Read Pahari, Kullu 2 थिस्सलुनीकियों 3 Bible Online

2 थिस्सलुनीकियों 3 - Pahari, Kullu bible

2 थिस्सलुनीकियों 3

¹हे भाइयो बैहणियो, आखरी न आसरी तैंईंयैं प्रार्थना केरदै रौहा कि, प्रभु यीशु रै बारै न सन्देश कई होर ज़ैगा न छ़ेकै फैलै होर महिमा पाऐ, ज़ैण्ढा तुसा न हुआ।

²होर आसै टेढै होर दुष्ट मांहणु न बच़िया रौहलै किबैकि हर कोई प्रभु यीशु रै सन्देशा रै बारै न बशाह नैंई केरदै।

³पर तुसै पूरी रीति न प्रभु पैंधै बशाह केरी सका सी, तेई तुसै आत्मिक रूपा न मजबूत केरनै होर तुसरी रक्षा केरनी ताकि शैतान तुसरा नुकसान नैंई केरी सकलै।

⁴होर आसाबै प्रभु न तुसा पैंधै बशाह सा कि आसै तुसाबै ज़ो किछ़ केरनै बै बोलू सा तुसै तैण्ढाऐ केरदै लागै सी होर केरदै भी रौहणा।

⁵हांऊँ प्रार्थना केरा सा कि परमेश्वरा री झ़ुरी होर मसीह रै धीरजा धिरै प्रभु तुसरै मनै री अगुवाई केरला।

⁶हे भाइयो, बैहणियो आसै तुसाबै आपणै प्रभु यीशु मसीह रै अधिकारा न हुक्म देआ सी कि हर एक ऐण्ढै सैंघी विश्वासी न अलग रौहा, ज़ो आलसा न रौहा सी होर ज़ो शिक्षा रा पालन नैंई केरदा ज़ो आसै तुसाबै सिखाई सा।

⁷किबैकि तुसै आपु शोभली तैरहा जाँणा सी कि तुसै तैण्ढै जीणा चेहिऐ ज़ैण्ढै आसै ज़ीऐ, किबैकि ज़ैबै आसै तुसरै बिच़ा न रौहा ती आसै आलसी नैंई ती पर कोम केरा ती।

⁸होर कौसी री रोटी मुफ्त नी खाई, पर मेहनत होर कष्टा न राती-ध्याड़ी कोम-धँधा केरा ती कि तुसा कौसी पैंधै बोझ नी होला।

⁹ऐ नी कि आसाबै अधिकार नी ऑथि पर एथै री तैंईंयैं कि आपणै आपु बै तुसरी तैंईंयैं आदर्श ठहरालै कि तुसै आसा सांही च़ाल च़ललै।

¹⁰होर ज़ैबै आसै तुसरै औखै ती, तैबै बी ऐ हुक्म तुसाबै देआ ती कि “अगर कोई कोम नी केरना चाहला ता रोटी भी नी खाला।”

¹¹आसै शुणा सी कि केतरै लोका तुसरै बिच़ा न आलसी च़ाल च़ला सी होर किछ़ कोम नी केरदै पर होरी रै कोमा न हौथ पा सी।

¹²ऐण्ढै लोका बै आसै प्रभु यीशु मसीह रै अधिकारा न हुक्म देआ सी होर समझ़ा सी कि च़ुपच़ाप कोम केरिया आपणी रोटी खाया केरै।

¹³होर तुसै हे भाइयो, बैहणियो भलाई केरनै न हिम्मत मता छ़ौड़दै।

¹⁴अगर कोई आसरी एसा चिट्ठी रा सन्देश नैंई मनला ता तेई पैंधै नज़र रखा होर तेइन अलग रौहा, ताकि सौ शर्मिंदा महसूस केरला;

¹⁵तैबै भी तेइबै बैरी मता समझ़दै पर आपणै सैंघी विश्वासी ज़ाणिया तेइबै समझ़ाँदै रौहा।

¹⁶हांऊँ प्रार्थना केरा सा कि प्रभु ज़ो आसरी शान्ति रा स्रोता सा, तुसाबै हर बौगत होर हर तैरहा न शान्ति दै। प्रभु तुसा सैभी सैंघै रौहै।

¹⁷हांऊँ, पौलुस तुसाबै नमस्कार केरनै री तैंईंयैं आपणै हौथै न चिट्ठी रै ऐई हिस्से बै लिखदा लागा सा। ऐण्ढी तैरहा हांऊँ आपणी सैभी चिट्ठी रा आखरी हिस्सा लिखा सा, ताकि सैभी जाणी सकै कि ऐ चिट्ठी मैं लिखी सा।

¹⁸आसरै प्रभु यीशु मसीह रा अनुग्रह तुसा सैभी सैंघै होंदा रौहै।