Read Pahari, Kullu फिलिप्पियों 1 Bible Online

फिलिप्पियों 1 - Pahari, Kullu bible

फिलिप्पियों 1

¹हांऊँ पौलुस होर तीमुथियुस मसीह यीशु रै दासा री तरफा न सैभी पवित्र लोका रै नाँ, ज़ुण यीशु मसीह न होईया फिलिप्पी शैहरा न रौहा सी, रखवालै होर सेवका समेत,

²आसरै पिता परमेश्वर होर प्रभु यीशु मसीह री तरफा न तुसाबै अनुग्रह होर शान्ति मिलदी रौहै।

³हांऊँ ज़ैबै-ज़ैबै तुसाबै याद केरा सा, ता तैबै-तैबै परमेश्वरा रा धन्यवाद केरा सा।

⁴होर ज़ैबै भी तुसा सैभी री तैंईंयैं अर्ज़ा केरा सा, होर हमेशा खुश होईया अर्ज़ा केरा सा।

⁵किबैकि तुसै शुरूआती न लेइया ज़ैबै तुसै बशाह केरू, औज़ा तैंईंयैं यीशु रै बारै न खुशी रा समाद बोंडणै न मेरै साथी रौहै सी।

⁶होर मुँभै एसा गैला रा बशाह सा, कि परमेश्वरै तुसा मौंझ़ै शोभला कोम शुरू केरू सा, सौहै तेइबै यीशु मसीह रै वापस ऐणै तैंईंयैं पुरा केरना।

⁷किबैकि तुसै मेरै मना न बसेदें सी, मेरी तैंईंयैं ऐ भला सा, कि हांऊँ तुसरै बारै न ऐण्ढा सोच़नू, कि मेरै कैदा न होर खुशी रै समादा रा जवाब होर सबूत देणै रै बारै न तुसै सैभ मूँ सैंघै परमेश्वरा रै अनुग्रह न सैंघी होंणा।

⁸एथा न परमेश्वर मेरा गुआह सा, कि हांऊँ मसीह यीशु सांही झ़ुरी केरिया तुसा सैभी री इच्छा केरा सा।

⁹होर हांऊँ ऐ प्रार्थना केरा सा, कि तुसरा एकी दुज़ै री तैंईंयैं झ़ुरी, ज्ञान होर सैभी किस्मा री समझ़ भी बढ़दी रौहै।

¹⁰औखै तेंई कि तुसै शोभली न शोभली गैला बै प्रिय मना, होर मसीह रै दबारा ऐणै रै ध्याड़ै तैंईंयैं पवित्र होर निर्दोष बणीया रौहा।

¹¹होर तेसा धार्मिकता रै फला न ज़ुण यीशु मसीह री बजहा न होआ सा, भौरदै ज़ात, ज़ुणीन परमेश्वरै री महिमा होर स्तुति होंदै रौहै।

¹²ओ विश्वासी भाइयो, हांऊँ तुसाबै दैसणा चाहा सा, कि ज़ो मूँ पैंधै बीती सा, तेसा बजहा न खुशी रै समादा बै बढ़ानै न मज़त मिली सा।

¹³औखै तैंईंयैं कि महाराज़ै रै राज्य री सारी सेना होर बाकि सारै लोका न ऐ ता प्रगट हुआ सा, हांऊँ मसीह री तैंईंयैं कैद सा किबैकि हांऊँ मसीह रा दास सा।

¹⁴होर प्रभु न ज़ुण भाई सा, तिन्हां मौंझ़ै बोहू मेरै कैद होंणै री बजहा न, हिम्मती सैंघै, परमेश्वरा रा वचन बेधड़क शुनाणै री होर भी हिम्मत केरा सी।

¹⁵किछ़ लोक ता जलन, होर झ़गड़ै री बजहा न मसीह यीशु रै बारै न खुशी रा समाद प्रचार केरा सी, होर कई भलै मना न केरा सी। [1]

¹⁶ज़ो लोका ऐ सोचिया कि हांऊँ खुशी रै समादा रा ज़वाब देणे री तैंईंयैं ठहराऊ सा, झ़ुरी सैंघै प्रचार केरा सा।

¹⁷ज़ो लोका जलन केरिया सच़ै मने नैंई पर बरोध केरिया मसीह रै बारै न प्रचार केरा सी, ऐ सोचिया कि ज़ैबै हांऊँ जेला न सा ता मुँभै होर दुःख मिलला।

¹⁸ता कि हुआ? सिर्फ़ ऐ, कि हर तैरहै न चाहे बहाने न, चाहे सच़ाई न, मसीह रै बारै न खुशी रा समाद शुणा सी, होर हांऊँ एथा न खुश सा, होर मूँ खुश रौहणा भी।

¹⁹किबैकि मुँभै पता सा, कि तुसै री प्रार्थना री बजहा न, होर यीशु मसीह रै पवित्र आत्मा री दाना री बजहा न, एथा रा प्रतिफल, मेरा छुटकारा होंणा।[2]

²⁰हांऊँ ता दिला न इच्छा होर आशा रखा सा, कि मुँभै कोई गैला न शर्म नी लोड़ी हुई, पर मेरी बड़ी हिम्मतै री बजहा न मसीह री तारीफ़ मेरै शरीरा न होंदै रौहै, चाहे हांऊँ ज़िंदा रौहणु या मौरनु।

²¹किबैकि मेरै तैंईंयैं ज़िंदा रौहणा मसीह सा, होर मौरना फायदा सा किबैकि मूँ मसीह सैंघै मिलणा।

²²होर अगर शरीरा न ज़िंदा रौहणा ऐ मसीह रै कोमा री तैंईंयैं मेरी तैंईंयैं फ़ायदा सा, ता मुँभै नी पता हांऊँ कुणी बै छाँटणु।

²³किबैकि हांऊँ ता दुई मौंझ़ै औधा लटकू सा, ज़ीऊ ता केरा सा हांऊँ मौरिया औखै न मसीह हागै ज़ानू, किबैकि सौ बोहू शोभला सा।

²⁴पर तुसरी तैंईंयैं ऐ बोहू जरूरी सा कि हांऊँ ज़िन्दा रौहणु।

²⁵तेबैता ता मुँभै एथा रा बशाह सा, होर मुँभै पता सा कि मूँ ज़िन्दै रौहणा, बल्कि तुसा सैभी सैंघै रौहणा कि तुसै बशाह न बढ़दे रौहा होर तेईन खुश रौहा।

²⁶ज़ैबै हांऊँ तुसा हागै दबारा एनु, होर तुसा हागै मसीह यीशु पैंधै घमण्ड केरनै री होर भी बजहा होंणी, ज़ो सौ मेरै ज़रियै केरदा लागा सा।

²⁷सिर्फ़ ऐतरा केरा कि तुसरा चाल-चलन मसीह रै खुशी रै समादा रै योग्य हो, चाहे हांऊँ एज़िया हेरणू, चाहे नैंई भी ऐनु, तुसा रै बारै न ऐ शुणनु, कि तुसै एकियै मकसदा न मजबूत सी, होर एक मन होईया खुशी रै समादा रै बशाह री तैंईंयैं मेहनत केरा सी।

²⁸होर कोई भी गैला न दुश्मना न नी डौरदै? तुसरा उत्साहित होंणा, ऐ तिन्हरी तैंईंयैं विनाशा री नशाणी सा, होर तुसा री तैंईंयैं उद्धारै री, होर ऐ परमेश्वरा री तरफा न सा।

²⁹किबैकि मसीह री बजहा न तुसा पैंधै ऐ अनुग्रह हुआ सा, कि न सिर्फ़ तेई पैंधै बशाह रखा, बल्कि पर तेइरी तैंईंयैं दुःख भी सौहा।

³⁰होर तुसाबै तैण्ढीऐ मेहनत केरनी सा, ज़ैण्ढा तुसै ज़ैबै हांऊँ फिलिप्पी शैहरा न केरदा हेरू सा, होर ऐबै भी शुणा सी कि हांऊँ हाज़ी भी तैण्ढाऐ कोम केरा सा।