Read Pahari, Kullu फिलिप्पियों 2 Bible Online

फिलिप्पियों 2 - Pahari, Kullu bible

फिलिप्पियों 2

¹मसीह तुसाबै शान्ति दैआ सा, होर तेइरा प्यार तुसाबै आराम दैआ सा। परमेश्वरा री आत्मा तुसाबै एकजुट केरा सा, होर तुसै दुज़ै री तैंईंयैं फ़िक्र केरा सी,

²ता ऐबै मेरी ऐ खुशी पूरी केरा कि एक मन होईया रौहा होर ऐकै प्यार, एक मन, होर एक विचार रखा।

³जलन केरनु आल़ै या घमण्डी मत बणा, पर दीन बणा होर एकी-दुज़ै बै आपु न बढ़िया समझा।

⁴हर एक आपणै बारै न नैंई, पर दुज़ै रै बारै न भी फ़िक्र केरा।

⁵ज़ैण्ढा मसीह यीशु रा स्वभाव ती तैण्ढाऐ तुसरा भी स्वभाव हो।

⁶ज़ुणियै परमेश्वरा रै बराबर होईया भी परमेश्वरा रै बराबर होंणै बै आपु हागै रखणै री चीज नैंई बुझी।

⁷बल्कि आपणै आपा बै ऐण्ढा शून्य केरू, होर दासा रा रूप धारण केरू, होर मांहणु रै बराबर बणु।

⁸होर मांहणु रै रूपा न प्रगट होईया, आपणै आपा बै दीन केरू, होर औखै तैंईंयैं कि तेइयै हुक्म मैनू, कि तेइयै एक दोषी सांही क्रूसा री मौत भी सौही।

⁹ऐसा बजहा न परमेश्वरै सौ सैभी न महान भी केरू, होर तेइबै सौ नाँ धिना ज़ुण सैभी नाँ न बड़ा सा।

¹⁰कि ज़ुण स्वर्गा न होर धौरती पैंधै होर ज़ुण धौरती न बुनै सी, तिन्हां सैभ यीशु रै नाँ रा आदर केरनै री तैंईंयैं घुटनै टेकणै।

¹¹होर परमेश्वरै री महिमा री तैंईंयैं सैभ लोका स्वीकार केरना कि यीशु मसीह ही प्रभु सा।

¹²तैबै ओ मेरै प्यारे विश्वासी भाइयो, ज़ैबै हांऊँ तुसा सैंघै ती, तैबै तुसै हमेशा हुक्म मैनू ती। ऐबै ज़ैबै हांऊँ दूर सा तुसाबै होर बी ज़ादा हुक्मा रा पालन केरना चेहिऐ। तैबै बच़ाऐ ज़ाणै रा सही मतलब कि सा ज़ाणनै री तैंईंयैं कोम केरा।

¹³किबैकि परमेश्वर ही सा ज़ुणियै आपणी शोभली इच्छा सैंघै तुसा रै मना न इच्छा होर कोम, दुई गैला रै केरनै रा असर भौरु सा।

¹⁴सैभ कोम बिना कुड़कुड़ाऐ होर बिना बैहस केरिया केरै केरा;

¹⁵ताकि तुसै निर्दोष होर भोलै होईया टेढै होर हठीले लोक मौंझ़ै परमेश्वरा री निष्कलंक औलाद बणीया रौहा। ऐई दुनिया रै लोका मौंझ़ै तुसै ज़िन्दगी रा वचन लेइया आसमाना रै तारै सांही च़मका,

¹⁶कि ज़ैबै मसीह दबारा वापस ऐला, ता मेरी घमण्ड केरनै री बजहा हो, कि मेरी कोशिश होर मेहनत बेकार नी हुई।

¹⁷होर अगर मुँभै बशाह रै बलिदाना न होर सेवा न आपणा लोहू भी बहाणा पौड़ू ता तैबै भी हांऊँ खुश सा, होर तुसा सैभी सैंघै खुशी मना सा।

¹⁸होर तैण्ढै तुसै भी खुश रौहा, होर मूँ सैंघै खुशी मनात्।

¹⁹मुँभै प्रभु यीशु न आश सा, कि हांऊँ तीमुथियुसा बै बड़ी छ़ेकै तुसा हागै भेजणु, ताकि तुसरा हाल शुणिया हांऊँ उत्साहित होनू।

²⁰किबैकि मूँ हागै ऐण्ढै स्वभावा रा कोई नी ऑथि, ज़ुण च़ोखै मने तुसा री चिंता केरला।

²¹किबैकि सैभ आपणै मतलबा री खोजा न रौहा सी, न कि यीशु मसीह री।

²²पर तीमुथियुस ता तुसै परखु होर जाणु सा, कि ज़ैण्ढा बेटा बापू सैंघै केरा सा, तैण्ढाऐ तीमुथियुसै खुशी रा समाद बोंडणै न मेरी मज़त केरी सा।

²³ऐबै मुँभै आशा सा, कि ज़ैण्ढै मुँभै पता लागला कि मेरी कि दशा होंणी, ता तैण्ढै मूँ सौ छ़ेकै भेज़णा।

²⁴होर मुँभै प्रभु न बशाह सा, कि मूँ आपु भी छ़ेकै ऐणा।

²⁵पर मैं इपफ्रुदीतुस ज़ुण मेरा विश्वासी भाई सा, होर सैंघी होर खुशी रै समादा री रक्षा री तैंईंयैं एक योद्धा होर तुसरा दूत, होर जरूरी गैला न मूँ सैंघै रौहणु आल़ा सा, तुसा हागै उत्साहित केरनै री तैंईंयैं भेजणा जरूरी सोचु।

²⁶किबैकि तेइरा मन तुसा सैभी न लागा ती, होर सौ चिन्ता न रौहा ती, किबैकि तुसै तेइरी बीमारी रा हाल शुणु ती।

²⁷सौ सच़िऐ बीमार ता हुआ ती, औखै तैंईंयैं कि मौरने पैंधै ती, पर परमेश्वरै तेई पैंधै दया केरी होर ठीक केरू, होर सिर्फ़ तेई पैंधै केल्है नैंई, पर मूँ पैंधै भी, कि मुँभै दुःखा पैंधै दुःख नी लोड़ी हुआ।

²⁸तैबै मैं तेइबै भेजणै री पूरी कोशिश केरी कि तुसै भी तेई सैंघै मिलिया खुश होआ होर मेरी भी फिक्र कम होली।

²⁹होर ऐबै तुसै तेई सैंघै प्रभु न होईया बड़ी खुशी सैंघै मिलित, होर ऐण्ढै रा आदर केरिया केरा।

³⁰किबैकि सौ मसीह रै कोमा री तैंईंयैं आपणै प्राण भी मुश्किला न पाईआ मौरनु आल़ा ती, ताकि सौ तिन्हां तरीकै न मेरी मज़त केरी सकलै ज़ो तुसै नी केरी सकै किबैकि तुसै बोहू दूर सी।