Read Pahari, Kullu इफिसियों 3 Bible Online

इफिसियों 3 - Pahari, Kullu bible

इफिसियों 3

¹ऊँईरी बजहा न हांऊँ पौलुस तुसरी तैंईंयैं प्रार्थना केरा सा। किबैकि हांऊँ तुसा होरी ज़ाति बै खुशी रा समाद शणाईया मसीह यीशु री तैंईंयैं सेवा केरदा लागा सा, तैबै ता हांऊँ कैदी सा।

²पक्की तैरहा तुसै शुणु सा कि परमेश्वरै मुँभै आपणै अनुग्रह न तुसाबै खुशी रै समादा रा प्रचार केरनै री ज़िम्मैबारी धिनी सा।

³ज़ैण्ढा कि मैं पैहलै होछ़ा केरिया लिखू ती, परमेश्वरै आपु सौ गुप्त भेद मुँभै प्रगट केरू।

⁴ज़ुणिबै पौढ़िया तुसै पता लाई सका सी, कि हांऊँ मसीह रा भेद कौखै तैंईंयैं समझा सा।

⁵पैहलै परमेश्वरै ऐ भेदा लोका बै प्रगट नैंई केरू ती, पर ऐबै तेइयै पवित्र आत्मा रै ज़रियै आपणै प्रेरिता बै होर भविष्यवक्ता बै ऐ प्रगट केरू।

⁶होर सौ गुप्त भेद ऐ सा किबैकि मसीह सैंघै आसरै रिश्ते री बजहा न खुशी रै समादा रै ज़रियै होरी ज़ातियै यहूदी सांही आशीष पाणी होर ते एकियै शरीरा रै सदस्य होर परमेश्वरा रै वायदै रै हिस्सेदार सी।

⁷परमेश्वरा रै अनुग्रह होर शक्तिशाली सामर्था न, मुँभै ऐई खुशी रै समादा रा प्रचार केरिया तेइरी सेवा केरनै री तैंईंयैं हांऊँ एक सेवक बणु।

⁸हालांकि हांऊँ सैभी पवित्र लोका न सैभी न होच्छा सा, परमेश्वरै अनुग्रह न मुँभै ऐ मौका धिना कि हांऊँ होरी ज़ाति बै मसीह रा सौ खुशी रा समाद शुणानु कि मसीह असीम आशीषा रा स्रोत सा, ज़ुणिबै कोई नापी नैंई सकदा।

⁹होर हांऊँ सैभी लोका बै समझाई सकनू कि तेइयै सौ गैला कैण्ढै पूरी केरी ज़ो तेइयै पैहलै केरनै रा फैसला केरू ती। ऐ बोहू पैहलै प्रगट नैंई हुआ ती किबैकि परमेश्वर, सैभ किछ़ बनाणु आल़ै छुपाईया रखु ती।

¹⁰ताकि परमेश्वर आत्मिक दुनिया न शक्ति होर अधिकारी बै रिहाणै री तैंईंयैं मण्डली रा इस्तेमाल केरना कि परमेश्वर सैभ किछ़ा न बुद्धिमान सा।

¹¹परमेश्वरै आपणी हमेशा रोहणु आल़ी योजना रै मुताबक ऐण्ढा केरू, ज़ो तेइयै आसरै प्रभु यीशु मसीह रै ज़रियै पूरा केरू।

¹²मसीह न आसरै बशाह री बजहा न ऐबै आसै हिम्मत होर बशाह सैंघै परमेश्वरा री उपस्थिति न एज़ी सका सी।

¹³किबैकि हांऊँ अर्ज़ केरा सा कि ज़ो दुःख तुसा री तैंईंयैं मुँभै होंदै लागे सी, तिन्हरी बजहा न हिम्मत मता छ़ौड़दै, किबैकि ऐ सैभ तुसरै फायदै री तैंईंयैं सा।

¹⁴हांऊँ एसा बजहा न तेई परमेश्वर पिता रै सामनै घुटनै टेका सा,

¹⁵ज़ुणीन स्वर्ग होर धौरती पैंधै, हर एक घरानै रा नाँ रखिया सा,

¹⁶हांऊँ प्रार्थना केरा सा कि सौ आपणी महिमा रै धना रै मुताबक तुसाबै ऐ दान दै, कि तुसै तेइरी आत्मा न आपणै आँध्रलै मांहणु न शक्ति पाईआ बलवन्त होंदै ज़ात,

¹⁷ताकि मसीह तुसरै दिला न बसे, ज़ैण्ढै तुसै तेई पैंधै बशाह केरा सी। हांऊँ प्रार्थना केरा सा कि परमेश्वर होर एकी दुज़ै री तैंईंयैं तुसरी झ़ुरी तुसाबै मज़बूत रखै होर झ़ौड़नै न रोकै।

¹⁸होर सैभी पवित्र लोका सैंघै तुसै ऐ समझणै री शक्ति पाई सकै कि मसीह आसाबै आसरी सोचा न भी ज़ादा झ़ुरी केरा सा।

¹⁹हांऊँ प्रार्थना केरा सा कि मसीह री झ़ुरी ज़ो समझा न पौरे सा जाणी लेआ ताकि तुसरा चाल चलन परमेश्वरा रै चाल चलना सांही बणै।

²⁰परमेश्वर आसा न कोम केरदी लागी शक्ति री बजहा न तेइन पुछ़णै या औखै तक कि सोच़णै री तुलना न बोहू ज़ादा च़ीज़ा बै केरी सका सा,

²¹मण्डली होर मसीह यीशु न, तेइरी महिमा पीढ़ी न पीढ़ी ज़ुगा-ज़ुगा तैंईंयैं होंदी रौहै। आमीन।