Read Pahari, Kullu 1 थिस्सलुनीकियों 3 Bible Online

1 थिस्सलुनीकियों 3 - Pahari, Kullu bible

1 थिस्सलुनीकियों 3

¹तैबै ज़ैबै आसरै होर नी रौहुआ ता आसै ऐ सोच़ु कि अथेन शैहरा न केल्है रौहलै।

²होर आसै तीमुथियुस ज़ो मसीह यीशु रै खुशी रै समादा न आसरा विश्वासी भाई होर परमेश्वरा रा सेवक सा तैबै भेज़ू कि तुसाबै स्थिर केरला होर तुसरै विश्वासै रै बारै न तुसाबै उत्साहित केरै।

³कि कोई इन्हां दु:खै री बजहा न भटकला नी, किबैकि तुसै आपु जाँणा सी कि आसै बी दुःख सौहणै री तैंईंयैं शाधै सी।

⁴किबैकि पैहलै बी ज़ैबै आसै तुसरै औखै ती ता तुसै बोला ती कि आसाबै दु:ख सौहणै पौड़नै होर ऐण्ढाऐ हुआ होर तुसै जाँणा भी सी।

⁵एसा बजहा न ज़ैबै मेरै नी रौहुआ ता तुसरै विश्वासा रा हाल ज़ाणनै री तैंईंयैं तिमुथियुसा भेज़ू कि ऐण्ढा नी लोड़ी हुआ कि शैतानै तुसरी परीक्षा केरी होली होर आसरी मेहनत बेकार होली।

⁶पर ऐबै तीमुथियुसै ज़ो तुसा हागै न एज़िया तुसरै विश्वास हो झ़ुरी रा खुशी रा समाद शुणाऊ होर एसा गैलै रै बारै न बी दैसू कि तुसै हमेशा झ़ुरी सैंघै आसाबै याद केरा सी। होर आसाबै मिलणै री इच्छा रैखा सी, ज़ैण्ढा कि आसै बी तुसा न मिलणा चाहा सी।

⁷तैबै हे विश्वासी भाइयो, आसै आपणै सारै दु:ख होर क्लेशा न तुसरै विश्वासा न तुसरै बारै ऐ समाद शुणिया कि तुसै बशाह न मजबूत सी आसाबै हौंसला मिलु।

⁸किबैकि ऐबै अगर तुसै प्रभु पैंधै पक्का बशाह रखा सी ता आसाबै हिम्मत मिला सा।

⁹ऐबै आसै तुसरै बारै न परमेश्वरा रा धन्यवाद केरा सी। होर ज़ैण्ढी खुशी आसाबै तुसरी बजहा न मिली सा तेथा री तैंईंयैं बी परमेश्वरा रा धन्यवाद केरा सी।

¹⁰आसै हर रोज़ लगातार बड़ी प्रार्थना केरा सी कि तुसा सैंघै मिलै होर तुसाबै बशाह न होर बी मज़बूत केरलै।

¹¹ऐबै आसरी ऐ प्रार्थना सा कि आसरा बापू परमेश्वर होर प्रभु यीशु, मसीह तुसा हागै ऐणै री तैंईंयैं आसरी अगुवाई केरला।

¹²होर प्रभु ऐण्ढै केरै, ज़ैण्ढा आसै तुसा न झ़ुरी रखा सी, तैण्ढाऐ तुसरी झ़ुरी एकी दुज़ै सैंघी झ़ुरी रखा सी होर तुसा सैभी मांहणु सैंघै बढ़लै होर उन्नति केरदा ज़ाला।

¹³आसै प्रार्थना केरा सी कि प्रभु यीशु तुसरै मन बै स्थिर केरला, ज़ैबै सौ दबारा आपणै सैभी पवित्र लोका सैंघै ऐला ता ते आसरै परमेश्वर पिता सामनै पवित्रता न निर्दोष ठहरलै।