Read Pahari, Kullu इफिसियों 5 Bible Online

इफिसियों 5 - Pahari, Kullu bible

इफिसियों 5

¹तुसै परमेश्वरा रै प्यारै शोहरू सी तैबै तुसै तेई सांही बणनै री कोशिश केरा।

²आपु न झ़ुरी रैखा, ज़ैण्ढै मसीहै भी तुसा सैंघै झ़ुरी केरी। होर आसरी तैंईंयैं आपणै आपा बै खुशबूदार कीमती तेला सांही परमेश्वरा सामनै बलिदाना केरू।

³होर ज़ैण्ढा पवित्र लोका री तैईऐ भला सा, तैण्ढा तुसा न व्यभिचार, होर कोई भी तैरहा रै बुरै कोम, या लालचे री गैला तैंईंयैं नैंई लोड़ी हुई।

⁴होर न शर्मिदा री, होर न मुर्खता री गैला री, न मज़ाक री, किबैकि ऐ गैला ठीक नी होन्दी, पर तुसा न हमेशा परमेश्वरा रा धन्यवाद देऊआ लोड़ी।

⁵किबैकि तुसै जाँणा सी, कि कोई व्यभिचारी, या बुरा मांहणु, या लालची मांहणु री, ज़ुण मूर्तिपूजा रै बराबर सा, मसीह होर परमेश्वरा रै राज्य रै भागीदार नैंई।

⁶तिन्हां मांहणु रै ज़रियै धोखै न मता पौड़दै ज़ो ऐण्ढी तैरहा रा पाप केरनै रा बहाना बणा सी, किबैकि इन्हां गैला री बजहा न परमेश्वरा री झ़िक हुक्म नी मनणु आल़ै लोका पैंधै भड़का सा।

⁷तेबैता तुसै ऐण्ढै किस्मा रै मांहणु सैंघै भागीदार मता होंदै।

⁸किबैकि तुसै ज़ुण पैहलै निहारै न ती, पर ऐबै प्रभु न ज्योति सी, होर ऐबै ज्योति री औलादा सांही चला।

⁹किबैकि ज्योति रा फ़ौल़ सैभी तैरहा री भलाई, होर धर्मिकता, होर सच़ाई सा।

¹⁰होर ऐ पता लाई लेया, कि प्रभु बै कि खरा लागा सा।

¹¹होर निहारै रै बुरै कोमा न हिस्सेदार मता बणदे, पर तिन्हरा खुलासा केरा।

¹²किबैकि बुरै मांहणु री गुप्त कोमा री चर्चा केरना भी शर्मऐ री गैल सा।

¹³ज़ैबै सैभ च़ीज़ा बै बाहरै प्याशै न आंणा सी ता तेइरा सही स्वभाव प्रगट होआ सा।

¹⁴ऐसा बजहा न लोका बोला सी, “ओ सोणु आल़ैओ ज़ागा, होर मूँएंदै न ज़िन्दै हो, ता मसीह री ज्योति तो पैंधै च़मकली।”

¹⁵तेबैता तुसै ध्याना न हेरा, कि तुसै कैण्ढी तैरहा ज़िन्दगी ज़ीआ सी, मूर्ख लोका सांही ज़िन्दगी मता ज़ीआ बल्कि बुद्धिमान लोका री सांही ज़िन्दगी ज़ीआ।

¹⁶भलाई केरनै रै हरेक मौकै री कीमता बै समझ़िया इस्तेमाल केरा, किबैकि ध्याड़ै बुरै सी।

¹⁷ऐसा बजहा न मूर्ख मता बणदै, पर ध्याना लाईया समझणै री कोशिश केरा कि प्रभु तुसा न कि चाहा सा?

¹⁸होर अँगूरा रा रसा न मतवालै मता बणदे, किबैकि ऐथा न लुचपन होआ सा, पर पवित्र आत्मा न परिपूर्ण होंदै जा।

¹⁹ज़ैबै तुसै कठा होआ सी ता आपणै-आपणै मना न प्रभु रा भजन होर स्तुतिगान होर आत्मिक गीत गाया केरा।

²⁰होर हमेशा सैभी गैला री तैंईंयैं आसरै प्रभु यीशु मसीह रै नाँ न परमेश्वर पिता रा धन्यवाद केरदै रौहा।

²¹होर मसीह रै प्रति आदरा री बजहा न एकी-दुज़ै रै अधीन रौहा।

²²हे लाड़िओ, आपणै-आपणै लाड़ै रै ऐण्ढै अधीन रौहा ज़ैण्ढै प्रभु रै।

²³किबैकि लाड़ा लाड़ी री मुँडी सा, ज़ैण्ढा कि मसीह मण्डली री मुँडी सा, होर आपुऐ शरीर मतलब मण्डली रा उद्धारकर्ता सा।

²⁴ज़ैण्ढै मण्डली मसीह रै अधीन सा, तैण्ढै लाड़ी भी हर गैला न आपणै-आपणै लाड़ै रै अधीन रौहली।

²⁵हे सैभे लाड़ैओ, आपणी-आपणी लाड़ी सैंघै झ़ुरी केरा, ज़ैण्ढा मसीहै भी मण्डली सैंघै झ़ुरी केरिया आपणी जांन भी मण्डली बै धिनी।

²⁶ताकि मसीह मण्डली बै खुशी रै समादा रै ज़रियै पापा न च़ोखा केरी सकलै ज़ैण्ढै आसै पाणी न निहाईया आपणै गन्दै शरीरा बै च़ोखा केरा सी।

²⁷होर मसीहै तेसा बै एक ऐण्ढी तेजोमय मण्डली बनाईया आपु आगै खड़ी केरै, ज़ुणीन कोई दोष, न झ़ुरी, न कोई ऐण्ढी चीज हो, बल्कि पवित्र होर निर्दोष हो।

²⁸ऐण्ढी तैरहा जरूरी सा, कि लाड़ा आपणी-आपणी लाड़ी सैंघै आपणै शरीरा बराबर झ़ुरी केरै, ज़ुण आपणी लाड़ी न झ़ुरी केरा सा, सौ आपणै आपा न झ़ुरी केरा सा।

²⁹किबैकि कोइयै कैधी भी आपणै शरीरा न दुश्मनी नैंई केरी, बल्कि तेइरा पालन-पोषण केरा सा, ज़ैण्ढा मसीह भी मण्डली सैंघै केरा सा।

³⁰तैबै कि आसै मसीह रै शरीरा रै औंग सी। ज़ैण्ढा पवित्र शास्त्रा न लिखू सा कि,

³¹“एथा बजहा न मांहणु आपणै आमा-पिता बै छ़ौड़िआ आपणी लाड़ी सैंघै मिलिया रोहणा, होर तिन्हां एक तन होंणा।”

³²इन्हां गैला रा भेद पाणा ता बड़ा मुश्किल सा ज़ो परमेश्वर प्रगट केरा सा, पर हांऊँ तुसाबै मसीह री तेसा झ़ुरी रै बारै न बोला सा ज़ो तेइयै मण्डली सैंघै केरू सा।

³³पर तुसा मौंझ़ै हर एक आपणी लाड़ी न आपु बराबर झ़ुरी रखेइत, पर लाड़ी भी आपणै लाड़ै रा आदर केरै।