Read Pahari, Kullu कुलुस्सियों 2 Bible Online

कुलुस्सियों 2 - Pahari, Kullu bible

कुलुस्सियों 2

¹हांऊँ चाहा सा कि तुसाबै ऐ पता लोड़ी लागा, कि तुसाबै होर तिन्हां बै ज़ुण लौदीकिया शैहरा न सी, होर तिन्हां सैभी री तैंईंयैं ज़ुणी सैंघै हांऊँ नी मिलू, हांऊँ केतरी मेहनत केरा सा।

²ताकि तिन्हां रै मना न शान्ति हो होर सौ एकी दुज़ै न झ़ुरी सैंघै रोहले, होर सौ पूरी समझा रा सारा धन प्राप्त केरलै, होर परमेश्वर पिता रै भेदा बै मतलब प्रभु यीशु मसीह बै पछ़ियाणी सकलै।

³ज़ुणीन बुद्धि होर ज्ञानै रै सारै भण्डार छ़ुपै सी।

⁴ऐ हांऊँ तुसाबै तैबै बोला सा, कि कोई भी मांहणु तुसाबै झ़ूठी शिक्षा देइया धोखा न दै।

⁵किबैकि अगर हांऊँ दूर रौहला, तैबै बी ऐण्ढा लागा सा कि ज़ैण्ढै हांऊँ तुसा सैंघै सा, होर तुसा री बिधि-नियमा मुताबक चरित्र होर मसीह पैंधै तुसा रै पक्के बशाह हेरिया मुँभै बड़ी खुशी होआ सा।

⁶ऐबै ज़ैण्ढै तुसै मसीह यीशु प्रभु केरिया ग्रहण केरू सा, तैण्ढै तेइबै मनदै रौहा।

⁷होर तेईन जड़ ढौकदै, होर बढ़दै रौहा, होर ज़ैण्ढै तुसै सिखाऊ ऐन्दै सी, तैण्ढै बशाह न मजबूत होंदै रौहा, बोहू धन्यवाद केरदै रौहा।

⁸साबधान रौहा कि कोई तुसाबै तेई बेकार ज्ञान होर बेकारा रै धोखै री बजहा न भड़काले, ज़ुण मांहणु रै रीति रुआज़ होर लोका री शिक्षा रै मुताबक सा, पर मसीह रै मुताबक नैंई।

⁹इन्हां लोका बै मोका मतेई देंदै ताकि तै तुसाबै धोखा दै, किबैकि परमेश्वर पूरी तैरहा न मसीह रै शरीरा न बास केरा सा।

¹⁰सौ हर शक्ति होर अधिकारा पैंधै मुख्य सा। अगर तुसै मसीह न सी, ता तुसाबै कोई बी कमी नैंई ऑथि।

¹¹मसीह न तुसरा ऐण्ढा खतना हुआ सा, ज़ुण लोका न नी होन्दा, मतलब कि मसीह रा खतना ज़ुणीन पापी शारीरिक देह उतारिआ सा।

¹²होर ज़ैबै तुसै बपतिस्मा लेऊ ती, ता ऐ मसीह सैंघै पौथणै ज़ैण्ढा ती। तैबै तुसै ज़िन्दै केरै, किबैकि तुसाबै परमेश्वरा री शक्ति पैंधै बशाह ती, ज़ुणियै मसीह बै मूँएंदै न ज़िंदा केरू।

¹³तुसरै पापा री बजहा न तुसै मूँएंदै ती होर परमेश्वरा रै लोक नैंई ती। पर परमेश्वरै मसीह बै तुसाबै ज़िन्दा केरनै धिना, ज़ैबै तेइयै आसरै सारै पाप माफ केरै।

¹⁴होर बिधि रा सौ लेख ज़ुण आसरै नाँ पैंधै, होर आसरै बरोधा न ती खत्म केरू, होर तेइबै क्रूसा पैंधै कीला सैंघै लटकाईया सामनै न दूर केरू सा।

¹⁵होर तेइयै हर शक्ति होर अधिकारा बै हराऊ होर तिन्हैं तिन्हरा सैभी रै सामनै तमाशा बणाऊ, होर क्रूसा री बजहा न तिन्हां पैंधै जय-जयकारे री आवाज़ शणाई।

¹⁶तैबै कोई बै ऐ अधिकार नैंई ऑथि कि तुसाबै झ़ूठी गैला न फ़सालै, ज़ैण्ढै कि खाँणै-पिणै या त्यौहार या नोंऊँऐं चाँद या बशाँ रै ध्याड़ै रै बारै न।

¹⁷किबैकि ज़ो गैला ऐणु आई ती, सैभ तिन्हरी परछाई सा, पर असली ता मसीह सा।

¹⁸तिन्हां लोका रै ज़रियै धोखा मतेई खाँदै, ज़ो नम्र होंणै रा दिखावा केरा सी होर स्वर्गदूता री पूजा केरा सी। तै दर्शन हेरनै रै बारै न घमण्ड केरा सी। पर ऐ सैभ बकवास सा, किबैकि तिन्हरै दिमाग स्वार्थी इच्छा न भौरूऐदै सी।

¹⁹तै ऐबै मसीह रा हिस्सा नैंई ऑथि, ज़ो पूरै शरीरा री मूँडी सा। मसीह शरीरा बै आपणी ताकत देआ सा, होर सौ आपणै ज़ोड़ होर मांसपेशिया बै कठा केरिया ढौकणै री तैंईंयैं इस्तेमाल केरा सा, किबैकि ऐ परमेश्वरा री शक्ति न बढ़ा सा।

²⁰ज़ैबै कि तुसै मसीह सैंघै लोका री शिक्षा रै मुताबक मूँएंदै सी, ता फिरी किबै तिन्हरै बराबर ज़ो दुनिया न ज़िन्दगी ज़ीआ सी होर ऐण्ढी बिधि रै वशा न किबै रौहा सी?

²¹कि ऐ नी छ़ुँगणा, ऐ नी खाँणा, होर औखै हौथ नी लाणा।

²²किबैकि ऐ सैभ बिधि बेकार सी। किबैकि ऐ मांहणु रै हुक्म होर शिक्षा रै मुताबक सा।

²³इन्हां बिधि बै एक बुद्धिमान तरीकै न हेरा सी, ज़ो आपु बै परमेश्वरा री तैंईंयैं सौंपणै, तिन्हरी झ़ूठी दीनता होर आपणै शरीरा बै सख्त बर्ताव केरनै री तैंईंयैं मज़बूर केरा सा। पर असली न ऐ बिधि लोका बै तिन्हरी इच्छा बै रोकणै न मज़त नैंई केरदा।