Read Pahari, Kullu 2 थिस्सलुनीकियों 1 Bible Online

2 थिस्सलुनीकियों 1 - Pahari, Kullu bible

2 थिस्सलुनीकियों 1

¹ऐ चिट्ठी पौलुस होर सीलास होर तीमुथियुसै री तरफा न, थिस्सलुनीकियै शैहरा री मण्डली रै नाँ न ज़ो परमेश्वर पिता होर प्रभु यीशु मसीह न सी, तिन्हरी तैंईंयैं लिखी सा

²आसरै परमेश्वर पिता होर प्रभु यीशु मसीह न तुसाबै अनुग्रह होर शान्ति मिलदी लोड़ी रौही।

³हे भाइयो बैहणियो, तुसरै बारै न आसाबै हमेशा परमेश्वरा रा धन्यवाद केरना चेहिऐ होर ऐ सही भी सा कि, तुसरा बशाह यीशु मसीह न बढ़दा ज़ा सा होर आपु न तुसा सैभी न झ़ुरी बढ़दी ज़ा सा।

⁴तैबै आसै परमेश्वरा री मण्डली न तुसरै बारै न घमण्ड केरा सी कि भलै ही तुसै परीक्षा होर दु:ख कष्ट सौहा सी फिरी भी तुसै धीरजा सैंघै सौहा सी होर ऐबै भी तुसै यीशु मसीह पैंधै बशाह केरा सी।

⁵ऐ परमेश्वरै रै सच़ै न्याय रा स्पष्ट सबूत सा कि, तुसै परमेश्वरै रै राज्य रै लायक ठहरलै, ज़ुणी री तैंईंयैं तुसै दु:ख भी सौहा सी।

⁶किबैकि परमेश्वर हमेशा धर्मा सैंघै न्याय केरा सा तैबै तेई तिन्हां लोका बै दुःख देणा ज़ो तुसाबै दुःख देआ सी।

⁷पर तेई तुसाबै तुसरी परेशानी न राहत देणी। परमेश्वरा आसा री तैंईंयैं भी ऐण्ढा केरना ज़ैबै प्रभु यीशु आपणै शक्तिशाली स्वर्गदूता सैंघै भौकदी औगी न स्वर्गा न एज़ा सा।

⁸होर ज़ो परमेश्वरा बै नी पछ़ियाणदै होर ज़ो आसरै प्रभु यीशु रै बारै न खुशी रै समादा बै ग्रहण नैंई केरदै, तेई तिन्हां बै सज़ा देणी।

⁹तिन्हां प्रभु रै सामनै तेइरी महिमा रै शक्ति न दूर होईया हमेशा विनाशा री सज़ा पाणी।

¹⁰ऐ तेई ध्याड़ै न होंणा, ज़ैबै परमेश्वरा री तिन्हां सैभी रै ज़रियै आदर होर महिमा होंणी। ज़ो तेइन बशाह केरा सी होर ज़ो तेइरै सी। एथा न तुसै शामिल सी, किबैकि तुसै तेई सन्देशा पैंधै बशाह केरू ज़ो आसै तुसाबै तेइरै बारै न दसू।

¹¹तैबै आसै हमेशा तुसरी तैंईंयैं प्रार्थना भी केरा सी कि आसरा परमेश्वर तुसाबै तेसा ज़िन्दगी रै लायक बणाऐ ज़ो तेइयै तुसै जीणै री तैंईंयैं शाधै सी, होर तेई तुसरी हर भली इच्छा पूरी तैरहा न पूरी केरनी, होर तेई हर कोम सफल केरनै ज़ो तुसरै बशाह रा नतीज़ा सा।

¹²आसरै परमेश्वर होर प्रभु यीशु मसीह रै अनुग्रह रै मुताबक आसरै प्रभु यीशु मसीह रा नाँ तुसा मौंझ़ै महिमा पाला होर तुसै तेईन।