Read Pahari, Kullu फिलिप्पियों 4 Bible Online

फिलिप्पियों 4 - Pahari, Kullu bible

फिलिप्पियों 4

¹तैबै ओ मेरै प्यारे विश्वासी भाइयो बैहणियो, ज़ुणी लोका न हांऊँ बड़ी झ़ुरी केरा सा। तुसा सैंघै मिलणै री मेरी बड़ी इच्छा सा ज़ो मेरी खुशी होर घमण्डा री बजहा सा। प्यारे भाइयो प्रभु न एण्ढै बशाह न मज़बूत बणिया रौहा सी।

²हांऊँ बैहण यूओदिया सैंघै अर्ज़ा केरा सा होर सुन्तुखे न बी अर्ज़ केरा सा कि प्रभु न एक मन होइया आपु न मेल-मिलाप केरा किबैकि तुसै प्रभु सैंघै जुड़े सी।

³होर हे सच़ै सैंघी[3], हांऊँ तो न अर्ज़ा केरा सा, कि तू तिन्हां बेटड़ी री मज़द केर। किबैकि इन्हैं मूँ सैंघै खुशी रा समाद फेलाणै न, कलेमेंस होर मेरै तिन्हां सैंघी सैंघै मेहनत केरी सा, ज़ुणिरै नाँ ज़िन्दगी री कताबा न लिखै सी।

⁴प्रभु न हमेशा खुश रौहा, हांऊँ फिरी बोला सा खुश रौहा।

⁵तुसै री कोमलता तुसा सैभी मांहणु पैंधै प्रगट हो किबैकि प्रभु रा ऐणा नेड़ सा।

⁶कोई भी गैला री फिक्र मता केरदै, पर हर गैला न तुसरी प्रार्थना होर अर्ज़ा री ज़रियै धन्यवाद सैंघै परमेश्वरा सामनै हाज़िर केरी लोड़ी।

⁷तैबै परमेश्वरै री शान्ति ज़ुण समझा न बाहरै सा, तुसा रै दिला न होर तुसा रै विचारा बै मसीह यीशु न सुरक्षित रखली।

⁸आखरी न ओ भाइयो, ज़ुण-ज़ुण गैला सच़ी, होर ज़ुण-ज़ुण गैला आदरा रै योग्य सा, होर ज़ो-ज़ो गैला ठीक सी, होर ज़ो-ज़ो गैला पवित्र सी, होर ज़ो-ज़ो गैला बाँकी सी, होर ज़ो-ज़ो गैला मना बै शोभली लगा सी, होर ज़ुण खरै गुणा आल़ी सी होर प्रशंसा री गैला सी, सिर्फ़ तिन्हां पैंधै मन लात्।

⁹ज़ुण गैला तुसै मूँ न सिखी, होर ग्रहण केरी सा, होर शुणी, होर मूँ न हेरी सा, तिन्हां रा पालन केरै केरा, तैबै शान्ति रा परमेश्वरा तुसा सैंघै रौहणा।

¹⁰हांऊँ प्रभु न बड़ा खुश सा कि ऐतरै रोज़ा बाद मेरी याद केरी सा होर मज़त केरी, जरुर शुरू न तुसाबै बी भी ऐ विचार ती, पर तुसाबै मेरी मज़त केरनै रा मौका नैंई मिलु।

¹¹ऐ नैंई कि मूँ हागै कोई च़ीज़ा री कमी सा, किबैकि मैं ऐ सिखु सा कि ज़ुणी दशा न हांऊँ सा, एथा न सन्तुष्ट रौहणु।

¹²पर हांऊँ थोड़ी ज़ेहि च़ीज़ा न ज़ीणा जाँणा सा, होर बोहू च़ीज़ा न बी ज़ीणा जाँणा सा, हर गैला न होर हर दशा न रौज़णा होर भूखै रौहणा सिखु सा।

¹³मसीह ज़ुण मुँभै सैभी गैला न सामर्थ देआ सा, तेइन हांऊँ सैभ किछ़ केरी सका सा।

¹⁴तैबै भी तुसै भला केरू, कि मेरै दुःखा न मेरै सैंघी बणै।

¹⁵होर ओ फिलिप्पी शैहरा न रौहणु आल़ैओ, तुसाबै आपु भी पता सा कि खुशी रा समादा रै प्रचारा रै शुरुआता न ज़ैबै हांऊँ तुसरै प्रदेश मकिदुनिया न नौठा ता तैबै तुसाबै छ़ौड़िया होर कोई मण्डलीयै मेरी आर्थिक रूपा न मज़त नैंई केरी।

¹⁶ऐण्ढी तैरहै ज़ैबै हांऊँ थिस्सलुनीकै शैहरा न ती, तैबै मेरी ज़रूरत बै पूरा केरनै री तैंईंयैं भी तुसै एक बार नैंई बल्कि कई बार मुँभै ढैबुऐ भेज़ै ती

¹⁷ऐ नैंई कि हांऊँ दान चाहा सा, पर हांऊँ तुसरै भलै कोमा न एक होर कोम जोड़ना चाहा ती ताकि तुसाबै परमेश्वरा न होर ईनाम मिलै।

¹⁸मूँ हागै सैभ किछ़ सा, बल्कि उमीदा न भी ज़ादा सा ज़ुण चिजा तुसै इपफ्रुदीतुस भाई रै हौथा न भेजी ती, तिन्हां बै पाईआ हांऊँ रौज़ु, सौ ता खुशबूदार होर ग्रहण केरनै योग्य बलिदान सा, ज़ुण परमेश्वरा बै शोभला लागा सा

¹⁹होर आसरा पिता परमेश्वर भी आपणै तेई धना रै मुताबक महिमा सैंघै मसीह यीशु न तुसरी सैभ घटी कमी बै पुरा केरला।

²⁰आसरै पिता होर परमेश्वरै री सराउथी होर आदर हमेशा होंदी रौहै। ऐण्ढाऐ हो।

²¹यीशु न हर पवित्र मांहणु बै मेरा नमस्कार बोला, ज़ुणा विश्वासी भाई लोका मूँ सैंघै सी तुसाबै नमस्कार बोला सी।

²²सैभ पवित्र लोका खास केरिया ज़ुण महाराज़ै रै घरानै रै सी, तुसा सैभी बै नमस्कार बोला सी।

²³आसरै प्रभु यीशु मसीह रा अनुग्रह तुसा पैंधै बणिया रौहै।