Read Pahari, Kullu 1 तीमुथियुस 2 Bible Online

1 तीमुथियुस 2 - Pahari, Kullu bible

1 तीमुथियुस 2

¹ऐबै हांऊँ तुसाबै सैभी न पैहलै ऐ बोला सा कि, अर्ज़ा होर प्रार्थना, निवेदन होर धन्यवाद सैभी मांहणु री तैंईंयैं केरिलै।

²राज़ा होर होरा सैभी री तैंईंयैं प्रार्थना केरा ज़ो अधिकारा न सी ताकि ते आसाबै शान्ति होर सुरक्षा न रौहणै रै लायक बणालै ताकि आसै परमेश्वरा री आराधना केरी सकै होर हमेशा होरी सैंघै सही बर्ताव केरी सकलै।

³ऐण्ढी प्रार्थना सही सा होर आसरै मुक्तिदाता परमेश्वरा रै ज़रियै स्वीकार केरिया सा।

⁴सौ ऐ चाहा सा कि, सैभी मांहणु री मुक्ति होली होर ते सच़ाई बै शोभली तैरहा पछ़ियाणलै।

⁵किबैकि परमेश्वर एकै सा होर परमेश्वर होर मांहणु रै बिच़ा न भी एकै बिचवाई सा ज़ो यीशु मसीह सा।

⁶मसीहै पाप होर मौऊती री शक्ति न सैभी लोका बै छ़ुड़ाणै री तैंईंयैं आपणै आपु बै धिना; ताकि ठीक बौगता न तेइरी गुआही देइली।

⁷हांऊँ सच़ बोला सा, झ़ूठ नी बोलदा। हांऊँ ऐई उदेश्य न खुशी रै समादा रा प्रचारक, प्रेरित होर होरी ज़ाति री तैंईंयैं बशाह होर सच़ाई रा उपदेशक ठहराऊआ सा।

⁸हांऊँ चाहा सा कि हर ज़ैगा सभा न पुरूष परमेश्वरा बै समर्पित हौथ च़किया प्रार्थना केरलै होर बगैर झ़िकै होर बैंहसा सैंघै प्रार्थना केरै।

⁹होर तैण्ढै ही मसीह बेटड़ी भी शर्मा होर सँयमा सैंघै सुहावनै झिकड़ै लाइया आपणै आपा बै सज़ाऐ; न कि बाल गुँधणै, सुनै मोतियै होर कीमती झिकड़ै लाइया,

¹⁰बल्कि भलै कोमै लाइया आपु बै सज़ाऐ, किबैकि परमेश्वरै री भक्ति केरनु आल़ी बेटड़ी बै ऐ सही सा,

¹¹ज़ैबै दुज़ै लोका विश्वासी बै सिखा सी ता सैभी बेटड़ी बै च़ुपच़ाप होर बड़ै आदरा न शुणिया सीखणा चेहिऐ।

¹²हांऊँ बोला सा कि ज़ैबै तुसै आराधना केरनै री तैंईंयैं कठा होआ सी ता, बेटड़ी न उपदेश केरली होर न मर्दा पैंधै हुक्म च़लाली, पर च़ुपच़ाप रौहली,

¹³मेरा बोलणै री बजहा ऐ सा कि परमेश्वरै पैहलै आदम बणाऊ होर तेथा न बाद तेइयै हव्वा बणाई।

¹⁴होर आदम शैताना रै बहकावै न नी आऊ बल्कि हव्वा बहकावै न एज़िया परमेश्वरा रा हुक्म चोड़ू।

¹⁵फिरी बी बेटड़ी बच़ै पैदा केरनै रै द्वारा उद्धार पाणा, अगर ते सँयमा सैंघै विश्वास, झ़ुरी होर पवित्रता न बणिया रौहली।