Read Pahari, Kullu 2 थिस्सलुनीकियों 2 Bible Online

2 थिस्सलुनीकियों 2 - Pahari, Kullu bible

2 थिस्सलुनीकियों 2

¹हे भाइयो बैहणियो, ऐबै आसै प्रभु यीशु मसीह रै वापस ऐणै रै बारै न किछ़ बोलणा सा होर तेई बौगता ज़ैबै आसा तेई सैंघै मिलणा।

²तिन्हां लोका रै ज़रियै आसानी सैंघै परेशान या मता घबराँदै ज़ो ऐ दावा केरा सी कि प्रभु पैहलै न ही आऊ सा। ते बोली सका सी कि तिन्हैं सीधै पवित्र आत्मा न या कौसी होरा न या औखै तक कि तिन्हैं ऐ आसरी एक चिट्ठी न पौढ़ू सा।

³तिन्हां सैभी बुरी गैला पैंधै बशाह मता केरदै ज़ो लोका तुसाबै एथा रै बारै न बोलदै लागै सी, किबैकि प्रभु यीशु मसीह वापस ऐणै न पैहलै, ऐण्ढा बौगत होंणा ज़ैबै कई लोका परमेश्वरा रै बरोधा न विद्रोह केरना होर दुष्ट मांहणु, ज़ुणिबै परमेश्वरा पक्का नरका न नाश केरना, प्रगट होंणा।

⁴तेई परमेश्वर होर सैभी झ़ूठै देऊआ रा होर ज़ो किछ़ भी लोका पूजा सी बरोध केरना, होर आपु बै तिन्हां सैभी न बड़ै कहलाइणा, औखै तक कि तेई परमेश्वरा रै मन्दिरा न बेशणा होर आपु बै परमेश्वर होंणै रा दावा केरना।

⁵कि तुसाबै याद नी, कि ज़ैबै हांऊँ तुसरै औखै ती, ता तुसा सैंघै इन्हां गैला बै बोला केरा ती?

⁶ऐबै सौ दुष्ट मांहणु ऐबै तक प्रगट नैंई हुआ, किबैकि ऐण्ढा किछ़ सा सौ तेइबै रोका सा। पक्का तुसाबै याद सा कि सौ कि सा ज़ो तेइबै रोका सा। तैबै, ज़ैबै परमेश्वरा रा ठहराऊ होंदा बौगत एज़ा सा तेई दुष्ट मांहणु हेरिणा।

⁷किबैकि दुष्टा रा भेद ऐबै भी गुप्त रूपा न दुनिया न कोम केरा सा, पर हाज़ी भी एक रोकणु आल़ा सा होर ज़ैबै तैंईंयैं सौ दूर नी होला तेई रोकिया रौहणा।

⁸तेथा न बाद दुष्ट मांहणु हेरिणा, पर ज़ैबै प्रभु यीशु ऐला, ता सौ दुष्ट मांहणु बै आपणै हुक्मा न ज़ो तेइरै मुँहा न निकल़ा सा होर तेइरी ऐणै री महिमा सैंघै नाश केरना।

⁹दुष्ट मांहणु हागै शैताना री शक्ति होंणी। तेई सैभी किस्मै रै झ़ूठै चमत्कार नशाण होर नौखै कोम केरनै ज़ो लोका बै ऐ सोच़णै री तैंईंयैं मजबूर केरला कि ऐ परमेश्वर सा ज़ो तिन्हां बै केरदा लागा सा।

¹⁰तेई सैभी किस्मा री दुष्ट गैला केरनी होर तिन्हां बै धोखा देणा ज़ो परमेश्वरा रै ज़रियै नाश होंणै। किबैकि तिन्हैं यीशु मसीह रै बारै न सच़ा सन्देश शुणनै होर परमेश्वरा न बच़ाइणै न नाँह केरू।

¹¹होर एसा बजहा न परमेश्वरा तिन्हां बै एक भटकाणु आल़ी सामर्थ भेज़णी ज़ो तिन्हां बै सच़ाई न दूर नेआ सा ताकि ते झ़ूठा पैंधै बशाह केरलै ज़ो दुष्ट मांहणु तिन्हां बै दसला।

¹²होर ज़ेतरै लोका यीशु मसीह रै बारै न सच़ै सन्देशा पैंधै बशाह नैंई केरदै, पर पाप केरनै पसन्द केरा सी तिन्हां सैभियै सज़ा पाणी।

¹³औखै तुसरी तैंईंयैं परमेश्वरा रै सामनै आसरा हमेशा धन्यवाद देणा सही सा। तुसै प्रभु रै प्यारे सी किबैकि परमेश्वरै शुरु न ही पवित्र आत्मा रै ज़रियै पापा न आँगी केरिया होर सच़िऐ तुसरै बशाह री बजहा न उद्धारा री तैंईंयैं तुसै चुनै सी।

¹⁴आसरै खुशी रै समादा रा प्रचार केरनै रै ज़रियै तेइयै तुसै बच़ाणै री तैंईंयैं शाधै सी ताकि तुसै तेसा महिमा न हिस्सा लेई सकै ज़ो परमेश्वरै आसरै प्रभु यीशु मसीह बै धिना सा।

¹⁵तैबै हे भाइयो बैहणियो मजबूत रौहा, ज़ो शिक्षा तुसै आसरै वचन होर चिट्ठी रै द्वारा प्राप्त केरी सा, तिन्हां बै ढोकिया रखा।

¹⁶आसै आपणै प्रभु यीशु मसीह सैंघै होर आसरै परमेश्वर पिता ज़ुणियै आसा सैंघै झ़ुरी केरी होर ज़ुणियै आपणी अनुग्रह न आसाबै हमेशा उत्साह होर मजबूत आशा धिनी सा प्रार्थना केरा सी,

¹⁷कि तुसरै मना बै शान्ति देला होर तुसाबै हर एक शोभलै कोमा न होर वचना न मजबूत केरला।