Read Pahari, Kullu 1 थिस्सलुनीकियों 5 Bible Online

1 थिस्सलुनीकियों 5 - Pahari, Kullu bible

1 थिस्सलुनीकियों 5

¹पर हे विश्वासी भाइयो, ऊँईरी कोई जरूरी नी कि यीशु मसीह रै दबारा वापस ऐणै रै बौगता रै बारै न तुसरी तैंईंयैं किछ़ लिखलै।

²किबैकि तुसै आपु ठीक जाँणा सी कि ज़ैण्ढा च़ोर राती च़ानक एज़ा सा, तैण्ढाऐ दसै बगैर प्रभु यीशु रा ध्याड़ा ऐणु आल़ा सा।

³ज़ैबै लोका बोलदै होंणै कि ठीक सी होर किछ़ डौर नी ऑथि, ता तिन्हां पैंधै एकदम विनाश पौड़ना, ज़ैण्ढा कि सुज़दी बेटड़ी पैंधै पीड़ा एज़ा सी होर बच़ी नी सकदी; तैण्ढै तिन्हां लोका बी कौसी रीतियै नी बच़णा।

⁴पर हे विश्वासी भाइयो, तुसै ता निहारै न नी ऑथि कि प्रभु यीशु रा ध्याड़ा च़ोरा सांही तुसा पैंधै एज़िया पौड़ला।

⁵किबैकि, तुसै सैभै ज्योति री औलाद सी होर ध्याड़ै री औलाद सी। आसै न ता राती रै होर न निहारै री औलाद ऑथि।

⁶तैबै आसा अविश्वासी सांही सोंदै नी रौहणा, पर बिऊदै रौहणा होर होशियार रौहणा।

⁷किबैकि ज़ुणा सोआ सी तै राती बै सोआ सी होर ज़ुणा मतवालै होआ सी ते राती बै मतवालै होआ सी।

⁸पर आसै ज़ो ध्याड़कै सी। बशाह होर झ़ुरी रा कवच लाइया होर उद्धारै रै आशा रा टोप लाइया होशियार होर सुरक्षित रौहणा[1]।

⁹किबैकि परमेश्वरै आसै आपणी झ़िकै री तैंईंयैं नी बल्कि एथै री तैंईंयैं ठहराऐ कि आसै आपणै प्रभु यीशु मसीह रै द्वारा उद्धार प्राप्त केरलै।

¹⁰यीशु मसीह आसरी तैंईंयैं ऊँईरी तैंईंयैं मूँआ कि आसै चाहे ज़िन्दै होलै या मूँऐंदै होलै, ज़ैबै सौ दबारा एला, ता आसा सैभै मिलिया तेई सैंघै हमेशा री तैंईंयैं ज़ीलै।

¹¹एसा बजहा न एकी दुज़ै बै उत्साहित केरा होर एकी दुज़ै री उन्नति री बजहा बणा, तुसै ऐण्ढा केरा बी सी।

¹²हे विश्वासी भाइयो, आसै तुसा हागै अर्ज़ केरा सी कि, ज़ो तुसा न मेहनत केरा सी होर प्रभु न तुसरै स्याणै सी होर तुसाबै शिक्षा देआ सी, तिन्हरी मैना।

¹³तै कोम ज़ो तुसरी तैंईंयैं केरा सी ता तुसै तिन्हां सैंघै झ़ुरी केरा होर तिन्हां बै बोहू आदरै रै लायक समझ़ा, आपु न मेल-मिलापा न रौहा।

¹⁴हे विश्वासी भाइयो, आसै तुसाबै अर्ज़ केरा सी कि ज़ो ठीक च़ाल नी च़लदै, तिन्हां बै चेताऊणी देआ होर डरपोका बै हिम्मत दैआत्। कमज़ोर मांहणु बै सँभाला होर सैभी सैंघै सब्रा सैंघै रौहा।

¹⁵होशियार रौहा, कोई कौसी सैंघै बुराई रै बदलै बुराई नी केरला, बल्कि हमेशा भलाई केरनै री तैंईंयैं त्यार रौहा। आपु सैभी न बी भलाई री कोशिश केरा।[2]

¹⁶हमेशा खुश रौहा।

¹⁷लगातार प्रार्थना न लागी रौहा।

¹⁸हर हालता न प्रभु रा धन्यवाद केरा। किबैकि तुसरी तैंईंयैं मसीह यीशु न परमेश्वरै री ऐण्ढी इच्छा सा।

¹⁹परमेश्वरा री आत्मा बै आपणै आँध्रै कोम केरनै न मता रोका।

²⁰ज़ो भविष्यवाणी परमेश्वरै लोका पैंधै केरी सा तिन्हां बै तुच्छ मता ज़ाणदै।

²¹सैभी गैला बै परखा, ज़ो परमेश्वरा धिरै न सी होर ज़ो शोभली सी तिन्हरा पालन केरा।

²²सैभी किस्मै री बुराई न दूर रौहा। [3]

²³शान्ति देणु आल़ा परमेश्वर आपु तुसाबै पूरी रीतियै पवित्र केरला; होर तुसरी आत्मा, प्राण होर देह आसरै प्रभु यीशु मसीह रै वापस ऐणै तैंईंयैं पूरै-पूरै निर्दोष होर सुरक्षित रौहलै।

²⁴तुसरा शाधणु आल़ै तुसै पवित्र होंणै री तैंईंयैं शाधु सा तैण्ढाऐ तुसाबै बी पवित्र बणिया रौहणै न मज़त केरला।

²⁵हे विश्वासी भाइयो, आसरी तैंईंयैं प्रार्थना केरा।

²⁶सैभी विश्वासी रा आदरा सैंघै स्वागत केरा।

²⁷हांऊँ तुसाबै प्रभु री कसम देआ सा कि ऐ चिट्ठी सैभी विश्वासी भाई बै पौढ़िआ शुणाइली।

²⁸आसरै प्रभु यीशु मसीह रा अनुग्रह तुसा पैंधै होंदा रौहला।