Read Pahari, Kullu इफिसियों 6 Bible Online

इफिसियों 6 - Pahari, Kullu bible

इफिसियों 6

¹हे शोहरूओ, आपणै-आपणै आमा-बापू रै हुक्मा रा पालन केरा, किबैकि तुसै प्रभु रै सी होर ऐण्ढा केरना तुसरी तैंईंयैं ठीक सा।

²परमेश्वरै पवित्र शास्त्रा न ऐ हुक्म धिना सा कि, “आपणी आमा होर बापू रा आदर केरा” ऐ पहला हुक्म सा, ज़ुणी सैंघै परमेश्वरा रा वायदा भी सा।

³ताकि तेरा भला होला, होर तू धौरती पैंधै बोहू रोज ज़िन्दा रौहला।

⁴ओ बापूओ आपणै शोहरु सैंघै ऐण्ढा बर्ताव मता केरदै ज़ुणीन तिन्हां बै झ़िक आऐ, पर प्रभु री शिक्षा, होर च़िताऊणी देई-देइया तिन्हां रा पालन-पोषण केरा।

⁵हे दासो, ज़ो मांहणु दुनिया न तुसरा मालक सा तेइरा हुक्म मना। तिन्हां सैंघै आदरा रा बर्ताव केरा होर ज़ैण्ढा तुसै मसीह सैंघै बफादार सी तैण्ढै तिन्हां सैंघै भी बफादार रौहा।

⁶होर मांहणु बै खुश केरनु आल़ै सांही रिहाणै री तैंईंयैं सेवा मता केरदै, पर मसीह रै दासा सांही मना सैंघै परमेश्वरा री इच्छा पैंधै च़लदै रौहा।

⁷एक दास होंणै रै नातै खुशी सैंघै आपणा कोम केरा ज़ैण्ढै कि तुसै प्रभु री सेवा केरा सी मांहणु री नैंई।

⁸किबैकि तुसाबै पता सा, कि ज़ो कोई ज़ैण्ढा शोभला कोम केरा सा, चाहे दास होला, चाहे आज़ाद, प्रभु न तैण्ढाऐ कोमा रै मुताबक ईनाम पाणा।

⁹होर तैण्ढी तैरहा ओ मालको, तुसै भी धमकिया छ़ौड़िआ, तिन्हां सैंघै ऐण्ढै बर्ताव केरा, कि तुसाबै पता सा कि तुसरा होर तिन्हां रा दुई रा मालक स्वर्गा न सा, होर सौ कोई रा पक्ष नैंई केरदा।

¹⁰आखरी न, प्रभु न होर तेइरी शक्ति रै प्रभावा न मजबूत होंदै जा।

¹¹परमेश्वरा रै ज़रियै धिनैदै सारै हथियार बोहना, कि तुसै शैताने री सारी युक्ति रा सामना केरनै री तैंईंयैं खड़ै रौही सके।

¹²किबैकि आसरी लड़ाई कोई मांहणु रै बरोधा न नैंई ऑथि, बल्कि तिन्हां बिना हेरूईदी निहारै सैंघै भौरूऊँदी दुनिया रै प्रधाना, अधिकारी, हाकमा सैंघै सा, होर आसमाना री दुष्ट शक्ति रै बरोधा न सा।

¹³तेबैता परमेश्वरा रै सारै हथियार बोहना, कि तुसै बुरै ध्याड़ै न सामना केरी सकलै, होर सैभ किछ़ पुरा केरिया बशाह न खड़ै रौही सका सी।

¹⁴त्यार रौहा, होर सच़ाई बै एक गाच़ी सांही तुसरै चेकै न बोनहा होर परमेश्वरा रा न्याय कवचा सांही तुसरी रक्षा केरनी।

¹⁵तुसरी शान्ति रा खुशी रा समाद शनाणै री इच्छा तुसरी ज़ोंघा रै बूटा सांही रौहै।

¹⁶तुसरा बशाह एक ढाला सांही मज़बूत रौहै होर ताकि तुसै तेई शैताना रै औगी सांही भौकदै तिरा बै शेई सकलै।

¹⁷परमेश्वरा री उद्धारा केरनु आल़ी समर्थ एक टोपा सांही हो, होर तलवारी री तैंईंयैं परमेश्वरा रा सन्देशा रा इस्तेमाल केरा ज़ुण परमेश्वरा री आत्मा रै ज़रियै प्राप्त होआ सा।

¹⁸होर हर बौगत होर हर तैरहा न आत्मा न प्रार्थना होर अर्ज़ा केरदै रौहा। बीऊदे रौहा, कि सैभी पवित्र लोका री तैंईंयैं लगातार प्रार्थना केरदै रौहा।

¹⁹होर मेरै तैंईंयैं भी प्रार्थना केरा, कि मुँभै बोलदी घेरै ऐण्ढै वचन मिले, कि हांऊँ हिम्मता सैंघै खुशी रै समादा रा भेद दसनू।

²⁰ऐई खुशी रै समादा री बजहा हांऊँ कैदा न सा, पर तौखै भी मसीह री तैंईंयैं हांऊँ एक राजदूत सा। मेरी तैंईंयैं प्रार्थना केरा कि ज़ैण्ढै मुँभै हिम्मती सैंघै खुशी रा समाद बोलणा चेहिऐ, बोली सकनू।

²¹होर तुखिकुस ज़ुण विश्वासी भाई होर प्रभु न बशाह रै काबिल सेवक सा तेई एज़िया तुसाबै सैभ गैला दसणी, कि तुसाबै भी पता लागला कि हांऊँ कैण्ढै तैरहा रौहा सा।

²²सौ मैं तुसा हागै तैबै भेज़ू सा, कि तुसै आसरी दशा जाणलै, ताकि सौ तुसा रै मना बै उत्साहित केरला।

²³हांऊँ प्रार्थना केरा सा कि परमेश्वर पिता होर यीशु मसीह री तरफा न विश्वासी भाई बै शान्ति प्यार होर बशाह सैंघै बशाह सैंघै भौरै।

²⁴ज़ुण आसरै प्रभु यीशु मसीह सैंघै सच़ी झ़ुरी रखा सी, तिन्हां सैभी सैंघै अनुग्रह लगातार होन्दा रौहला।