Read Pahari, Kullu 1 थिस्सलुनीकियों 1 Bible Online

1 थिस्सलुनीकियों 1 - Pahari, Kullu bible

1 थिस्सलुनीकियों 1

¹ऐ चिट्ठी पौलुस होर सिलवानुस होर तीमुथियुसै री धिरै न, थिस्सलुनीकियै शैहरा री मण्डली रै नाँ न ज़ो परमेश्वर बापू होर प्रभु यीशु मसीह न सी, तिन्हां री तैंईंयैं लिखी सा। अनुग्रह होर शान्ति तुसाबै मिलदी लोड़ी रौही।

²आसै आपणी प्रार्थना न तुसाबै हमेशा याद केरा सी होर लगातार तुसा सैभी रै बारै न परमेश्वरा रा धन्यवाद केरा सी।

³ज़ैबै आसै आपणै परमेश्वर बापू न प्रार्थना केरा सी, बशाह री बजहा ज़ो कोम तुसै केरा सी, होर मुश्किल कोम विश्वासी री मज़त केरनै री तैंईंयैं केरा सी किबैकि तुसै तिन्हां सैंघै झ़ुरी डाआ सी होर प्रभु यीशु मसीह रै वापस ऐणै री आशा न तुसै सताव सौहा सी।

⁴होर हे विश्वासी भाइयो, परमेश्वरै रै प्यारे लोको, आसै जाँणा सी कि परमेश्वरै तुसै तेइरै लोका होंणै री तैंईंयैं चुनै सी।

⁵किबैकि आसरा खुशी रा समाद यीशु रै बारै न तुसा हागै सिर्फ़ वचन मात्र ही नैंई, बल्कि पवित्र आत्मा री शक्ति होर बड़ै प्रमाणा सैंघै पुजू सा, ज़ैण्ढा तुसै जाँणा सी कि तुसरी भलाई री तैंईंयैं तुसरै बिच़ा न आसरा बर्ताव कैण्ढै ती।

⁶होर तुसै बड़ै क्लेशा न पवित्र आत्मै री खुशी सैंघै वचना बै मैनिया आसरी होर प्रभु री च़ाल च़लदै लागै।

⁷औखै तैंईंयैं कि मकिदुनिया होर अखायै प्रदेशा रै सैभी विश्वासी री तैंईंयैं तुसै आदर्श बैणै।

⁸किबैकि तुसरै औखै न सिर्फ़ मकिदुनिया होर अखाया प्रदेशा न प्रभु रा वचन नी शुणाऊ बल्कि परमेश्वरा पैंधै ज़ो तुसरा विशवास सा तेथै री चर्चा हर ज़ैगा न ऐण्ढी फैली कि आसाबै तुसरै बारै न बोलणै री ज़रूरत नी ऑथि।

⁹किबैकि ते आपु आसरै बारै न बोला सी कि तुसा हागै आसरा ऐणा कैण्ढा हुआ, किबैकि तुसै मूर्ति न परमेश्वरा धिरै बै फिरै ताकि ज़िन्दै होर सच़ै परमेश्वरै री सेवा केरलै।

¹⁰होर तेइरै बेटै री स्वर्गा न दबारा वापस ऐणै री इंतज़ार केरदै रौहा, ज़ुण तेइयै मूँऐंदै न ज़िन्दा केरू मतलब यीशु ज़ो आसाबै ऐणु आल़ै प्रकोपा न बच़ा सा।