर ऐई दुनिया न बगैर परमेश्वरा रै ती।

¹³एक बौगत ती ज़ैबै तुसै परमेश्वरा न दूर ती, पर ऐबै मसीह यीशु न तिन्हरै लोहू रै ज़रियै नेड़ आंणै सी।

¹⁴मसीहै आपु आसरै बिच़ा न शान्ति बणाई सा। पैहलै ऐण्ढा लागा ती कि ज़ैण्ढै एक दीवारै यहूदी होर होरी ज़ाति अलग केरी सा। तिन्हैं एकी दुज़ै सैंघै नफरत केरी। पर ऐबै मसीहै सौ दीवार चोड़ी सा होर दुए छ़ुण्ड एक केरनै री तैंईंयैं बणाऐ सी।

¹⁵क्रूसा पैंधै मौरनै न मसीहै मूसा रा पूरा बिधान खत्म केरू ताकि सौ यहूदी होर होरी ज़ाति मौंझ़ै शान्ति आंणी सकै होर एक नोंऊँआं छ़ुण्ड बणाई सकै।

¹⁶होर क्रूसा पैंधै तेइरी मौऊती रै ज़रियै मसीहै दुए छ़ुण्ड एक केरै होर तिन्हां बै परमेश्वरा सैंघै मिलाईया ऐण्ढी तैरहा यहूदी होर होरी ज़ाति मौंझ़ै दुश्मनी खत्म केरी।

¹⁷होर ज़ैबै मसीह आऊ ता तेइयै एज़िया तुसै ज़ुण होरी ज़ाति परमेश्वरा न दूर ती, होर यहूदी बै ज़ुण तेइरै नेड़े ती, दुई बै शान्ति रा खुशी रा समाद शणाऊ।

¹⁸किबैकि मसीह री बजहा न आसै सैभ एकी पवित्र आत्मा रै ज़रियै पिता रै नेड़े एज़ी सका सी।

¹⁹तेबैता तुसै ऐबै परदेशी या मुसाफ़िर नैंई रौहै, पवित्र लोका रै सैंघी देशी होर परमेश्वरा रै घरानै रै हुऐ सी।

²⁰तुसै एक घौरा सांही सी प्रेरित होर भविष्यवक्ता तेइरी मनियाद सा होर मसीह तेई घौरा रै कुणै रा खास पात्थर सी।

²¹मसीह न पूरा घौर सैंघै जुड़ू सा होर प्रभु री तैंईंयैं एक पवित्र मन्दिर बणदै जा सा।

²²किबैकि तुसै मसीह सैंघै मिलै सी, तुसै होरी ज़ाति रै विश्वासी भी परमेश्वरा रै दुज़ै लोका सैंघै शामिल होंदै लागै सी। ताकि तुसै एक घौर बणै लोड़ी, ज़ौखै परमेश्वर पवित्र आत्मा री शक्ति सैंघै रौहा सा।