Read Pahari, Kullu कुलुस्सियों 3 Bible Online

कुलुस्सियों 3 - Pahari, Kullu bible

कुलुस्सियों 3

¹तुसै मसीह सैंघै ज़िन्दै केरै सी। ऐबै स्वर्गा न ज़ो किछ़ सा तेथा पैंधै आपणा दिल लात्, ज़ौखै मसीह परमेश्वरा सैंघै सैभी न आदर योग्य ज़ैगा न बेठा सा।

²धौरती री गैला पैंधै नैंई पर स्वर्गा री गैला पैंधै ध्यान लाईया रखा।

³किबैकि तुसै आपणै पापा री आदती री तैंईंयैं मूँऐ, होर तुसरी ज़िन्दगी मसीह सैंघै परमेश्वरा न गोजु हुन्दी सा।

⁴ज़ैबै मसीह तुसाबै नौंऊँईं ज़िन्दगी देआ सा, ज़ैबै सौ ऐसा दुनिया न दबारा एज़ा सा, ता तुसा बी ऐणा होर तेइरी महिमा न हिस्सा लेणा।

⁵तैबै तुसै आपणै पापी आदती न जुड़ेदै बुरै कोमा केरना बन्द केरा, ज़ुण धौरती पैंधै सी, मतलब व्यभिचार, छ़ोता, दुष्कामना, बुरी ईच्छा होर लालची मता बणा। ऐ सिर्फ़ मूर्ति री पूजा केरनै ज़ैण्ढा सा।

⁶किबैकि ऐ लोका इन्हां बुरी गैला बै केरा सी, परमेश्वरा पक्का तिन्हां बै सख्ती सैंघै सज़ा देणी।

⁷होर तुसै बी, ज़ैबै इन्हां बुरै कोमा न ज़िन्दगी जिया ती, ता ऊँई रै मुताबक च़ला ती।

⁸पर ऐबै तुसै भी इन्हां सैभी बै मतलब झ़िक, रोष, बैर-भाव, निन्दा होर गाल़ी बकणा ऐ सैभ गैला तुसाबै छ़ौड़नी पौड़नी।

⁹एकी-दुज़ै न झूठ बोलणा छ़ौड़ा, किबैकि तुसै आपणा पराणा पापी स्वभावा होर सैभ बुरै कोम छ़ौड़ी धिनै।

¹⁰होर ऐबै तुसै नौंऊँईं आदत बणाई सा, परमेश्वर एथा बै बनाणु आल़ा आपणै आपा रा पूरा ज्ञान पाणै री तैंईंयैं लगातार आपु सांही बणादा लागा सा।

¹¹तिन्हां मौंझ़ै न ता कोई यूनानी रौहू, न यहूदी, न खतना आल़ै, न बिना खतनै आल़ै, न जंगली, न सेकती, न गुलाम होर न आज़ाद, सिर्फ़ मसीह सा ज़ो सैभी न बड़ा सा होर सौ सैभी न रौहा सा।

¹²तैबै ज़ैबैकि परमेश्वरै तुसै चुनै सी होर तुसा सैंघै झ़ुरी रखा सा, बड़ी दया, होर भलाई, होर दीनता, होर नम्रता, होर सहनशीलता धारण केरा।

¹³अगर कौसी बै कोई पैंधै दोष लाणै री बजहा होली, ता एकी दुज़ै री सहन केरा, होर एकी दुज़ै रै अपराध माफ़ केरा ज़ैण्ढै प्रभुऐ तुसा रै अपराध माफ़ केरै, तैण्ढै तुसै भी माफ केरा।

¹⁴होर इन्हां सैभी पैंधै सैभी न बड़ी गैल ऐ सा कि तुसाबै एकी दुज़ै सैंघै झ़ुरी केरनी चेहिऐ। ऐण्ढा केरिया, तुसै पूरी तैरहा एकजुट होंणा।

¹⁵होर मसीह री शान्ति ज़ुणिरी तैंईंयैं तुसै एक शरीर होईया शाधै भी सी, तुसै रै दिला न राज़ केरला, होर तुसै धन्यवाद देणु आल़ै बणा।

¹⁶मसीह रै वचना बै आपणै दिला न बोहू बसणै देआ, होर सिद्ध ज्ञाना सैंघै एकी दुज़ै बै सिखात, होर सलाह देआ, होर आपणै-आपणै मना न धन्यवादा सैंघै परमेश्वरै री तैंईंयैं भजन होर स्तुतिगान होर आत्मिक गीत गात्।

¹⁷होर वचना न या कोमा न ज़ो किछ़ भी केरा सैभ प्रभु यीशु रै नाँ न केरा, होर प्रभु यीशु द्वारा परमेश्वर पिता रा धन्यवाद केरा।

¹⁸हे लाड़िओ, ज़ैण्ढा प्रभु न ठीक सा, तैण्ढा आपणै-आपणै लाड़ै रै अधीन रौहा।

¹⁹हे लाड़ैओ, आपणी-आपणी लाड़ी सैंघै झ़ुरी रखा, होर तिन्हां सैंघै झ़िक मता केरदै।

²⁰हे शोहरूओ, आपणै-आपणै आमा-बापु रै हुक्मा रा पालन केरा, किबैकि परमेश्वर ऐथा सैंघै खुश होआ सा।

²¹हे बाल बच्चे आल़ैओ, आपणै शोहरु बै तंग मौता केरदै, ऐण्ढै नैंई लोड़ी हुआ कि तै निराश होलै।

²²ओ दासो, ज़ुण ऐसा दुनिया न तुसा रै मालक सी, सैभी गैला न तिन्हैं रा हुक्म मनै केरा, मांहणु बै खुश केरनै आल़ै सांही रिहाणै री तैंईंयैं नी, बल्कि इमानदारी होर परमेश्वरै रै डौरा न।

²³होर ज़ो किछ़ तुसै केरा सी, पूरै मना सैंघै केरा, ऐ सोचिया कि मांहणु री तैंईंयैं नैंई बल्कि प्रभु री तैंईंयैं केरा सा।

²⁴किबैकि तुसाबै पता सा कि ऐथा रै बदले तुसाबै प्रभु न ईनाम मिलणा, तुसै प्रभु मसीह री सेवा केरा सी।

²⁵किबैकि ज़ो बुरा केरा सा, तेई आपणी बुराई री सज़ा भुगतणी, परमेश्वर कोई रा पक्षपात नैंई केरदा।