Read Pahari, Kullu फिलिप्पियों 3 Bible Online

फिलिप्पियों 3 - Pahari, Kullu bible

फिलिप्पियों 3

¹तैबै, हे मेरै विश्वासी भाइयो, प्रभु न खुश रौहा, सोऐ गैला फिरी भी लिखणै न मुँभै ता कोई कष्ट नैंई होन्दा, ताकि तुसै झ़ूठै शिक्षा न बची सकलै।

²जंगली कुतै सांही खतरनाक लोका न साबधान रौहा, तिन्हैं तुसरा ज़बरदस्ती खतना कराणा ताकि तुसै परमेश्वरा रै लोक बणी सकलै।

³किबैकि असली खतनै आल़ै ता आसै सी, ज़ुण परमेश्वरै री आत्मा री अगुवाई न पूजा केरा सी, होर मसीह यीशु पैंधै घमण्ड केरा सी, होर मांहणु रै कोमा पैंधै बशाह नैंई रखदै।

⁴पर हांऊँ ता आपणै कोमा पैंधै भी बशाह केरी सका सा, अगर कोई होरी बै भी आपणै कोमा पैंधै बशाह रखणै रा विचार सा, ता हांऊँ तेईन भी ज़ादा बशाह रखी सका सा।

⁵औठुऐ रोज मेरा खतना हुआ, इस्राइला रै खानदाना होर विन्यामिना रै गोत्रा रा सा, असली इब्रानी सा, मूसै री बिधाना रै बारै न बोला ता मैं फरीसी लोका सांही कठोरता सैंघै पालन केरू।

⁶अगर जोशा रै बारै न बोला ता मण्डली बै दुःख देणु आल़ा, होर यहूदी रै बिधाना रै बारै न कोई बोला सी ता हांऊँ निर्दोष सा किबैकि मैं सैभ नियमा रा पालन केरू।

⁷पैहलै ज़ुणी गैला बै हांऊँ कीमती बुझ़ा ती, ऐबै हांऊँ तिन्हां बै बेकार बुझ़ा सा किबैकि मसीहै मेरी ज़िन्दगी बदली।

⁸बल्कि मेरै प्रभु यीशु मसीह बै ज़ाणनै न ज़ादा होर किछ़ बी नी ऑथि, ऐ सैभी गैला मैं छ़ौड़ी धिनी होर सैभी गैला बै बेकार बुझ़ी। सिर्फ़ हांऊँ मसीह बै चाहा सा।

⁹होर हांऊँ तेईन बणीया रोहणु, न कि आपणी तेसा धार्मिकता सैंघै, ज़ुण बिधाना रा पालन केरनै न सा, बल्कि तेसा धर्मिकता सैंघै ज़ुण मसीह न बशाह केरनै री बजहा न सा, होर परमेश्वरा पैंधै बशाह केरनै न मिला सा।

¹⁰हांऊँ मसीह होर तेइरै दबारा मूँऐंदै न ज़िन्दै होंणै री शक्ति बै ज़ाणना चाहा सा। ज़ैण्ढै तेइयै केरू तैण्ढै हांऊँ बी दुःखा सौहिया मौरना चाहा सा।

¹¹ताकि हांऊँ बी दबारा मूँएंदै न ज़िन्दै केरिना।

¹²ऐ मतलब नैंई, हांऊँ तिन्हां गैला बै पाई सा, या सिद्ध सा, पर तेसा चिजा बै ढोकणै री तैंईंयैं हांऊँ बड़ी मेहनत केरदा लागा सा, ज़ुणिरी तैंईंयैं मसीह यीशुऐ हांऊँ ढौकू ती।

¹³ओ विश्वासी भाइयो, मेरी इच्छा ऐ नैंई कि मैं पाऊ सा, सिर्फ़ एक ऐ कोम केरा सा, कि ज़ुण गैला पिछ़ै बिती, तिन्हां बै छ़ौड़िया, आगली गैला धिरै बढ़िया,

¹⁴मसीह यीशु न परमेश्वरा री स्वर्गीय बुलाहटा न ईनाम पाणै री तैंईंयैं नशाणै धिरै बै दौड़ लानू।

¹⁵तैबै आसा मौंझ़ै ज़ेतरै लोका बशाह न पक्के सी, ऐ विचार रखे, होर अगर कोई गैला न तुसरा कोई होर विचार होला, ता परमेश्वरा सौ भी तुसा पैंधै प्रगट केरना।

¹⁶तैबै ज़ो सच़ाई परमेश्वरै पैहलै न प्रगट केरी सा तेथा रै मुताबक ज़िन्दगी, आगै बढ़ाणी सा।

¹⁷ओ भाइयो, तुसै सैभ मिलिया मूँ सेंई चाल चला, होर तिन्हां बै पछ़ियाणिया रखा, ज़ुण ऐण्ढी रीति पैंधै चला सी ज़ुणिरा उदाहरण तुसै आसा न हेरा सी।

¹⁸किबैकि बोहू लोका ऐण्ढी चाल चला सी, ज़ुणिरी चर्चा मैं तुसा सैंघै कई बार केरी सा, हाज़ी भी रौई-रौईया बोला सा, कि ते आपणी चाल-चलना न यीशु मसीह री मौऊती री कीमता बै क्रूसा पैंधै खत्म केरा सी।

¹⁹तिन्हां रा अंत विनाश सा, तिन्हरी शारीरिक इच्छा परमेश्वर सा, ते आपणी शर्मा री गैला पैंधै घमण्ड केरा सी, होर एसा धौरती री चिजा पैंधै मन लाईया रखा सी।

²⁰पर आसरा देश ता स्वर्गा न सा, होर आसै एक उद्धारकर्ता प्रभु यीशु मसीह रै स्वर्गा न ऐणै रा बेसब्री सैंघै इंतज़ार केरा सी।

²¹सौ आपणी शक्ति रै तेई प्रभावा रै मुताबक ज़ुणिरी बजहा न सौ सारी चिजा बै आपणै वशा न केरी सका सा, आसरै कमज़ोर शरीरा रा रूप बदलिया आपणी महिमा रै शरीरा रै मुताबक बणाई देला।