Read Pahari, Kullu 1 तीमुथियुस 1 Bible Online

1 तीमुथियुस 1 - Pahari, Kullu bible

1 तीमुथियुस 1

¹हांऊँ पौलुस ऐ चिट्ठी लिखदा लागा सा, हांऊँ आसरै उद्धारकर्ता परमेश्वर होर मसीह यीशु रै हुक्मा न मसीह यीशु रा प्रेरित सा, ज़ुणिन आसै आश केरा सी।

²हांऊँ ऐ चिट्ठी तीमुथियुसा बै लिखा सा। तुसै मेरै बेटै सांही सी किबैकि तुसै मसीह न बशाह केरा सी ज़ैण्ढै हांऊँ केरा सा। हांऊँ प्रार्थना केरा सा कि पिता परमेश्वर होर आसरै प्रभु यीशु मसीह री तरफा न तुसाबै अनुग्रह, दया होर शान्ति मिलदी लोड़ी रौही।

³हांऊँ तुसाबै फिरी बोला सा कि ज़ैण्ढा मैं मकिदुनिया प्रदेशा बै ज़ाँदी घेरै तौभै समझ़ाऊ ती कि इफिसुस शैहरा न रौहिया तिन्हां झ़ूठी शिक्षा देणु आल़ै बै हुक्म देआ कि ते झ़ूठी शिक्षा देणा बन्द केरै।

⁴होर तिन्हां बेकारा री कहाणी होर बड़ै खानदाना पैंधै मन हेरी लाँदै ज़ुणिन कि बैंहस होआ सा; होर ऐण्ढी गैला लोका बै परमेश्वरा पैंधै एक बशाह री ज़िन्दगी जिणै न मज़त नैंई केरदी।

⁵तुसाबै ऐण्ढै केरनै री तैंईंयैं मेरै बोलणै रा मकसद ऐ सा कि सैभ विश्वासी प्यारा सैंघै भौरना ज़ो च़ोखै मन, शोभलै विचार होर निष्कपट बशाह न एज़ा सा।

⁶झ़ूठी शिक्षा देणु आल़ै ऐ सैभ गैला केरना बन्द केरी सा सिर्फ़ बेकारा री गैला केरा सी।

⁷होर ऐ झ़ूठी शिक्षा देणु आल़ै शास्त्री सांही बणना ता चाहा सी पर ज़ो ते दुज़ै बै सिखाणै री कोशिश हो केरा सी होर दृढ़ता सैंघै बोला सी पर सच़ी न नैंई समझ़दै।

⁸आसै जाँणा सी कि बिधान शोभला सा अगर एथा रा सही रीति न इस्तेमाल केरा सी।

⁹आसै जाँणा सी कि बिधान तिन्हां लोका बै काबू केरनै री तैंईंयैं नैंई धिना ती ज़ो परमेश्वरा बै खुश केरा सी, पर बिधाना बै चोड़नू आल़ै, अपराधी, भक्तिहीन लोका होर पापी बै काबू केरनै री तैंईंयैं। ऐ दुष्ट होर बुरै लोका री तैंईंयैं, होर खूनी री तैंईंयैं ज़ुणियै आपणै आमा-बापू भी मकाणै।

¹⁰व्यभिचारी, पुरूषगामी, लोका बै दासा रै रूपा न बेच़णू आल़ै, झ़ूठै होर झ़ूठी कसम खाँणु आल़ै होर खरै उपदेशै रै बरोधी री तैंईंयैं।

¹¹ऐ शिक्षा खुशी रै समादै रै बारै न सा ज़ो धन्य परमेश्वरा री महिमा रै बारै न गैला केरा सा। परमेश्वरै दुज़ै बै दसणै री तैंईंयैं सौ खुशी रा समाद धिना।

¹²होर हांऊँ आपणै प्रभु यीशु मसीह रा ज़ुणियै मुँभै सामर्थ धिनी सा धन्यवाद केरा सा कि तेइयै हांऊँ विश्वासयोग्य समझ़िया आपणी सेवै री तैंईंयैं ठहराऊ।

¹³हांऊँ ता एक विश्वासी बणनै न पैहलै मसीह रै बारै न निन्दा केरनु आल़ा, विश्वासी बै सताणू आल़ा होर तिन्हां बै नुकसान देणु आल़ा ती, तैबै भी मैं मसीह न बशाह नैंई केरू होर तैबै मुँभै समझ़ नैंई आऊ कि ज़ो हांऊँ केरदा लागा ती सौ गलत ती। एथा बजहा न मसीहै मूँ पैंधै दया केरी।

¹⁴होर आसरै प्रभुऐ मुँभै लगातार आपणा अनुग्रह रिहाऊ। तेइयै मुँभै बशाह होर प्यार धिना किबैकि हांऊँ तेई सैंघै एक बणाऊ।

¹⁵ऐ गैल सच़ी सा होर हर तैरहा न मनणै लायक सा कि, मसीह यीशु आसा पापी रा उद्धार केरनै री तैंईंयैं दुनिया न आऊ, ज़ुणीन कि सैभी न बड़ा पापी हांऊँ सा।

¹⁶पर मूँ पैंधै एथै री तैंईंयैं दया हुई कि मूँ सैभी न बड़ै पापी न यीशु मसीह आपणी पूरी सहनशीलता रिहाला कि ज़ुणा लोका तेई पैंधै हमेशा री ज़िन्दगी री तैंईंयैं विश्वास केरलै, तिन्हरी तैंईंयैं हांऊँ एक आदर्श बणनू।

¹⁷ऐबै सनातन राज़ा, अविनाशी अनदेखै, सौ सच़ा होर ऐकै परमेश्वर सा तेइरा आदर होर महिमा ज़ुग-ज़ुग होंदै रौहली। आमीन।

¹⁸ओ बेटा तीमुथियुस, तिन्हां भविष्यवाणी रै मुताबक ज़ो पैहलै तेरै बारै न केरूईदी ती हांऊँ ऐ हुक्म सौंपा सा कि तू तिन्हरै मुताबक शोभली लड़ाई लड़दा रौह,

¹⁹किछ़ लोकै आपणै शोभलै विचारा रा नाँह केरू ज़ुणिरी बजहा न ते ऐबै मसीह न बशाह नैंई केरदै।

²⁰तिन्हां मौंझ़ै न हुमिनयुस होर सिकन्दर सी ज़ो मैं शैताना बै सौंपै कि ते परमेश्वरा री निन्दा केरना नी सीखलै।